1 Inu nee mbuli Zumbe Mulungu alongieyo na Yelemia kwa mbuli ya wantu wa Yuda waikalawo mwe shi ya Misii mwe mizi ya Migidoli na Tahipanesi na Memufisi na weikala wazu wa kusini wa shi ya Misii. 2 Zumbe Mulungu mwena nguvu zoshe, Mulungu wa Izilaeli aghamba ivi, "Mwaaona mbuli zosheni mbada naetazo mwe mzi wa Yelusalemu na mwe mizi yosheni ya Yuda. Iyo mizi lelo izaghaluka mahuzu na hekuna mntu mweikala uko. 3 Vizaituka ivyoho kwa mbuli ya ubanasi mughosholewo, muzanikweza maya kwa kuiokea ubani na kuitumikila mulungu mushiitailayo inywi wenye, washiitailayo wo wala baba zawe. 4 Mishi yoshe nee nikiwaaghiiza watung'wa wangu wateghanyi kwenyu, wamighambilewo musheghoshole mbuli mbada yenikweza maya. 5 Miya hekuna aniteghelezeye wala kuniiva, wakaemela kueka ubanasi wawe na kueka kuokea ubani mulungu mituhu. 6 Kwa ivyoho, maya yangu yakakwea sa moto na kuoka mizi ya Yuda na mwe nkiii za Yelusalemu, zikaituka nyumba zigomokezo na mahuzu sa viivyo ivi lelo."

7 Kwa ivyoho ushe, Zumbe Mulungu mwena nguvu zoshe, Mulungu wa Izilaeli aghamba ivi, "Kwai mwaakietela ubanasi mkulu ndiwo umieke, wavyele na waghoshi na wana wadodo na wana wankebe wakong'we mwe shi ya Yuda kusheshighale hata mntu mng'we? 8 Kwai mwanikweza maya kwa kuvika mulungu mukighosholeeyo na kuiokea ubani mulungu mituhu mwe shi ya Misii muizileko kweikala? Nemukikome wenye na kuituka wantu wa kubewa na wena ute mwe mesho ya wantu wa mbali zosheni za mwe shi. 9 Kwani mutejaa ubanasi wa baba zenyu na ubanasi wa wazumbe wa Yuda na ubanasi wa wavyele wawe na ubanasi wenyu na wavyele wenyu, mwaughosholawo mwe shi ya Yuda na mwe nkiii za Yelusalemu? 10 Mpaka ivi lelo hemudee ama kuninka ishima wala kutongela kanwa changu na ng'wiko nimiikilewo inywi na baba zenyu."

11 "Kwa ivyoho, imi Zumbe Mulungu nena nguvu zoshe, Mulungu wa Izilaeli, nizafanyanya kumietea ntogho na kuwakoma wantu woshe wa Yuda. 12 Neniwaushe wantu wa Yuda washighalewo, waja wekunda kuita kweikala Misii. Neniwakomee ghuko, wetaikana na washitaikanawo, newafe kwa uhamba hambu kwa saa. Nemuituke wantu wena ute na wa kubewa, wantu wa kukaaizwa na wegea shoni. 13 Neniwatoe waja waizilewo kweikala mwe shi ya Misii sa via niwatoilevyo wantu wa Yelusalemu kwa nkondo, kwa saa na kwa matamu. 14 Kwa ivyoho hekuituke na mntu yoyoshe mwe wantu wa Yuda washighalewo na kuiza kweikala mwe shi ya Misii, ndiye anyiike, ndiye ahone hambu kuuya na mwe shi ya Yuda, wayekunda kuuya na kuikala uko. Hewauye, miya nekuuye wantu wagheke du ndiwo waituke watanyiika nkondo."

