1 Zumbe Mulungu aghamba ivi, "Inywi wantu wa Izilaeli, kati mwaakunda kuuya niuiyai imi, kati mukiiusha mulungu yeniihia mwe mesho yangu na kushesangadika uko na uko, 2 mukiituka wakweli na kuituka sa Zumbe Mulungu avyekunda na kwa utanda, neulape kwa zina jangu, kwa kughamba, ‘Sa Zumbe Mulungu avyeishi,’ nee ndiho wantu wa mbali zoshe waonele mng'azo wa mesho kulawa kwakwe na kukigimbika."

3 Zumbe Mulungu awaghamba wantu wa Yuda na wantu wa Yelusalemu kuti, "Imai mbuwa zenyu zena mputi, mushezahanda mbeyu zenyu chamakoa. 4 Inywi wantu wa Yuda na wa Yelusalemu tozai kilagha changu imi Zumbe Mulungu, kiavyei kwangu kwa myoyo yoshe. Mukisheghoshola ivyoho, nenikwewe ni maya makai, hekuna mwedaha kuyahoza."

5 Biikiai mwe shi ya Yuda na uko Yelusalemu!

Vuziiyai magunda mwe shi yoshe!

Biikiai na kughamba,

Kiunganyanyei, tighuukie na kwe mizi yena ughojo!

6 Onyeshai ntangilo kuti mutaita Sayuni!

Ghuukai mukakihonye! Ekai kuhondomaa!

Zumbe Mulungu ataeta ntogho

na ubanasi kuandukia wazu wa kasikazini.

7 Mkomi wa shi azalawa pee uko,

sa shimba ivyelawa ikifishizeho,

azalawa pele mwe hemelo jakwe, kunga aibane shi ya Yuda.

Mizi ya Yuda neighaluke mahuzu,

heiikawe ni mntu yoyoshe.

8 Kwa ivyoho, zwikai shuke za magunia, musigiie na kukema,

kwa kuti Zumbe Mulungu,

akena maya na shi ya Yuda.

9 Zumbe Mulungu aghamba ivi, "Mwe uwo mshi, wazumbe na waambizi wawe newahondomae, wavikizi newaogohe na wateghanyi newamashwe."

10 Nee niheghamba, "Zumbe Mulungu azawalufya wantu wa Yelusalemu! Wawaghambila kuti, mbuli zawe neziite vitana, kumbe hamba ji mwe shingo zawe."

11 Hakizabula, awa wantu hang'we na waja we mwe mzi wa Yelusalemu newaghangwe kuti, "Wantu wangu newafufuntwe ni mpeho yena kiuke yeanduka na kwe vitui vikazu vye mwe ughongo yakunta kuita na kwe wantu wangu. Miya iyo sio mpeho yepuiisha mantu, 12 miya iyo niyeeta imi ni mpeho nkai. Ni miyo Zumbe Mulungu mwewalaha awa wantu."

13 Welela, mnkuu aaiza sa zunde. Magai yakwe ya nkondo ni sa kimbunga, na faashi zakwe zaaghuuka kuzinka ngwiizi. Tahea ishwi! Tizashia kufa!

14 Iwe Yelusalemu, eka uhuza we mwe moyo ywako, kunga muvuniwe. Neufanyanye uhuza mpaka ini?

15 Kwa kuti mtung'wa kulawa Dani na mwelawa mwe miima ya Efulaimu watabiikia mbuli mbada. 16 Waghambilei wantu wa mbali zoshe inu mbuli, biikiai izi mbuli mwe mzi wa Yelusalemu kuti, wankuu waaiza kulawa shi ya hale, waawiikia nkani mzi wa Yuda. 17 Newaudenganyize mzi wa Yelusalemu sa wantu we mwe kiisi, kwa kuti wazanihituka, ayo nee Zumbe Mulungu alongieyo.

18 Mbuli zako na uvyeghoshola nee vikueteevyo ivi. Izo nee ntogho zikubuizezo, welela zaakuja mwe moyo wako.

19 Moyo wangu utapwita pwita!

Naasungudika kwa kuumia!

Sidaha kutongomaa,

naaiva mvumiio wa gunda

na vuzo ja nkondo.

20 Kuna ntogho ulanga ya ntogho,

shi ngima izabanika.

Hemelo jangu jizabanighwa,

vyashitia vyakwe vizatatulwa vihindi hindi.

21 Nenione nkondo mpaka ini

na kuiva vuzo ja magunda?

22 Zumbe Mulungu aghamba ivi, "Wantu wangu ni madashi,

hewanitaila.

Ni wana madashi,

hewana akii.

Ni wantu wetaiya kughoshola uhuza,

hewadaha kughoshola mbuli zedi."

23 Naaiwelela shi, nee ni nkazu na heina kintu chochoshe,

naawelela lwingu, nee jiishina langaila.

24 Naawelela miima, nee ikitingishika,

viima vyoshe nee vitakweta.

25 Nizaweya miya saene mntu yoyoshe,

mpaka madeghe nee yaishiho.

26 Naawelela ija shi yeozoka izagheuka ughongo,

na mizi yakwe yosheni izagheuka mahuzu

kwa mbuli ya maya makai ya Zumbe Mulungu.

27 Zumbe Mulungu aghambile ivi, "Shi ngima neigheuke ughongo, miya seniibane.

28 Kwa ivyoho, shi neisininike

na lwingu nejiituke kiza.

Kwa kuti imi Zumbe Mulungu nizalonga na senibadiishe kanwa changu,

nizalonga na senihituke.

29 Wakiiva vuzo ja wekwea faashi na wetoa maosa,

kia mng'we mwe mzi naaghuuke.

Kung'we newaghuuke na mwe mashafi,

na kung'we newakwee kwe makuungu.

Mizi yoshe neiituke heina wantu,

hekuna mntu ndiye aikale mwe iyo shi.

30 Mzi wa Yelusalemu uzabanighwa!

Kwai wagholokezi wakwe wazwika shuke zeunguika za kizumbe?

Kwai waakihamba mahembo ya zahabu na kukishisha wanja mwe mesho yako?

Kukipamba kwako ni bue!

Wemikunda wazamieka

na wachekunda ni kukukoma."

31 Naaiva kiiyo sa cha mvyee mwekishungua,

vuzo via atakishungua mpaa yakwe.

Nee ni vuzo ja mndee wa Yelusalemu mwehemezuka,

na kunyoosha mikono yakwe akighamba,

"Changu ndicho!

Lelo nafa! Ugima wangu u mwe mikono ya wakomi!"