1 Mvikizi Pashuli ng'wana wa Imeli, ndiye ai mgholokezi mkulu mwe nyumba ya Zumbe Mulungu, aamuiva Yelemia akilavya uteghanyi. 2 Ushe, Pashuli akamtoa na kumtaha Yelemia hehi na zuvi ja Benjamini je ulanga ndijo jii mwe nyumba ya Zumbe Mulungu. 3 Keloi hakwe wa makeo, Pashuli ahemdohoa Yelemia, nee Yelemia akamghamba Pashuli kuti, "Zumbe Mulungu heakuitange vingi Pashuli, miya neakuitange ‘Magoli misabibu’ yani ‘Wogha kia wazu.’ 4 Kwa kuti Zumbe Mulungu ng'wenye aghamba ivi, ‘Welela, nenikughalushe ukigee wogha ng'wenye na kuwagea wogha wantu watuhu. Neuwaone kwa mesho yako wankuu wako wakikong'wa kwa uhamba kwe nkondo. Neniwainkiize wantu wosheni wa Yuda kwa zumbe wa Babeli, yohe neawagwie awaighale mpaka Babeli akawakome. 5 Mai zawe zosheni ze mwe unu mzi hang'we na kiiko cha wazumbe wa Yuda, nenichiinkile kwa wankuu wawe wachiighale na uko Babeli. 6 Na iwe Pashuli hang'we na wantu wa chengo chako, nemuighalwe na mwe shi ya Babeli kwe utung'wa. Neufe na kuzikwa ghuko, hang'we na mbuya yako yosheni uwateghanyizewo lufyo.’"

7 Zumbe Mulungu, iwe utenilufya,

naimi nikaitikia lufyo.

Iwe waadaha kuiko imi,

na uzanidaha.

Kia mntu atanibea

mshi mgima watanisheka.

8 Kwa kuti kia nihelongea nitabilikila

Nikibilikila ukatii na ubanasi.

Kwa ivyoho, mbuli ya Zumbe Mulungu izanietea ukanko

na kubewa mshi mgima. 9 Kia nikighamba, senimuange vingi Zumbe Mulungu,

na senilonge kwa zina jako,

mbuli yako itaaka sa moto mwe moyo wangu,

na mwe mavuha yangu.

Nizatibuka kuuhoza,

kwa kweli nizahewa.

10 Naaiva wantu wangi waanomoneka,

"Wogha wangu u kia wazu!

Netitei tikamlahe, netitei!"

Hata weangu wataghojeeza nikine.

Wataghamba, "Ngea neakunde timuufye,

Nee ndiho timgwie na kumuihiiza."

11 Miya iwe Zumbe Mulungu uhang'we naimi,

sa mghojo mwena nguvu,

woshe washikundawo nionee newagwe,

kwa kuti hewadahe,

newaingiwe ni shoni ya kale na kale.

12 Zumbe Mulungu mwena ufung'wa woshe, iwe waawagheza wantu wakweli,

na waataila mbuli ze mwe myoyo na mwe akii za wantu.

Niambiza nione ukiwaihiiza wankuu wangu,

kwa kuti nikualila iwe mwe masa yangu.

13 Muimbilei Zumbe Mulungu!

Mtogolei Zumbe Mulungu!

Kwa kuti azamvunila mkiwa, kulawa mwe mikono ya wantu wahuza.

14 Neulanwe mshi nivyaighwewo!

Mshi navyaighwawo usheng'azwe mesho!

15 Nealanwe mntu amghambiaye tate mbuli ya kuvyaighwa kwangu kuti,

"Uzaonea ng'wana wa kibwanga,"

na kumueka akatamiwe.

16 Neakong'we sa ija mizi,

yakinywayo ni Zumbe Mulungu bia mbazi.

Makeo aive nkoo

na mshii aive gunda ja nkondo,

17 kwa kuti hanikomie mwe ifu ja mnaa.

Ifu ja mnaa jangaituka nee mbiya yangu, jingeituka kulu kale na kale.

18 Kwai ushe naavyaighwa?

Navyaighwa nisungudike na kuona usoyoyo,

na kuingiwa ni shoni mishi yangu yoshe?