1 Sedekia ashaghulwa aituke zumbe akiituka na mavui miongo mii na ng'wenga. Agholokela kwa mavui muongo mng'we na ng'wenga uko Yelusalemu. Zina ja nine akwe nee ni Hamutali ng'wana wa Yelemia mtuhu, mweandukia mwe mzi wa Libuna. 2 Akaghoshola uhuza mwe mesho ya Zumbe Mulungu, sa uhuza woshe aghosholewo Yehoyakimu. 3 Zumbe Mulungu akawaihiwa wantu wa Yelusalemu na wa Yuda, vikibinda akawaghuusha mwe mesho yakwe.

Sedekia akamhituka zumbe wa Babeli. 4 Kwa ivyoho, mwe mshi wa kumi wa ng'wezi wa kumi, vui ja kenda ja ugholokezi wa Sedekia, Nebukadineza zumbe wa Babeli akaita na waghojo wakwe woshe mwe mzi wa Yelusalemu, wakaumbika shanga mwe ukando kunga kughoshola vidanto vya kukweea waingile ndai ya mzi na kuudenga kia hantu. Wakaika makumbi se ya mzi na kuudenga. 5 Wakaisiiza kuudenga mzi mpaka vui ja kumi na ng'wenga ja ugholokezi wa Sedekia. 6 Uhebula mshi wa kenda mwe ng'wezi wa ne mwe vui jijo ijo, saa ikahimba mwe mzi na nee kuishina nkande. 7 Vikibinda ukando wa mzi ukabondwa na waghojo wosheni wakaghuuka. Wakalawa mwe mzi nakio kwa kuzinkia mwe uvi ndiwo uigati ya nkando mbii hehi na kabuwa ka zumbe, hang'we na kuti Wakalidayo nee waidenganyize mzi mgima. Wakaghuuka kuita kwe koongo ja mto Yolidani. 8 Miya waghojo wa Wakalidayo wakambasha zumbe Sedekia na wakamgwiya kushinako miima kwa Yeliko. Waghojo wakwe woshe wakaasakana wakamueka. 9 Wakalidayo wakamgwia zumbe Sedekia na kumuighala kwa zumbe wa Babeli uko Libula mwe shi ya Hamasi, yohe akamlaha. 10 Uko Libula, zumbe wa Babeli akawachinja wana wa Sedekia mwe mesho ya ishe awe, vikibinda akawakoma wagholokezi woshe wa Yuda. 11 Vikibinda, akamnkunta zumbe Sedekia mesho, akamshunga mpingu za shaba na kumzughiya mwe geeza uko Babeli mpaka mshi ahefa.

12 Mshi wa muongo mng'we wa ng'wezi wa shano, mwe vui ja muongo mng'we na kenda ja ugholokezi wa Nebukadineza zumbe wa Babeli, Nebuzaladani mkulu wa waghojo ndiye akimnka zumbe vinyanyi, amtumikileye zumbe wa Babeli, akaiza Yelusalemu, 13 akaoka nyumba ya Zumbe Mulungu na zumba ja kizumbe na nyumba nkulu zosheni za wantu wa Yelusalemu. 14 Waghojo woshe wa Wakalidayo ndiwo wai hang'we na Nebuzaladani mkulu wa waghojo wa zumbe, wakagandua nkando zoshe zeuzunguuka mzi wa Yelusalemu. 15 Nebuzaladani akawaighala kwe shi ya ugheni wantu wagheke waisiizewo kuituka wakiwa na waja washighalewo mwe mzi hang'we na wantu wakiighalewo wenye kwa zumbe wa Babeli na watalizi. 16 Miya Nebuzaladani akaeka waja wantu wakiwa waisiizewo, waikale mwe shi waime na kuwelela mizabibu.

