1 Ghuukai uko na uko mwe mzi wa Yelusalemu,

welelai kia hantu mukionee wenye,

ondezai mwe vyengo vyakwe,

muwelele kati kuna mntu mweghoshola kwa ukweli

kati ahaho, Zumbe Mulungu neauivile mbazi mzi wa Yelusalemu.

2 Hang'we na kuti waalapa, "Sa Zumbe Mulungu avyeishi,"

miya milape yawe ni ya lufyo.

3 Iwe Zumbe Mulungu, kale awelela kweli.

Azamitoa, miya hemuhezie,

azamivaiya miya hemumtegheleze.

Nee muii watii, hemukundie kueka uhuza wenyu.

4 Nee nihetaila kuti, "Awa ni wakiwa, vingi hewana akii.

Hewataila mbuli ntana azekunda Zumbe Mulungu wayaghoshole,

hewataila mulomo wa Mulungu wawe.

5 Kwa ivyoho, neniite kwa wagholokezi,

neimi nenilonge nawo,

kwa kuti waataila mbuli ntana azekunda Zumbe Mulungu waghoshole,

wataila milomo ya Mulungu."

Miya woshe wazaemea ugholokezi wa Zumbe Mulungu

na kumtegheleza.

6 Kwa ivyoho, shimba kulawa mzitui neikunyaghufue,

kui ja tundui nejilawe mwe ughongo jikung'afue.

Shui neiwateghe hehi na mizi yawe.

Mwelawa du neadwishwe vihindi hindi

kwa kuti washindia mhituka Zumbe Mulungu,

mishi yoshe wataeka kumtongela Zumbe Mulungu.

7 Zumbe Mulungu atauza kuti, "Kwai niwaushiize wantu wangu uhuza wawe?

Muzanihituka,

na kuita kweivika mulungu ya lufyo.

Nihewainka nkande, waheighuta

watehimba kuvika mulungu ya lufyo

wakashoshonteana mwe kaya za kughoshoela ukilanga.

8 Ni sa faashi za ngoshi ziighutezo zekunda faashi za fyee,

kia mng'we akimkunda mvyee wa nyiae.

9 Ivi nishewalahe kwa izo mbuli zosheni?

Nisheihiize nkuu kwa wantu wa inu mbali?

Ivyo nee Zumbe Mulungu avyelonga. 10 Neniwaaghiize wankuu waite kwe mbuwa za mizabibu za wantu wangu,

wakaikee miya washeibane.

Neniwaghambile wahadue matambi ya mzabibu,

kwa kuti ayo matambi shiyo yangu imi Zumbe Mulungu.

11 Wantu wa Izilaeli na wantu wa Yuda,

wazanihituka kwei."

Ivyo nee Zumbe Mulungu avyelonga.

12 Wazalonga lufyo kwa mbuli ya Zumbe Mulungu, wakighamba, "Heaghoshole chochoshe, wala hekuna ubada wowoshe welawiya. Hetitoighwe nkondo vingi hetiisiize kushowa nkande." 13 Wateghanyi hewana kintu chochoshe wachelonga miya mbuli zishinazo viugho, kwa kuti hekuna mbuli waghambiweyo ni Zumbe Mulungu. Kwa ivyoho ushe, neviwauiye wenye! 14 Zumbe Mulungu, Mulungu mwena nguvu zoshe aghamba ivi, "Kwa kuti wo wazalonga izo mbuli nikunkiezo iwe Yelemia mwe kanwa chako, neniyagheushe sa moto na awa wantu newahye sa nkuni."

15 Zumbe Mulungu aghamba, inywi wantu wa Izilaeli, nenimietee mbali ng'wenga kulawa hale, iize kwemitoa. Ni mbali ya mavui mangi, na heitaila kudahighwa ni mbali yoyoshe na miongee yawe hemudaha kuiiva. 16 Watoa maosa wawe ni hodali, wakoma bia mbazi. 17 Newaje mbeyu zenyu na nkande zenyu, newawakome wana wenyu wa kibwanga na wa kindee, newachinje mafyo yenyu ya ngoto, ya mbuzi na ya ng'ombe, newaibane mizabibu yenyu na miti yenyu ya mitini. Newaibane mizi yenyu izungushiizweyo wigho muyealila na kukoma wantu weikala umo kwa mamundu yawe.

18 Zumbe Mulungu akaghamba, "Iyo mishi ikizabula, imi senimikome inywi wantu wangu. 19 Wantu wakizamiuza, kwai Zumbe Mulungu lweshu azatighoshoela ivyoho? Iwe neuwaghambe, inywi mwaamueka Zumbe Mulungu, Mulungu wenyu mukavika mulungu mwe shi yenyu. Vivyoho, nemukawatumikile wantu watuhu mwe shi ishiyo yenyu."

20 Zumbe Mulungu aghamba ivi, "Wabiikilei wantu wa chengo cha Yakobo, na wantu wa Yuda muwaghambile ivi, 21 Teghelezai inywi madashi mushinawo akii, muna mesho miya hemuona, muna magutwi miya hemuiva. 22 Imi Zumbe Mulungu nitauza! Kwai hemuniogoha? Kwai hemuzingiiza kwangu? Nizaika mshanga uituke nee mhaka wekindiiza mazi ya bahai kale na kale. Hang'we na kuti mawimbi yaautoa, miya heyadaha kuuzinka, yaaboha, miya heyauzinka. 23 Miya awa wantu wana myoyo ya utii na wehetuka, wazanihituka wakaita zawe. 24 Hewafanyanya mwe myoyo yawe kuti, timuogohei Zumbe Mulungu lweshu, mwetigwishiiza fua za vui na za mashika kwa mishi yakwe, na kutinka majila ya kushuma. 25 Mbuli zenyu mbada na uhuza wenyu uzaeka musheonele mbuli ntana."

26 "Mwe wantu wangu kuna wahuza, wetegha sa vinga ni wantu weteghea madeghe, vingi sa wantu weika mitegho yawe kunga iwagwile wantu. 27 Sa via mkaa avyememeeza mwe ntezu madeghe alashizeyo, nee nyumba zawe zimemievyo vintu vya ubavi. Nee vyeleka wazaituka wantu wetaikana vingi wana kiiko, 28 wazagimbaa na kudodomoka. Hewana mihaka kwe kughoshola mbuli mbada, hewawaambiza wafiiwewo ni waishe zawe na wanine zawe kuinkwa chewataa, wala hewawavunia wakiwa kwa ukweli."

29 "Kweli nishewalahe kwa izi mbuli? Nenieke zeze kulaha mbali ya wantu sa awa? 30 Mbuli yemasha na kuihiza izalawiya mwe inu shi, 31 wateghanyi wateghanya mbuli za lufyo, wavikizi wohena wagholokela sa wavyekunda wenye, na wantu ywangu wazaivana navyo. Miya bontokelo jikizabula nemutendeze?"