1 Zumbe Mulungu mwena ufung'wa woshe aghamba ivi, "Mishi iyo ukizabula, mavuha ya wazumbe wa Yuda na ya waambizi wawe na ya wavikizi na ya wateghanyi na ya wantu wa Yelusalemu neyaushighwe kulawa mwe mbiya zawe. 2 Ivyo nee vintu wakundavyo na kuvitumikila, wakavitongela kunga wainkwe vinyanyi na kuvivika, nevianikiwe vitoighwe ni zua na ng'wezi na ntondwe za kwe lwingu. Ayo mavuha heyaunganyanywe wala kushiiwa, miya neyaituke sa mantu mwe shanga. 3 Hantu hohoshe ndiho niwaghuushe naho awa wantu wa inu mbali mbada, newaone kesa kufa kuiko kuituka moyo."

4 Iwe Yelemia waghambile awa wantu kuti, Zumbe Mulungu aghamba ivi, "Mntu akigwa hainuka vingi? Mntu akiagha sia hauya na mwe sia yakwe? 5 Kwai ushe awa wantu wataagha? Kwai wantu wa Yelusalemu wataagha kia saa? Watetozeeza lufyo na wazemea kuniuiya imi. 6 Imi naawategheleza vitana, miya wo hewalongie ukweli wowoshe. Hekuna mwevoteka kwa mbuli ya uhuza wakwe, wala kukiuza kuti, ‘Ni mbwai ivi nighosholevyo?’ Kangi kia mng'we adosa sia yakwe ng'wenye, sa vinga ni faashi yeghuuka kuita kwe nkondo. 7 Kolongo jaataila mshi wa kushama, sua, shemkoko na hondohondo vyataila mishi yawe ya kuuya. Miya wantu wangu hewataila nivyekunda kwawe imi Zumbe Mulungu. 8 Mudaha zeze kughamba, ‘Ishwi tina viugho, kwa kuti tina sheiya ya Zumbe Mulungu,’ naho wegonda sheiya zangu, wazazihitua na kugonda lufyo? 9 Wena viugho newaingiwe ni shoni, newasungudishwe na kugwiwa. Kwa kuti, wazaiemela mbuli ya Zumbe Mulungu, ushe, ni viugho ani ivyo wavyena navyo? 10 Kwa ivyoho, wakazie wawe neniwainkile na kwa waghoshi watuhu, mbuwa zawe neniziinkile kwa wantu watuhu. Kwa kuti kuandusha wetaikana na washitaikanawo wakikunda waonee vingi kwa sia za zuuma, wateghanyi na wavikizi wohe waghoshola kwa lufyo. 11 Chia wacheghoshola kwa wantu wangu waumizwewo kweli nikuwainka kialilo cha amani chishicho cha kweli. 12 Ivi waona shoni, kwa mbuli zawe kwa mbuli zawe zekweza maya kwei? Doo! Hewaona shoni hata hadodo du hewateiya hata kuona shoni. Kwa ivyoho newagwe hang'we na waja wegwa neniwakome kweli, ivyo nee avyelonga Zumbe Mulungu."

13 Zumbe Mulungu naghamba ivi, "Naakunda kuwaunganyanya wantu wangu sa muimi avyeunganyanya shumo jakwe, miya wazahituka wakaghaluka sa mti wa mzabibu ushinawo zabibu, vingi sa mti wa mtini ushinawo tini na mahungo yawe yazakaaghaa. Kwa ivyo nizawakundiiza wagheni waighue shi yawe."

14 Wantu wa Yuda watauzana, "Kwai ishwi titeikala du aha? Tiituke kintu king'we, tiite mwe mzi wena ughojo, tikafiie uko. Zumbe Mulungu, Mulungu lweshu azakunda tife, azatinka mazi yena sumu tivate, kwa kuti tizaghoshola uhuza. 15 Tighambile netionele uhonyi na mpolele, miya tihee du kugeighwa wogha. 16 Kwaaivikana vuzo ja faashi za wankuu kwe mzi wa Dani, shi ngima itazingiiza kwa kuti vifa vizabula. Waizile kweibana shi na wantu na vintu vyosheni vyeumo."

17 Nenimietee nyoka zena sumu nkai zishioghekazo kunga zimiume. Ni miyo Zumbe Mulungu nilongiewo.

18 Moyo wangu waasungudika,

ukiwa wangu heudaha kushiya.

19 Tegheleza kiiyo cha wantu wangu,

kulawa mwe shi ya hae.

Kwani Zumbe Mulungu hako uko Sayuni?

Kwani zumbe wakwe hako vingi uko?

Kwai wazanikweza maya kwa mbuli ya vinyago yawe

kwa mulungu yawe ya kigheni ishiwambizayo?

20 Shumo jizashia, mishi ya zua izashia,

ishwi hetizati kuhonywa!

21 Kwa kuti wantu wangu wazaumizwa na imi nizaumia,

na imi ni mkiwa, nitasininika.

22 Ivi uko Gileadi hekuna mzighi wehonya?

Uko hekuna mghanga?

Kwai ushe vionda vya wantu wangu havihonyize?