1 Zumbe Mulungu aanighamba niite mwe kitaa cha uzumbe wa Yuda, uwaghambile wantu inu mbuli, 2 iwe zumbe wa Yuda mweikala mwe kiti cha uzumbe cha zumbe Daudi, hang'we na waambizi wako na wantu wako weingila kuzinkia mwe izi nyuvi, teghelezai mbuli alongilezo Zumbe Mulungu. 3 "Zumbe Mulungu aghamba ivi, lahai kwa ukweli na kwa utanda. Mvunilei mntu agwizighweye ni wabavi wekunda kumhoka mai zakwe. Mushewaghoshoee mbuli mbada ama ukatii mgheni, wana wafiiewo ni wavyazi wawe na wavyee wafiiwewo ni waghoshi wawe, vingi, mushezakoma wantu washinawo masa mwe unu mzi. 4 Kwa kuti mukighoshola izi mbuli nimighambilezo kwa utanda, nee ndiho wavyawa wa Daudi newaendee kuituka wazumbe mwe inu shi. Wo na waambizi wawe hang'we na wantu wawe, newahimbe kuzinka mwe uvi wa zumba ja kizumbe wakiituka waikwezie mwe magai yebuutwa ni faashi na watuhu waikwezie faashi. 5 Miya mukisheghoshola sa nimighambilevyo, imi Zumbe Mulungu nitalapa kulawa mwe moyo wangu kuti, iji zumba ja kizumbe nenijighalushe huzu."

6 Kwa mbuli ya zumba ja kizumbe ja zumbe wa Yuda, Zumbe Mulungu aghamba ivi, "Hata kati umtana sa shi ya Gileadi na miima ya Lebanoni, nenikughalushe uituke ughongo, vingi sa mizi ishiikalwayo ni wantu. 7 Neniete wankuu wabane iji zumba ja kizumbe. Newaize na machoka wazikee mpau zako ntana za miti ya mielezi na kuzihomea na kwe moto.

8 "Vikibinda wantu wa mbali nyingi newazinke hehi na unu mzi na kuuzana kuti, ‘Kwai Zumbe Mulungu azaughoshola mbuli yeivihi mwe mzi mkulu sa unu?’ 9 Wohe newahise kuti, ‘Aghoshole ivihi kwa kuti, wenyezi wa unu mzi watejaa shogha wajayo na Zumbe Mulungu, Mulungu wawe, wakavika mulungu mituhu na kuitumikila.’ "

10 Inywi wantu wa Yuda, mushemkemee zumbe Yosia,

wala mushemghosholee ndiyo.

Miya kemai kwa usoyoyo kwa mbuli ya Yehoahazi, ng'wanae,

kwa kuti wazamghua na kumuighaa hale mwe shi ntuhu na heauye vingi kale na kale,

wala haione vingi shi yakwe avyaighwako.

11 Ivi nee alongavyo Zumbe Mulungu kwa mbuli ya ng'wanae ja zumbe Yosia, mweitangwa Yehoahazi, agholokeae hantu haishe Yosia, "Uyo azalawa mwe inu shi na kuita na mwe shi ya hale, hezeauye vingi kale na kale. 12 Neafiiye hantu aighawaho kwe shi ya ugheni, heauye vingi kweiona shi yakwe."

13 Chakwe ndicho yuja mwezenga kitaa chakwe cha uzumbe kwa sia ishimtamilayo Zumbe Mulungu,

na kuzenga vyumba vya dali kwa sia ya zuuma,

mwewaghoshoeza ndima wantu wakwe awewagholokea,

bila kuwaliha chochoshe.

14 Chakwe ndicho yuja mntu mweghamba,

"Nenikizengee zumba kulu ja kizumbe,

jena vyumba vikulu uko ulanga kwe dali,

na kujiika madiisha yeghenea,

na ukando wakwe neniukontee mbao za hea nyingi,

na kuzishisha langi yeunguika."

