Gênesis 45

ಜುಜೆ ಅಪ್ಲಿ ವಳಕ್ ದಾಕ್ವುನ್ಗೆತಲೆ

1 ಹೆ ಆಯ್ಕ್ಲ್ಯಾ ಮಾನಾ ಜುಜೆಕ್ ಅಪ್ಲ್ಯಾ ಸೆವಕಾಂಚ್ಯಾ ಇದ್ರಾಕ್ ಅಪ್ನಾಕುಚ್ ಅಪ್ನಿ ತಡ್ದುಕ್ ಹೊವ್ಕ್ನಾ, ಹಿತ್ತೆತ್ನಾ ಸಗ್ಳ್ಯಾಕ್ನಿ ಭಾಯ್ರ್ ದಾಡಾ ಮನುನ್ ತೊಂಡ್ ಉಗ್ಡುನ್ ಸಾಂಗ್ಲ್ಯಾನ್, ಜುಜೆನ್ ಅಪ್ಲ್ಯಾ ಭಾವಾಕ್ನಿ ವಳಕ್ ಗಾಯ್ ಸಾರ್ಕೆ ಕರುನ್ಗೆತಾನಾ ದುಸ್ರೆ ಕೊನ್ಬಿ ಜಗ್ಗೊಳ್ ನತ್ತೆ. 2 ತೆನಿ ಲೈ ಮೊಟ್ಯಾನ್ ರಡಲೆ ಐಗುಪ್ತಾಚ್ಯಾಕ್ನಿ ಆಯಿಕ್ಲೆ, ಅನಿ ಪೊರಾಹ್ ರಾಜಾಚ್ಯಾ ಘರಾಕ್ಬಿ ಖಬರ್ ಗಾವ್ಲಿ, 3 ಜುಜೆನ್ ಅಪ್ಲ್ಯಾ ಭಾವಾಕ್ನಿ, ಮಿಯಾಚ್ ಜುಜೆ, ಮಾಜೊ ಬಾಬಾ ಅಜುನ್ ಹಾಯ್ ಕಾಯ್? ಮನುನ್ ಇಚ್ಯಾರ್ಲ್ಯಾನ್, ತೆನಿ ಸಗ್ಳೆಬಿ ಭಿಂವ್ನ್ ಜವಾಬ್ ದಿಯ್ನಾ ಸಾರ್ಕೆ ಹೊಲೆ. 4 ಜುಜೆನ್ ತೆಂಕಾ ಜಗ್ಗೊಳ್ ಯೆವಾ ಮನುನ್ ಬಲ್ವುನ್ಗೆವ್ನ್ ತುಮಿ ಇಜಿಪ್ತಾಕ್ ಇಕಲೊ ತುಮ್ಚೊ ಭಾವ್ ಜುಜೆ ಮಿಯಾಚ್, ಮಟಲ್ಲೆ ಆಯ್ಕುನ್ ಭಿಂವ್ನ್ ಜವಾಬ್ ದಿ ನಾ ಸಾರ್ಕೆ ಹೊಲೆ. 5 ತುಮಿ ಮಾಕಾ ಹಿತ್ತೆ ಇಕಲ್ಯಾ ಸಾಟ್ನಿ ಬೆಜಾರ್ ಕರುನ್ಗೆವ್ ನಕಾಸಿ, ದೆವಾನ್ ಜಿವಾಂಚ್ಯಾ ರಾಕ್ವನಿ ಸಾಟ್ನಿ ತುಮ್ಚ್ಯಾ ಕಿಂತಾ ಅದ್ದಿಚ್ ಮಾಕಾ ಹಿತ್ತೆ ಧಾಡುನ್ ದಿಲ್ಯಾನ್. 6 ದೆಶ್ಯಾತ್ ಬರ್‍ಗಾಲ್ ಯೆವ್ನ್ ಅತ್ತಾ ದೊನ್ ವರಿಸ್ ಹೊಲಾ, ಅನಿ ಪಾಂಚ್ ವರಿಸ್ ಪತರ್ ಪೆರುಕ್ ನಾತರ್ ಕಾತ್ರನಿಕ್ ಅವ್ಕಾಸ್ ನಾ. 7 ದೆವಾನ್ ತುಮ್ಕಾ ಅನಿ ತುಮ್ಚ್ಯಾ ