1 Mbuli ya Zumbe Mulungu yaamuizila Yelemia mwe vui ja muongo mng'we ja ugholokezi wa Sedekia zumbe wa Yuda, ndijo jii vui ja muongo mng'we na mnane ja ugholokezi wa Nebukadineza zumbe wa Babeli. 2 Mishi iyo, waghojo wa zumbe wa Babeli nee wakiudenga na kuutoa mzi wa Yelusalemu, mteghanyi Yelemia yohe nee aishungighwe mwe ukomea wa waghojo we ndai ya kitaa cha zumbe wa Yuda. 3 Sedekia zumbe wa Yuda nee aimzughaiye Yelemia akighamba, "Kwai waateghanya na kughamba kuti Zumbe Mulungu azaghamba neauweke unu mzi ughuighwe ni zumbe wa Babeli, yohe neaughue kwa nguvu 4 na Sedekia zumbe wa Yuda, headahe kuwasupuuka mwe mikono ya Wakalidayo, miya neagwiwe aighawe kwa zumbe wa Babeli, yohe neamuone kwa mesho yakwe na kushimoea naye. 5 Sedekia neaighawe mpaka Babeli, yohe neaikale uko mpaka ndiho nimlahe. Hata kati Sedekia neatoane na Wakalidayo, heawadahe."

6 Yelemia akiituka aizughaiwe mbuli ya Zumbe Mulungu ikamuizila ikighamba, 7 "Hanameli ng'wana wa isho ako mdodo Shalumu, neakubashe na kukughamba ughule ubuwa wakwe we uko Anasosi, kwa kuti iwe u mndughu wakwe, waadaha kuughula." 8 Vikibinda Hanameli akanibasha mwe ukomea wa waghojo sa Zumbe Mulungu anighambilevyo, akanighamba nighule ubuwa wakwe weuko Anasosi mwe shi ya Benjamini kwa kuti ni miyo nekundighwa kuughula. Nee nihetaila kuti kweli iyo nee ni mbuli ya Zumbe Mulungu. 9 Kwa ivyoho, nikaughula uja ubuwa we uko Anasosi, kulawa kwa Hanameli ng'wana mtumba, nikamnka vihindi muongo mng'we na mfungate vya madini ya kughoshoela hea. 10 Nikaika unyindi mwe kaatasi jeonyesha kuti nizaughula uwo ubuwa, nikawaitanga waona na kuviighanya via vihindi vya madini ya kughoshoela hea mwe mizani. 11 Nikajighua jia kaatasi nigeziejo unyindi jeonyesha kuti nizaughula uwo ubuwa, jena mashaliti na maivano, hang'we na kaatasi tuhu jishinajo unyindi. 12 Nikamnka jia kaatasi jeonyesha kuti nizaughula uwo ubuwa Baluku ng'wana wa Nelia ng'wezukuue ja Maaseya, mwe mesho ya Hanameli ng'wana mtumba na waona wageziewo unyindi mwe ijo kaatasi na mwe mesho ya Wayahudi woshe ndiwo waiikale mwe ukomea wa waghojo. 13 Nikamghamba Baluku mwe mesho ya awo wantu woshe kuti, 14 "Zumbe Mulungu mwena nguvu zoshe, Mulungu wa Izilaeli, aakughamba kuti ughue aya makaatasi yosheni maili, kaatasi jigezighwejo unyindi jeonyesha kuti nizaughula uwo ubuwa na iji tuhu jishigezighwejo unyindi, uyagee mwe nyungu kunga yaikale kwa mishi mingi. 15 Kwa kuti Zumbe Mulungu mwena nguvu zoshe, Mulungu wa Izilaeli, aakughamba kuti, zia nyumba na mbuwa hang'we na mbuwa za mizabibu ze mwe inu shi, nezighulwe vingi."

16 Nihebinda kumnka Baluki ng'wana wa Nelia, kaatasi jeonyesha kuti nizaughula uwo ubuwa, nikamvika Zumbe Mulungu nikighamba, 17 "Iwe Zumbe Mulungu kwa nguvu zako nyingi na kwa kudaha kwako, uzaumba lwingu na shi, hekuna mbuli ushidahayo. 18 Iwe uzaonyesha lukundisho lwako kwa wantu wangi, miya vingi waawatoa wana kwa mbuli ya uhuza wa wavyazi wawe. Iwe u Mulungu mkulu mwena nguvu, Zumbe Mulungu mwena nguvu zoshe nee zina jako. 19 Fanyanyi zako ni za viugho na mbuli zako ni nkulu, mbuli za wantu wosheni waazitaila, umuliha kia mng'we kuighana na mbuli zakwe azeghoshola. 20 Aho kale waaghoshola vimaka na mbuli zemasha mwe shi ya Misii, na waahimba kughoshola mpaka lelo kwa Waizilaeli na kwa wantu wa mbali zoshe, mbuli ikuekileyo utaikane kia hantu. 21 Waawalavya wantu wako wa Izilaeli kulawa mwe shi Misii kwa ntangilo na vimaka, kwa nguvu zako nyingi, kwa kudaha kwako na kwa kugeza wogha kuisiizeko. 22 Uzawainka inu shi waikayo kilagha na baba zawe kuti neuwainke, shi yeozoka na yetama kwa kuishiiza. 23 Miya wo wahebula na kuighua iituke yawe, hewakuivile hambu kutongela sheiya zako. Hewaghoshole via uwaaghiizevyo, nee vyeleka uzawaetea izi ntogho zoshe.

