1 Mwe mishi ya ugholokezi wa Yehoyakimu ng'wana wa Yosia, zumbe wa Yuda, Zumbe Mulungu aanighamba kuti, 2 "Yelemia, hita ukagholoke mwe nyumba yangu, ukawaghambile wantu woshe weiza kwevika umo mbuli zosheni nikuaghiizezo ushezashighaza mbuli hata ng'wenga. 3 Wadaha wakategheleza na kueka sia zawe mbada. Vikibinda neniwaivile mbazi na kueka kuwaetea ntogho nikundiezo kuwaetea kwa mbuli zawe mbada waghosholayo."

4 Uwaghambe kuti, "Zumbe Mulungu aghamba, mukishenitegheleza na kughoshola sa via nimihinyievyo, 5 kati hemutegheleze mbuli zelongwa ni wateghanyi wangu niwewaaghiiza kwenyu kia mshi, na hemuwategheleze na hemughoshole sa wamighambilevyo, 6 nee ndiho niibane inu nyumba sa via nibanievyo mzi wa Shilo, na mbali zoshe nezione kuti unu mzi wa Yelusalemu una ute."

7 Wavikizi, wateghanyi na wantu woshe wakamtegheleza Yelemia ahelongo izo mbuli mwe nyumba ya Zumbe Mulungu. 8 Ushe Yelemia ahebinda kulonga mbuli zoshe Zumbe Mulungu amuaghiizezo, wavikizi na wateghanyi na wantu woshe wakamgwia na kutua vuzo wakighamba, "Ukundighwa ukong'we! 9 Kwai uzateghanya kwa zina ja Zumbe Mulungu ukighamba, inu nyumba ya Zumbe Mulungu neibanighwe sa Shilo na unu mzi neubanighwe hekuna mntu ndiye aikale umo?" Wantu woshe wakamdenga Yelemia. 10 Ushe, wagholokezi wakulu wa Yuda waheziiva izo mbuli, wakalawa mwe kitaa cha zumbe, wakaita mpaka mwe nyumba ya Zumbe Mulungu, wakaikala mwe zuvi hya jakuingiiya mwe nyumba ya Zumbe Mulungu. 11 Vikibinda wavikizi na wateghanyi wakawaghambila wagholokezi na wantu woshe, "Uyu mntu akundigwa akong'we, kwa kuti azaulonga vibada unu mzi, samuivievyo kwa magutwi yenyu."

12 Nee Yelemia akawaghamba waja wagholokezi wakulu hang'we na wantu woshe kuti, "Zumbe Mulungu ateniaghiiza niteghanye mbuli mbada ndizo ziibule inu nyumba na unu mzi sa muivilevyo nihelonga. 13 Ivi ushe, votekai mueke mbuli zenyu mbada na kumuiva Zumbe Mulungu, Mulungu wenyu. Mukighoshola mbuli ntana Zumbe Mulungu haamietee ntogho. 14 Miya kwa mbuli yangu, imi ni mwe mikono yenyu, nighosholai muvyeona kuti ni vitana na chaafaa mwe mesho yenyu. 15 Miya mutaile kuti mukinikoma, mutekiinka wenye ute kwa kukoma mtu ashinaye masa. Kwa kuti, ni kweli Zumbe Mulungu nee anighiizeye kwenyu nimishunde." 16 Wagholokezi na wantu wosheni wakawaghambila wavikizi na wateghanyi, "Uyu mntu hakundigwa kukong'wa, kwa kuti alongie na ishwi kwa zina ja Zumbe Mulungu, Mulungu wetu." 17 Waghundu wagheke wa shi wakagholoka wakawaghambila wantu wosheni wadughanewo, wakawaghambila kuti, 18 "Mishi iyo Hezekia ai zumbe wa Yuda, mteghanyi Mika wa Moleshesi, akawaghambila wantu woshe kuti Zumbe Mulungu mwena nguvu zoshe aghamba ivi, ‘Mzi wa Sayuni newiimighwe sa ubuwa, mzi wa Yelusalemu neughalushwe kiugha cha shanga, na muima wa nyumba ya Zumbe Mulungu newiituke mzitu.’ 19 Ivi, Hezekia zumbe wa Yuda na wantu wosheni wa Yuda waamkoma Mika? Doo! Ivi, Hezekia hamuivile Zumbe Mulungu na kuombeza mbazi zakwe? Zumbe Mulungu akaeka kuwaetea ntogho. Miya ishwi titakietea ntogho wenye."

20 Nee kuina mntu mtuhu vingi ateghanyaye kwa zina ja Zumbe Mulungu. Uyo mtu nee akiitangwa Ulia ng'wana wa Shemaya, kulawa mzi wa Kiliasi Yealimu. Ye ateghanya mbuli mbada ndizo ziubule unu mzi na inu shi sa Yelemia aghosholevyo. 21 Zumbe Yehoyakimu hang'we na waghojo wakwe na wagholokezi woshe waheiva mbuli alongiezo Ulia, zumbe akakunda kumkoma Ulia. Miya Ulia aheiiva iyo mbuli akaingiwa ni wogha, akanyiika, akaita na mwe shi ya Misii. 22 Zumbe Yehoyakimu akamuighaa Elinasani ng'wana wa Akiboli, hang'we na wantu wangahi du waite Misii wakamgwie Ulia. 23 Waamuuza Ulia kulawa mwe shi ya Misii, wakamuighala kwa zumbe Yehoyakimu. Zumbe Yehoyakimu akamkoma Ulia kwa uhamba ng'wii wakwe ukaashighwa mwe hantu hena mbiya za wantu wa washitaikanawo kunga uzikwe. 24 Kwa kuti Yelemia nee akiambizwa ni Ahikamu ng'wana wa Shefani kwa ivyoho hagwizighwe vingi kunga akong'we.