1 Zumbe Mulungu aghamba ivi, "Inywi wantu wa Yuda uhuza wenyu ni kintu chemwe maisha yenyu, sa via mntu azigondieye mwe myoyo yenyu na mwe mpembe za hantu halaviiza ntogoo sa via mntu avyeghua patasi ya chuma yena uhembo mgumu na kuzigonda mwe mawe. 2 Hata wana wenyu waafukila hantu hawe hakulaviiza ntogoo na vigiingi vya mulungu wa kivyee mweitangwa Ashela viikighwevyo ulanga ya miti itivieyo na mwe vitui vya miima, 3 na mwe miima ye mwe nyika. Neniwaeke wankuu wenyu waghue mai zenyu na kiiko chenyu choshe kwa mbuli ya uhuza wenyu mughosholewo mwe shi ngima. 4 Nemuiyeke shi yenyu niminkileyo kwa mbuli ya ubada wenyu mughosholewo, nenimighalushe watung'wa kwa wankuu wenyu mwe shi mushitailayo, kwa kuti nizakwewa ni maya yashishiayo kale na kale."

5 Zumbe Mulungu aghamba ivi,

"Ana ute uja mwemualila mntu,

mntu mwealila nguvu za mntu,

mntu mwenieka imi Zumbe Mulungu.

6 Uyo ni sa shafi je mwe ughongo,

heaone mbuli ntana zikilawiya.

Neaikale hantu hakazu,

mwe shi yena munyu ishiikalwayo ni wantu."

7 "Miya nenimng'aze mesho mntu mwenialila imi Zumbe Mulungu,

mntu mwetaila kuti imi Zumbe Mulungu ike du ni miyo wakualilwa.

8 Uyo mntu ni sa mti uhandighwewo hehi na mto,

weighaa mazindo yakwe na mwe mazi.

Mishi ya zua ikibula heuwogoha

na mahungo yakwe heyakaaghaa.

Heuwone wogha mwe vui jishinajo fua

na heuweke kuavya matunda."

9 "Moyo wa mntu una lufyo kushima vintu vyoshe,

ni mbada kuisiiza,

ni ndai mwedaha kuutaila?

10 Imi Zumbe Mulungu niwelela moyo wa mntu

na kuzigea mwe mighezo fanyanyi za wantu

na kumliha kia mng'we kuighana na avyeikala,

na avyeghoshola."

11 Mntu mwena mai ashiondiezo kwa ukweli,

ni sa nkwae yeangua matagi yataghighweyo ni ng'wiae.

Nezezishiye du mwe mishi ya ubwanga wakwe

neaingiwe ni shoni kwa udashi wakwe.

12 Kapee jeshu, ni sa kiti cha uzumbe chigimbikwecho,

chiikighwecho ulanga ya muima, kuanduka aho boosi.

13 Zumbe Mulungu, mwealilwa ni Waizilaeli,

wosheni wekuemela newaingiwe ni shoni.

Waja wekueka iwe newaaghe sa mazina yagondighweyo mwe shanga,

kwa kuti wazakueka iwe Zumbe Mulungu,

shoko za mazi ya ugima.

14 Iwe Zumbe Mulungu, kesa unihonye nami nenihone, uniambize nami neniikale vitana, kwa kuti, nikugimbika iwe!

15 Welela wantu wataniuza, "Zikuhi mbuli alongiezo Zumbe Mulungu? Eka du ushe zitibule!"

16 Zumbe Mulungu, waanishaghula imi nighoshole ndima ya ulishi naimi siemee. Waataila kuti sakundie mshi wa ntogho uwawalawiye awa wantu wako. Iwe ng'wenye waataila mbuli nalongaeyo kwa wantu wako. 17 Ushenigee wogha, kwa kuti nikualila iwe mwe mishi ya ntogho. 18 Wagee shoni wankuu wangu, miya imi ushenieke niingiwe ni shoni. Awo wantu wabulwe ni wogha, miya imi ushenieke nibulwe wogha. Uwaetee mshi wa ntogho, wafe vigima.

19 Zumbe Mulungu aanighamba ivi, "Hita ukagholoke mwe zuvi ja mzi wa Yelusalemu, waheingila na kulawiya wazumbe wa Yuda. Vingi ukagholoke kwe nyuvi ntuhu za mzi wa Yelusalemu. 20 Waghambile, ‘Teghelezai mbuli ya Zumbe Mulungu inywi wazumbe wa Yuda na inywi wantu wa Yuda na wa Yelusalemu mweingila mwe iji zuvi. 21 Kati mwaakunda ugima wenyu, mushezainua mzigho wowoshe mshi wa Sabato na mushezaaghiiza mzigho kuzinkia mwe zuvi ja mzi wa Yelusalemu. 22 Mushelavye mzigho wowoshe mwe nyumba zenyu na musheghoshole ndima mshi wa kuhema. Muufukile mshi wa kuhema sa mshi wa kumvika Zumbe Mulungu du sa via nawaghambilavyo baba zenyu. 23 Miya baba zenyu hewanitegheleze wala kuniiva, wakaemela kutegheleza na kughoshola mbuli nizewaghambila.’ "

24 "Miya mukinitegheleza imi Zumbe Mulungu, mukaeka kuzisa mizigho mwe nyuvi za unu mzi mshi wa kuhema na kueka kughoshola ndima, miya mukaughoshola uituke mshi wa kunivika imi du, 25 nee ndiho wazumbe na wana wa wazumbe wemtongela zumbe Daudi mwe ufung'wa wakwe, hang'we na wantu wa Yuda na wantu wa Yelusalemu, newaingile kwa kuzinkia nyuvi za unu mzi, wakiituka waikwezie mwe faashi na mwe magai ya nkondo. Unu mzi hezeushiwe ni wantu. 26 Wantu newaize kulawa mwe mizi ya Yuda na mwe mizi yehakana na mzi wa Yelusalemu, wakilawiya mwe shi ya Benjamini, na shi ya viima vye wazu zua jikwegongookea, shi ya miima na wazu wa kusini ya Yuda. Newaete ntogoo za kuoka na ntogoo za kughubikia uhuza, ntogoo za nkande na ubani wena mhempe mtana, hang'we na ntogoo za kutogola mwe nyumba ya Zumbe Mulungu. 27 Miya mukishenitegheleza na kuughoshola mshi wa kuhema sa mshi wa kunivika imi du, mukisheeka kuinua mizigho na kuzinka nayo mwe nyuvi za mzi wa Yelusalemu mshi wa kuhema, kwa ivyoho, neniashe moto uwoke nyuvi zoshe za mzi wa Yelusalemu na mazumba yosheni ya kizumbe na hekuna ndiye auzime."