24 "Waghojo wa Wakalidayo wazafuka matubwi na kuudenganyiza unu mzi kunga waughue, wohe watautoa. Nkondo, saa na matamu nevieke unu mzi ughuighwe. Mbuli zosheni ulongiezo kweli zizalawiya. 25 Miya iwe Zumbe Mulungu waanighambila nighule ubuwa kwa madini ya kughosholea hea mwe mesho ya waona, hang'we na kuti uwo mzi wiidengighwe ni Wakalidayo."

26 Vikibinda Zumbe Mulungu akanighamba, 27 "Ni miyo Zumbe Mulungu, Mulungu wa wantu wosheni. Hekuna mbuli yoyoshe nishidahayo."

28 Ivi nee avyelonga Zumbe Mulungu, "Imi neniulavye unu mzi kwa Wakalidayo na kwa Nebukadineza zumbe wa Babeli, yohena neaughuwe. 29 Wakalidayo weutoa unu mzi newaize na kuutoa moto, newauwoke hang'we na nyumba ambazo wantu wakwe wazanikweza maya kwa kumuokea ubani mulungu Baali kwe mataa na kumgeea ntogoo za chanywa kwa mulungu. 30 Wantu wa Izilaeli na wa Yuda hewaghoshole kintu chochoshe, miya waghoshole ubanasi mwe mesho yangu kuanduka ubwanga wawe, na ivi ushe Waizilaeli hewaghoshole kintu chochoshe miya wazanikweza maya kwa vintu waghosholevyo kwa mikono yawe. Ni miyo Zumbe Mulungu nilongiewo. 31 Kuandusha unu mzi uzengwe mpaka ivi lelo, wantu wa unu mzi wazanikweza maya na kuniihiza. Shuti niubane, 32 kwa mbuli ya ubanasi waghosholewo wantu wa Izilaeli na wantu wa Yuda, hang'we na wazumbe na wagholokezi wawe, wavikizi na wateghanyi wawe. 33 Wantu wangu wazanieka na hewakunda kuniuiya, hang'we na kuti kia mshi naawahinya, miya hewanitegheleze wala kuhokela vinyanyi vyangu. 34 Wakaika vinyago vyeniihiza mwe nyumba yetaikana kwa zina jangu, wakaiyeka ishetame kwa kunivika. 35 Wakazenga hantu hakumvika mulungu Baali mwe koongo ja ng'wana Hinomu, kunga wamulaviize mulungu Moleki ntogoo za wabwanga na wandee wawe, hang'we na kuti siwaaghiize na sifanyanye kuti newaghoshole ivyoho, wakawaeka wantu wa Yuda waghoshole uhuza."

36 Zumbe Mulungu, Mulungu wa Izilaeli, aghamba ivi, "Yelemia, iwe utaghamba unu mzi neughuighwe ni zumbe wa Babeli, kwa nkondo, kwa saa na kwa matamu. Miya imi Zumbe Mulungu wa Izilaeli naghamba, 37 kweli neniwaunganyanye Waizilaeli kulawa mwe shi zoshe nawaasakanyako kwa maya yangu makai na kuihiwa kwangu kuisiizeko. Neniwauze vingi na aha hantu na kuwaeka waikale kwa mpolele. 38 Newaituke wantu wangu, naimi neniituke Mulungu wawe. 39 Neniwaghalushe waituke na moyo mng'we na wena fanyanyi za hang'we kunga waniive imi kale na kale, kwa mbuli yawe wenye na wana wawe ndiwo wavyawe. 40 Nenighoshole nawo kilagha cha kale na kale, senieke kuwaghoshoela mbuli ntana, neniwainke kuniiva kwa myoyo yawe yoshe kunga washezanihituka. 41 Nenitamiwe kuwaghoshoela mbuli ntana na kuwatoghesha mwe inu shi kwa moyo wangu woshe."

42 Zumbe Mulungu aghamba ivi, "Sa naetavyo ntogho kwa awa wantu, nee ndivyo niwaetee mbuli ntana niwaghambilezo. 43 Mbuwa nezighulwe mwe inu shi muyeghamba izaituka ukiwa heina wantu wala vizama kwa kuti izainkiwa kwa Wakalidayo. 44 Wantu newaghule mbuwa kwa madini ya kughoshoela hea na newagee unyindi mwe makatasi yeonyesha kuti ni mbuwa zawe, newagee unyindi mwe mesho ya waona mwe shi ya Benjamini, mwe vijiji vye mwe mzi wa Yelusalemu, mwe mizi ya Yuda, mwe mizi ya shi ya vitui, mwe mizi ye wazu zua jikwengookea kushinako vitui na mwe mizi ya nyika ye wazu wa kusini ya Yuda. Neniwaeke mbuli zawe ziwaitile vitana vingi." Ni miyo Zumbe Mulungu nilongiewo.