17 Waghojo wa Wakalidayo wakabonda shiki ja shaba yechuta ndijo jii mwe nyumba ya Zumbe Mulungu, viikaiyo hang'we na igha kulu ja shaba ndijo jiimwe nyumba ya Zumbe Mulungu, wakaighua shaba yoshe yechuta wakaiighala Babeli. 18 Vingi wakaghua vizungu na makoleo na mikasi na mabakui na mabesei hang'we na ntanu zosheni za shaba yechuta ndizo zikighoshoela ndima mwe nyumba ya Zumbe Mulungu. 19 Vingi Nebuzaladamu akaghua vibakui na vyetezo vya kuokela ubani na mabakui na viengo na sahani na mabakui ya kuikila ntogoo za vyanywa. Ivyo vintu vyoshe vighosholwe kwa madini ya zahabu ntana na madini yeghosholea hea. 20 Vintu vya shaba vyaghosholwavyo ni zumbe Selemani kwa mbuli ya Zumbe Mulungu nee ni mashiki maili na igha ing'we kulu ja mazi na vinyago vya nkambaku muongo mng'we na mbii vya shaba ndivyo ziishi ya ijo igha kulu ndijo jikizwama. 21 Kia shiki nee jiina utai wa meta mnane, mzunguuko wakwe nee ni meta shano na nusu, upana wakwe nee ni meta shano na lobo na yosheni nee yaing'wazi kwa ndai. 22 Ulanga ya kia shiki nee kuina kichwa cha shaba yechuta, chena utai wa meta mbii na sentimeta miongo mii. Kia kichwa cha jia shiki nee chiizungushizwe mahembo ya wavu na makomamanga yoshe nee ni ya shaba yechuta. 23 Makomamanga ndiyo yakionekea nee ni miongo kenda na mtandatu nkandai ya ayo mashiki. Makomamanga yoshe nee ni gana ing'we na mahembo nkandai yakwe.

24 Vikibinda Nebuzaladani mkulu wa waghojo mwemnka zumbe viugho, aamgwiya Selaya mvikizi mkulu na mvikizi Sefania mwetongela mwe ufung'wa hang'we na waghojo watatu wa nyuvi. 25 Mwe waja wantu ndiwo waishighale mwe mzi, akamghuwa mkulu wa waghojo wa Yuda hang'we na wantu wetaikana miongo mtandatu ndiwo wakimnka zumbe vinyanyi awabuizewo Yelusalemu. 26 Nebuzaladani mkulu wa waghojo wa zumbe mwemnka zumbe vinyanyi, akawaghua awo wantu akawaighala kwa zumbe wa Babeli uko Libula. 27 Zumbe Nebukadineza wa Babeli akawalaha awo wantu wakong'we kwe mzi wa Libula mwe shi ya Hamasi.

Kwa ivyoho wantu wa Yuda wakaighawa kwe shi ya ugheni hale na shi yawe. 28 Awa nee wantu waighawawo kwe shi ya ugheni ni Nebukadineza zumbe wa Babeli mwe vui ja mfungate ja ugholokezi wakwe, aghua Wayahudi elufu ntatu na miongo mii na ntatu. 29 Mwe vui ja muongo mng'we na mnane ja ugholokezi wakwe, aghua wantu magana mnane na miongo mitatu na mbii kulawa Yelusalemu. 30 Mwe vui ja miongo mii na ntatu ja ugholokezi wa Nebukadineza, Nebuzaladani mkulu wa waghojo na mwemnka zumbe vinyanyi, aighala Wayahudi magana mfungate na miongo mine na shano kwe shi ya ugheni. Wantu woshe waghuighwawo nee ni elufu ne na magana mtandatu.

31 Mwe vui ja miongo mitatu na mfungate kuanduka Yehoyakini zumbe wa Yuda aighawe kwe shi ya ugheni, mshi wa miongo mii na shano wa ng'wezi wa muongo mng'we na mbii, Evili Melodaki zumbe wa Babeli, mwe vui jiajia ai zumbe akamuekea Yehoyakimu zumbe wa Yuda ndiye aizughaiwe. 32 Zumbe Evili Melodaki akalonga na Yehoyakini kwa uhozu na kumnka ishima nkulu kuzinka waja wazumbe watuhu woshe ndiwo aina nawo uko Babeli kwe shi ya ugheni. 33 Kwa ivyoho, Evili Melodaki zumbe wa Babeli akamnka Yehoyakini shuke za kuzwika akamueka aje naye nkande mishi yakwe yoshe. 34 Kia mshi Evili Melodaki zumbe wa Babeli nee akimnka Yehoyakini hea aghule achekunda. Aghoshole ivyoho mpaka mushi ahefa.