1 "Zumbe Mulungu iwe u Mulungu ushinaye masa,

nikieta masa yangu kwako,

miya nikunda nikuuze kwa mbuli ya uvyelaha kwa ukweli,

kwai wahuza mbuli zawe zawaitila vitana?

Kwai wena lufyo waaonea?

2 Uzawahanda wohena wazalawa,

waakua na kuvyaa matunda.

Kia mshi waakuanga mwe vyanwa yawe,

miya myoyo yawe i hale na iwe.

3 Miya iwe Zumbe Mulungu waanitaila,

waaniona na kuwelela fanyanyi zangu kwa mbuli yako.

Uwabuute wahuza sa ngoto zeighawa kwechinjwa,

wagholokele mpaka mshi ya kufa kwawe ubule.

4 Shanga neikasaghae mpaka ini

na kunyuuka kwa mani yoshe mwe mbuwa nekushie ini?

Vizama na madeghe vitashiya kufa

kwa mbuli ya uhuza wa wantu weikala mwe iyo shi,

wataghamba, ‘Zumbe Mulungu haona tivyeghoshola.’ "

5 Zumbe Mulungu aghamba ivi,

"Kati uzaeng'wa kuhimana na wejata kwa miundi wakakudaha,

neudahe zeze kuhimana na weghuuka kwa faashi?

Kati wakitoa hantu hashinaho kintu cha kukukinya,

neudahe zeze kughuuka kwe mashafi ya nkanda ya mto Yolidani?

6 Wandughu wako na wantu wa mbuya yako, wazakuhituka,

wazavungana kunga wakuetee nkumbizi.

Ushewaamini, hata kati wakughambila mbuli zedi."

7 Zumbe Mulungu aghamba ivi,

"Nizatana na wantu ywangu wa Izilaeli,

nizaiemela mbali ya wantu wangu nishaghuleyo,

nizawainkia wantu ywangu niwekunda,

wagholokewe ni wankuu wawe.

8 Wantu ywangu nishaghulewo wazanihituka,

wazaituka sa shimba ze mzitui,

wazanigumiya,

nee vyeleka naawaihiwa.

9 Wantu ywangu nishaghulewo wazaituka sa kimpanga ama sa ngugwa watanitoa nkondo

na madeghe matuhu yatewadenganyiza na kuwadomonya.

Waeke wantu wa mbali zoshe wakiunganye hang'we sa vizama vikai vya tundui

waize kwewakoma awa wantu niweitanga wantu wangu.

10 Wagholokezi wangi wa kigheni wazabana ubuwa wangu wa mizabibu

na wazazijatajata mbuwa zangu

na wazaighalusha ughongo shanga yangu yenitamila.

11 Wazaieka bue,

hekuna chochoshe cheozoka umo.

Shi ngima izaghaluka ughongo,

kwa kuti hekuna mntu yoyoshe mweiwelela.

12 Mwe vitui vya miima yoshe ye mwe ughongo,

wankuu wazaiza kwetikoma.

Mundu jangu jaazinka kwebana wantu weikala mwe shi kia hantu,

hekuna mweikala kwa nyemi.

13 Wazahanda ngano miya newaonee mahosha,

wazakihima kughoshola ndima miya hewaonee kintu.

Kwa ivyoho mbeyu zawe hezitame,

kwa mbuli ya maya yangu."

14 Zumbe Mulungu aghamba ivi, "Kwa mbuli ya wantu wabada wabanio shi niwainkileyo wantu wangu wa Izilaeli, neniwaushe wantu wa izo mbali mwe shi zawe sa mntu avyenkunta mbeyu, nee ndiho neniwalavye wantu wa Yuda kwawe kunga washegholokewe ni awo wantu wa izo mbali. 15 Nikiwausha pee, neniwaivile mbazi vingi kia wantu neniiuze na hantu hawe na mwe shi zakwe. 16 Sa via wawahinyizevyo wantu wangu kughoshola mlape kwa zina ja mulungu Baali, wakikihinya sia za wantu wangu kwa moyo woshe na kulapa kwa zina jangu wakighamba, ‘Sa Zumbe Mulungu avyeishi,’ nee ndiho waonee hang'we na wantu wangu. 17 Miya mbali yoyoshe ishiniteghelezayo na kuniiva, neniiushe na kuibana vigima. Imi Zumbe Mulungu nizalonga."