1 Zumbe Mulungu aanighambila ivi, "Hita ukaghule msipi wa shuke yeng'aa, ukikante mwe kighwidi, miya usheugee mwe mazi." 2 Kwa ivyoho, nikaita kweghula uwo msipi wa shuke yeng'aa sa Zumbe Mulungu aniaghiizevyo, nikakikanta mwe kighwidi. 3 Vikibinda, mbuli ya Zumbe Mulungu ikaniizia kambii ikighamba, 4 "Ughue uwo msipi ughuliewo ukakikanta mwe kighwidi, uite Fulati ukaufishe uwo msipi mwe mpanga." 5 Kwa ivyoho, nikaita na kuufisha uwo msipi hehi na Fulati, sa Zumbe Mulungu anighambilevyo.

6 Mishi mingi ihezinka, Zumbe Mulungu atenighambila kuti, "Hita Fulati, ukaughue uja msipi nakuaghiizayo ukaufishe uko. 7 Nee niheita Fulati, nikafuka na kuulavya uja msipi haja hantu naufishaho. Niheulavya, uzabanika na heutama vingi."

8 Zumbe Mulungu akanighambila vingi, 9 "Ichi uenecho mwe uwo msipi nee bontokeo ja kibui cha wantu wa Yuda na kibui kikulu cha wantu wa Yelusalemu. 10 Awa wantu wahuza washikundawo kutegheleza mbuli zangu, miya watatongela utii we mwe myoyo yawe, wataita kwe mulungu mituhu kunga kuitumikila na kuivika, newaituke sa unu msipi ubanikewo. 11 Sa via msipi uvyetozana na kighwidi cha mntu, nee nikishungilevyo wantu wa Izilaeli na wantu wa Yuda, kunga wataikane kwa zina jangu, wanitogole na kunigimbika, miya wo hewanitegheleze." Ni miyo Zumbe Mulungu nilongiewo.

12 Zumbe Mulungu, Mulungu wa Izilaeli, aanighambia ivi, "Waghambile wantu wa Izilaeli kuti, kia mfuko wa babu neumeezwe divai. Miya ukizawaghambila ivyoho, wohe newakuhise ivi, ‘Ughambile ishwi hetitaila kuti kia mfuko wa babu ukundighwa umemeezwe divai?’ 13 Nawe neuwaghambile kuti, Zumbe Mulungu aghamba ivi, neniwainke divai wantu wosheni weikala mwe inu shi mpaka watengee, wazumbe wegholokela bumba ja Daudi, wavikizi na wateghanyi wangu na wantu woshe wa Yelusalemu. 14 Neniwashonganye wenye kwa wenye, wana na waishe zawe. Seniwaeke, seniwaivile mbazi na kuwaushiiza miya neniwakome."

15 Teghelezai vitana inywi wantu wa Izilaeli,

musheituke na mahiku, Zumbe Mulungu akilonga na inywi.

16 Mgimbikei Zumbe Mulungu, Mulungu wenyu,

aishizati kumietea kiza,

muishizati kukitoa miundi yenyu mwe miima yena kiza.

Inywi mualila langaila, miya ye neajighalusha kiza kikulu

ndicho chimigee usoyoyo.

17 Miya kati mukishenitegheleza,

nenikemee mwe moyo,

kwa kusheiva kwenyu.

Nenikeme kwa ukiwa na kuitikwa ni meshozi, kwa kuti wantu wa Zumbe Mulungu wazaighawa kwe utung'wa.

18 Zumbe Mulungu akanighamba ivi, "Mghambile zumbe na nine yakwe, ‘Ukai mwe viti vyenyu vya uzumbe, kwa kuti linga zenyu ntana nezigwe mwe mitwi yawe.’ 19 Mizi ya wazu wa kusini ya Yuda izadengwa ni wankuu, hekuna mwedaha kuwazinka na kuwabuiza weumo ndai ya iyo mizi. Wantu wosheni wa Yuda wazagwiwa, wazaighalwa na mwe shi ya ugheni."

20 Inuiya mesho yako iwe Yelusalemu uwelele! Wankuu wako waaiza kulawiya wazu wa kasikazini! Wakuhi wantu uinkighwewo uwawelele? Wabuzighwe ni mbwai waja wantu wa Yuda wakikombawo nawo? 21 Neughambe zeze Zumbe Mulungu akizakuikia waja wantu ndiwo uihang'we nawo sa wambuya wako, wakizakudaha na kukugholokela? Ivi heukiive sa mvyee mwekishungua avyekiiva? 22 Na iwe neukiuze mwe moyo wako kuti, "Kwai nizabulwa ni izi mbuli?" Zilawie kwa mbuli ya uhuza wako wiisizewo, nee vyeleka wankuu wako wazatatua shuke za wavyee wako, wakawakungumiza wagone nawo. 23 Ivi mntu mwechuta aadaha kukihitua langi yakwe, hambu shui yaadaha kuhitua madoa yakwe? Vivyoivyo, inywi mutailewo kughoshola uhuza hemudahe kughoshola mbuli ntana. 24 Zumbe Mulungu aghamba ivi, nenimiasakanye sa mantu yeinuiwa ni mpeho kulawa kwe ughongo. 25 Ivyo nee ndivyo vimilawiye, imi Zumbe Mulungu nifanyanye kumighoshoela ivyoho, kwa kuti muzanijaa imi mukaalila mulungu ya lufyo. 26 Nenikuzue shuke yako mpaka mwe mtwi, uingiwe ni shoni. 27 Nizaona ughoshola mbuli zeniihiza. Nizaona ukitongela mulungu ya kigheni mwe miima na mwe mbuwa, sa mvyee ashiye mkweli kwa muume. Chenyu ndicho inywi wantu wa Yelusalemu! Nemughoshole izi mbuli mpaka ini?