1 Yelemia ahebinda kuwaghambila wantu mbuli zoshe aaghiizwezo ni Zumbe Mulungu, Mulungu wawe awaghambile, 2 Azalia ng'wana wa Hoshaya na Yohanani ng'wana wa Kalea na wantu woshe wena utii wakamghamba Yelemia, "Iwe ulonga lufyo! Zumbe Mulungu, Mulungu weshu hakuaghiize utighambile kuti tishezaita kweikala Misii. 3 Baluku ng'wana wa Nelia aakushonganya na ishwi utighambile izo mbuli kunga tigwiwe ni Wakalidayo, watikome hambu watiighale Babeli." 4 Ushe Yohanani ng'wana wa Kalea na wagholokezi woshe wa waghojo na wantu wosheni hewamuivile Zumbe Mulungu awaaghiizevyo, wakahimba kuikala mwe shi ya Yuda. 5 Miya Yohanani ng'wana wa Kalea na wagholokezi wosheni wa waghojo, wakawaghua wantu wosheni wa Yuda washighalewo, wauyawo kulawa mwe shi zosheni ndiko waighuukeko nako. 6 Vingi wakawaghua waghoshi woshe na wavyele na wana wa kibwanga na wa kindee hang'we na wana wa kindee wa zumbe waashighwawo ni Nebuzaladani mgholokezi wa waghojo hang'we na Gedalia ng'wana wa Ahikamu, ng'wezukuue ja Shafani vingi wakamghua mteghanyi Yelemia na Baluku ng'wana wa Nelia. 7 Kwa ivyoho wakaita na mwe shi ya Misii, wakabula mwe mzi wa Tahipanesi. Ivyo nee waemelavyo kumuiva Zumbe Mulungu.

8 Waaiuko Tahipanesi, Zumbe Mulungu akamghamba Yelemia, 9 "Ghuwa mawe makulu mangahi ukayashiiye mwe shanga ya kilongo mwe sia izengighweyo kwa matufai he zuvi ja kuingiila mwe kitaa cha zumbe wa Misii uko Tahipanesi. 10 Vikibinda uwaghambile wantu wa Yuda kuti, imi Zumbe Mulungu nena nguvu zoshe, Mulungu wa Izilaeli nenimuete mtung'wa wangu Nebukadineza zumbe wa Babeli, vingi nenichiike kiti chakwe cha uzumbe ulanga ya aya mawe nishiieyo aha, yohe neakime kumbi jakwe ja kizumbe ulanga ya ayo mawe. 11 Zumbe Nebukadineza akizaiza kweitoa shi ya Misii, waja wekundighwa kufa kwa matamu, newafe, neawagwie waja wekundighwa kugwiwa na neawakome waja wekundighwa kufa kwa nkondo. 12 Nenimueke zumbe Nebukadineza aoke nyumba za kuvikila mulungu zeuko Misii, yohe neaighue iyo mulungu yawe na kuiighala Babeli. Neaghue kia kintu kitana mwe shi ya Misii na kuuka bia sungu yoyoshe. 13 Ndai ya nyumba ya mulungu ya zua mwe shi ya Misii, neakinye shiki za miviko na kuoka nyumba za kuvikila mulungu ya Misii."