15 Ivi, ughambile kuti uituke zumbe kwa kuhimana kuzenga nyumba za mpau za miti ya mielezi ya hea nyingi,

nyumba ntana kuiko zoshe?

Isho ako aikala maisha ya nyemi?

Nee ni mntu mtana na mkweli,

aho mbuli zakwe zikamuitia vitana.

16 Aawavunia wakiwa na wekunda uwambizi,

kwa ivyoho mbuli zakwe zosheni zikamuitila vitana.

Ivi ushe ivyoho se kumtaila Zumbe Mulungu?

17 Miya mesho yako na moyo viwelela kuonea mai kwa sia za zuuma,

waaitia mpome za wantu washinawo masa,

na kuwaghoshoela wantu zuuma na ukatii.

Imi Zumbe Mulungu nizalonga.

18 Kwa mbuli ya Yehoyakimu ng'wana wa Yosia, zumbe wa Yuda, imi Zumbe Mulungu naghamba ivi,

"Akizafa, heaonee mwemkemea akighamba,

‘Yetate naneei, yetate naneei! Nitendaze imieee!’

Heaonee mwemuiya akighamba,

‘Yetate naneei zumbe wangu azafa! Nigwia yahii imi ee?’

19 Neazikwe bila ishima sa mpunda,

neabuutwe na kuhomeewa,

se ya nyuvi za Yelusalemu."

20 Inywi wantu wa Yelusalemu, hitai mpaka Lebanoni mukabiikie,

kemai uko kwe shi ya Bashani,

tuai vuzo kulawa mwe miima ya shi ya Moabu,

kwa kuti mbali zoshe zemiambiza mwe nkondo zizahewa.

21 Zumbe Mulungu aalonga na inywi ija mishi muheituka muionee,

miya inywi mukaemela kumtegheleza.

Ivi nee mughosholevyo kuanduka mui wabwanga.

Hemwamtegheleze Zumbe Mulungu avyelonga.

22 Wagholokezi wenyu woshe newahomewe hale ni mpeho.

Na mbali zemiambiza mwe nkondo nezighuighwe na kuighalwa mwe shi ya ugheni.

Nee ndiho muingiwe ni shoni na kuona usoyoyo,

kwa mbuli ya ubanasi wenyu mughosholewo.

23 Inywi wantu woshe mweikala Lebanoni, inywi mweikala vitana mwe nyumba za miti ya mielezi,

welela ndivyo mukeme mukizatozighwa ni sungu ziisizezo,

mishango sa uja wa mvyele mwekishungua.

24 Zumbe Mulungu aghamba ivi, kwa mbuli ya Konia zumbe wa Yuda, ng'wana wa Yehoyakimu, "Nitalapa kuti, hata kati iwe Konia ng'wana wa Yehoyakimu, zumbe wa Yuda, ungeituka mpete yangu ya mkono wangu wa kuume yeonyesha ufung'wa wangu, nangakuusha du. 25 Nenikueke ugwiwe ni wantu wekunda kukukoma, waja uweogoha, yani mwe mikono ya Nebukadineza, zumbe wa Babeli na mwe mikono ya Wakalidayo. 26 Nenikukungumize iwe na nyokwe ako muighawe na shi ya kigheni. Nemuite mwe shi mushivyaaiweyo, nenywi nemufiie ghuko uko. 27 Nemukunde kwei kuuya mwe shi yenyu, miya hemuuye vingi."

28 Mntu mng'we akaghamba, "Ivi, uyu zumbe Yehoyakimu azaghaluka nyungu ituikeyo, yebewa na kuashighwa se? Kwai ye na wanae wazaashighwa hale mwe shi washitailayo hata?"

29 Wantu wa inu shi!

Teghelezai vitana mbuli ya Zumbe Mulungu,

30 Zumbe Mulungu aghamba ivi,

"Mteilei uyu mntu sa mntu ashinae wana,

mntu ambaye hezeaonee mwe mishi yakwe yoshe.

Kwa kuti, heaituke na kivyazi

ndicho chigholokee shi ya Yuda,

na kugholokea sa zumbe Daudi."