15 Vikibinda, waghoshi woshe watailewo kuti wakazie wawe nee wakiiokela ubani mulungu mituhu na wavyele woshe ndiwo wai aho, yani bumba kulu ja wantu wa Yuda ndiwo wakiikala wazu wa kusini mwe shi ya Misii wakamghamba Yelemia kuti, 16 "Izi mbuli za Zumbe Mulungu utighambilezo hetizitegheleze. 17 Netighoshole kia kintu tighambilecho kuti netichighoshole. Netimuokee ubani malikia wa kwe lwingu na kumgeea ntogoo za vyanywa sa ndivyo tikighoshola ishwi na baba zeshu, wazumbe lweshu na wagholokezi yweshu mwe mizi ya Yuda na mwe sia za Yelusalemu. Mwe iyo mishi, nee tiina nkande nyingi, taaonea na hetibuzighwe ni ntogho yoyoshe. 18 Miya kuanduka tiekilevyo kumuokea ubani malikia wa kwe lwingu na kumgeea ntogoo za vyanywa, hetionee kintu chochoshe, na wandughu weshu wazaituka wakifa kwa nkondo na kwa saa."

19 Na awo wavyele wakahimba kughamba kuti, "Ufanyanya kuti nee tikimuokea ubani na kumgeea ntogoo za vyanywa malikia wa kwe lwingu na kughoshola mikate sa cheni chakwe chiivyo bia waghoshi weshu kutaila? Shivyo ivyo."

20 Nee Yelemia ahewaghambila waghoshi na wavyele ndiwo wakishimoea naye, 21 "Kwani mufanyanya kuti Zumbe Mulungu hafukile na kuntongonyeza kwa mbuli ya ubani mumuokeewo ye ng'wenye mwe mizi ya Yuda, inywi hang'we na baba zenyu na wazumbe na wagholokezi wenyu na wantu woshe mwe sia za Yelusalemu? 22 Zumbe Mulungu ahezaituka hadaha kuzizimiza kwa mbuli ya ubanasi wenyu na mbuli zemuihiza mughosholezo, shi yenyu izaituka na ute na nkeiikawa ni wantu mpaka ivi lelo. 23 Izi ntogho zilawiiye kwa kuti, muzaiokea ubani mulungu na kughoshola uhuza kwa Zumbe Mulungu na muzaemela kumuiva na hemutongele kanwa chakwe, ng'wiko na maaghiizo yakwe."

24 Vikibinda Yelemia akawaghambila wantu woshe hang'we na wavyele woshe kuti, "Teghelezai mbuli ya Zumbe Mulungu, inywi wantu wa Yuda mwe umu mwe shi ya Misii. 25 Zumbe Mulungu mwena nguvu zoshe, Mulungu wa Izilaeli, aghamba ivi, ‘Inywi hang'we na wakazie wenyu muzaghoshola zia mbuli mulongiezo kwa vyanwa vyenyu mukighamba kuti, nemubontole shogha zenyu muikilezo kuti nemumulaviize ntogolo na kumgeea chanywa malikia wa kwe lwingu. Tozai shogha zenyu na kulavya ntogolo za vyanywa.’ 26 Miya teghelezai mbuli yangu imi Zumbe Mulungu, inywi wantu woshe wa Yuda mweikala mwe shi ya Misii. Imi Zumbe Mulungu nitaja mlape kwa zina jangu kulu kuti, hekuna mntu yoyoshe alawieye mwe shi ya Yuda mweikala mwe shi ya Misii, ndiye alape vingi kwa zina jangu akighamba, ‘Sa Zumbe Mulungu avyeishi.’ 27 Naamifanyanyiiza kumietea mbuli mbada na shiyo ntana. Wantu woshe wa Yuda weuko Misii newakong'we kwa nkondo na kwa saa mpaka ndiho washie woshe. 28 Waja ndiwo wadahe kunyiika kwe nkondo kulawa mwe shi ya Misii na kuuya na mwe shi ya Yuda, newaituke wagheke. Aho nee ndiho wantu wa Yuda washighalewo na kuiza kweikala Misii, wataile kuti ni mbuli yangu hambu ni mbuli yawe ndiyo ibontoke. 29 Inu nee ndiyo iituke ntangilo kwenyu. Imi Zumbe Mulungu nenimitoe haha aha kunga mutaile kuti mbuli yangu ya kumitoa ndiyo nikimighambila neilawiiye. 30 Nenimueke Hofula zumbe wa Misii agwiwe ni wankuu wakwe waja wekunda kumkoma, sa Sedekia zumbe wa Yuda agwizighwevyo ni wankuu wakwe, yani Nebukadineza zumbe wa Babeli mnkulu wakwe akundieye kumkoma." Ni miyo zumbe Mulungu nilongiewo.