1 Izi nee mbuli Zumbe Mulungu anighambilazo imi Yelemia kwa mbuli za kukasaghaa,

2 "Wantu wa Yuda watasininika

na mizi yakwe itabanika,

wantu wakwe watadongooka mwe shanga kwa ukiwa

na nkoo za wantu wa Yelusalemu zizaisiiza.

3 Wena kiiko watawaaghiiza wandima wawe mazi,

wandima wataita kwe vishima,

miya hewaonea mazi,

watauza maigha yawe bue.

Wataingiwa ni wogha na kufighwa ni myoyo,

wataghubika mitwi yawe.

4 Shanga izaatuka, kwa kuti fua heigwee, waimi watagea mbazi na wataghubika mitwi yawe,

kwa ivyo shanga ikaaghalevyo.

5 Mpee zitanyiika madondwe yawe,

kwa kuti hekuna mani.

6 Mpunda za mzitui zitagholoka mwe vitui vikazu,

zitahemezuka sa mbweha kwa kushoa hewa,

mesho yawe heyaona vitana,

kwa kushoa mani.

7 Wantu wangu wataniiya wakighamba,

‘Hang'we na kuti uhuza yweshu waatilaha,

iwe Zumbe Mulungu taaombeza utiambize sa utighambilevyo.

Tizaisiiza kukuhituka,

tizakughoshoela uhuza.

8 Ni weyo du kialilo cha Waizilaeli,

umvunizi yweshu mwe mishi ya ntogho.

Kwai u sa mgheni mwe shi yeshu,

sa mntambo mweonda gono ja kio king'we?

9 Uituke zeze sa mntu mwemashwa ni mbuli ashialileyo,

hambu sa mghojo ashidahae kuvunia mntu?

Miya iwe Zumbe Mulungu uhang'we na ishwi!

Ishwi ti wantu lwako, ushetieke.’ "

10 Zumbe Mulungu aghamba ivi kwa mbuli ya awa wantu, "Kweli waakundisha kuikala hale na imi, hewafanyanya. Kwa ivyoho hewanitamila imi Zumbe Mulungu. Nenifukile mbuli zawe mbada na kuwatoa kwa mbuli ya uhuza wawe."

11 Zumbe Mulungu aanighambila ivi, "Ushewaombezeze awa wantu uwambizi. 12 Hata wakifunga, senitegheleze mviko wawe, wakinilaviiza ntogoo za kuoka na ntogoo za mbeyu, senizihokele. Miya neniwakome kwa uhamba, saa na kwa matamu."

13 Nee niheghamba, "Zumbe Mulungu mwena ufung'wa woshe, waataila kuti wateghanyi watawaghambila awa wantu kuti, hekuituke na nkondo wala saa, kwa kuti uzaika kilagha kuti, mwe shi yeshu nekuituke na mpolele du."

14 Zumbe Mulungu akanighambila, "Awo wateghanyi walonga lufyo kwa zina jangu. Imi siwashaghule, silongie nawo wala siwaghiize. Wateghanya mbuli za lufyo na ughanga ushiambizawo chochoshe na mbuli zeanduka mwe fanyanyi zawe wenye. 15 Ushe, imi Zumbe Mulungu naghamba ivi, ‘Kwa mbuli ya awo wateghanyi weteghanya lufyo kwa zina jangu, kwa kuti siwaaghiize, miya wo wataghamba kuti hekulawiye nkondo na saa mwe inu shi, neniwakome kwa mundu na saa. 16 Na awo wantu wateghanyiizwewo izo mbuli, newaashighwe na se mwe baabaa za Yelusalemu wakiituka waifiie kwa saa na kwa nkondo, hekuituke na mntu wa kuwazika wo wenye, wavyee wawe na wana wawe wa kibwanga na wa kindee, kwa kuti imi neniwaihiize kwa mbuli ya uhuza wawe wenye.’ "

17 Zumbe Mulungu aanighamba niwaghambile wantu kwa mbuli ya usoyoyo niwena nawo kwawe,

"Nenga mesho yangu yateikiza meshozi kio na mshii,

yasheeke kulawa,

kwa kuti wantu ywangu wazaisiiza kuumizwa,

wazabulwa ni maonda makulu.

18 Nikiita nkoi,

niona mii ya wantu wafiiewo kwe nkondo,

nikiingila mwe mizi,

niona watafa kwa saa.

Wateghanyi na wavikizi wawelela mbuli zawe,

hewataila wacheghoshola."

19 Zumbe Mulungu, utewaemela vigima wantu wa Yuda?

Ivi wawaihiwa wantu wa Yelusalemu?

Kwai uzatiumiza ivihi,

mpaka vionda vitaema kuhona?

Tialile nyemi, miya hetionee mbuli ntana yoyoshe,

tialile kuhona, miya tihee du kugewa wogha.

20 Kweli tizakughoshoela uhuza iwe Zumbe Mulungu,

taavoteka kwa mbuli ya ubada weshu

na masa ya baba zeshu.

21 Ushetieke kwa mbuli ya ishima yako,

usheubee mzi wa Yelusalemu,

hambu nee kiti chako cha uzumbe chiiho.

Ushebane kilagha chako waikacho na ishwi.

22 Ivi mulungu ya lufyo ya mbali ntuhu yaadaha kutietea fua?

Ivi zunde jaadaha kusheeza madodwe?

Doo! Ni weyo ike du Zumbe Mulungu, Mulungu yweshu, tiyekualila,

kwa kuti ni weyo mweghoshola izi mbuli zoshe.