1 Mwe andukio ja ugholokezi wa Sedekia ng'wana wa Yosia, zumbe wa Yuda, mbuli kulawa kwa Zumbe Mulungu ikamuizila Yelemia. 2 Zumbe Mulungu aanighambila ivi, "Shongola kigongo uchishunge mwe shingo yako kwa ughoe wa babu. 3 Vikibinda, ighala inu mbuli kwa zumbe wa Edomu, zumbe wa Moabu, zumbe wa Amoni, zumbe wa Tilo na zumbe wa Sidoni, kuzinkia kwa wajumbe waizilewo Yelusalemu kwemvuiya Sedekia zumbe wa Yuda. 4 Uwaghambe awo wajumbe wawaghambile wazumbe wawe kuti, imi Zumbe Mulungu nena nguvu zoshe, Mulungu wa Izilaeli, naghamba ivi, 5 ni miyo niumbieye ngulu, wantu na vizama vyeumo kwa kudaha kwangu na kwa nguvu zangu, na imi nimnka ivyo vintu mntu yoyoshe niyekunda. 6 Kwa ivyoho nizamnka mtung'wa wangu Nebukadineza zumbe wa Babeli, izo shi zoshe vingi nizamnka vizama vya tundui vimtumikile. 7 Wantu wa mbali zoshe newamtumikile ye, ng'wanae na ng'wezukuue, mpaka ndiho shi yakwe igwe. Vikibinda shi nyingi na wazumbe wangi newamghalushe mtung'wa wawe."

8 "Miya waona shi yoyoshe hambu uzumbe wowoshe ukiemela kumtumikila Nebukadineza, zumbe wa Babeli, neniitoe iyo shi kwa kuietea nkondo, saa na matamu mpaka niikome vigima kwa ufung'wa ndiwo nimnke. 9 Kwa ivyoho mushewategheleze wateghanyi wenyu, watoa bao wenyu, watabii wenyu hambu washai wemighambila inywi kuti, ‘Hemumtumikile zumbe wa Babeli.’ 10 Awo wamiteghanyiza mbuli za lufyo, mbuli ndiyo imieke muighawe hale na inu shi yenyu. Nenimighuushe na hale na nemufiie ghuko. 11 Miya wantu wa mbali yoyoshe ndiwo wamuive zumbe wa Babeli na kumtumikila, neniwaeke waikale mwe shi yawe, waiime shanga yawe na kuikala umo." Ni miyo Zumbe Mulungu nilongiewo.

12 Imi Yelemia naamghambila Sedekia zumbe wa Yuda mbuli zizoizo. Namghamba kuti, "Muivei zumbe wa Babeli. Mtumikile ye na wantu wakwe, na iwe neuituke moyo. 13 Kwai iwe na wantu wako mufiie kwe nkondo, kwa saa na kwa matamu? Kwa kuti ivyo nee Zumbe Mulungu alongavyo kwa mbuli ndizo ziwabule wantu wa shi yoyoshe ndiwo waemele kumtumikila zumbe wa Babeli. 14 Mushetegheleze mbuli wateghanyi wazemighambila kuti, mushemtumikile zumbe wa Babeli, kwa kuti wamiteghanyiiza mbuli za lufyo. 15 Zumbe Mulungu aghamba kuti, ‘Imi siwaaghiize awo wateghanyi, miya wateghanya mbuli za lufyo kwa zina jangu. Kwa ivyoho neniwaghuushe na hale, na inywi nemufe hang'we na awo wateghanyi wemiteghanyiiza mbuli za lufyo.’ "

16 Vikibinda, nikawaghambila wavikizi na wantu woshe kuti, Zumbe Mulungu aghamba ivi, "Mushewategheleze wateghanyi weteghanya kuti vivi ushe vintu vya nyumba ya Zumbe Mulungu neviuzighwe kulawa Babeli. Wamiteghanyiza mbuli za lufyo. 17 Mushewategheleze! Mghosholeei ndima zumbe wa Babeli, nenywi nemuituke moyo. Kwai unu mzi uzezaituka mahuzu? 18 Kati awo ni wateghanyi na wana mbuli ya Zumbe Mulungu, newamvike Zumbe Mulungu mwena nguvu zoshe, kunga vintu vishighalevyo mwe nyumba ya Zumbe Mulungu na mwe kitaa cha zumbe wa Yuda na mwe mzi wa Yelusalemu, visheghuighwe na kuighawa Babeli."

19 Kwa kuti ivi nee avyelonga Zumbe Mulungu mwena nguvu zoshe kwa mbuli ya mikowa, maigha yaghosholweyo kwa madini ya shaba, vinala na vintu vituhu viekighwevyo mwe unu mzi, 20 vishighuighwevyo ni Nebukadineza, zumbe wa Babeli ahezawagwia Yehoyakini ng'wana wa Yehoyakimu, zumbe wa Yuda hang'we na wagholokezi woshe wa Yuda na wa Yelusalemu kulawa Yelusalemu na kuwaighala na mwe shi ya ugheni.

21 Ivi nee avyelonga Zumbe Mulungu mwena nguvu zoshe, Mulungu wa Izilaeli, kwa mbuli ya vintu viekighwevyo mwe nyumba yakwe, mwe kitaa cha zumbe wa Yuda na mwe mzi wa Yelusalemu. 22 "Ivyo vintu nevighuighwe viighawe Babeli, na neviituke uko mpaka mshi ndiwo nivikunde. Vikibinda neniviuze vingi na kuviika aha hantu." Ni miyo Zumbe Mulungu nilongieye.