1 Zumbe wa Misii aishizati kuitoa Gaza, Zumbe Mulungu akalonga na Yelemia kwa mbuli ya Wafilisiti. 2 Akaghamba ivi,

"Welela ivyo mazi yavyekwea kulawa wazu wa kasikazini

na yataituka mafuliko yena nguvu,

neyaighubike shi ngima na vintu vyoshe vyeumo,

mizi na wantu weikala umo.

Wantu newaiye,

woshe weikala mwe shi newasininike.

3 Newaive shindo za nkwato za faashi,

vuzo ja magai ya nkondo

na shindo za mataili yawe.

Waghoshi hewahituke mghongo kuwaambiza wana wawe,

mikono yawe neiyegheeke.

4 Mushi wa kuwakoma Wafilisiti woshe uzabula,

na kuwakoma wantu woshe washighalewo,

waja ambawo wangeiza kweiambiza mizi ya Tilo na Sidoni.

Imi Zumbe Mulungu neniwakoma Wafilisiti woshe,

awa waizilewo kulawa sheja ya kisiwa cha Kafutoli.

5 Wantu wa Gaza newamoe vinoo kunga wasininike,

mzi wawe wa Ashikeloni neuhoe.

Inywi wantu mushighalewo kulawa sheja ya bahai ya Meditelania, nemukishengeshenge kwa kusininika mpaka ini?

6 Wafilisiti wataghamba, ‘Zumbe Mulungu!

Neuwahaze ini wankuu weshu waeke kutikoma kwa mahamba yawe?

Waghambe wauze mahamba yawe na mwe maala yawe,

wayaike mahamba yawe yaheme!’

7 Miya ayo mahamba neyadahe zeze kuhema,

kunu imi Zumbe Mulungu niiyainkile ndima ya kughoshola?

Niiyaaghiize yautoe mzi wa Ashikeloni

na wantu weikala sheja ya bahai."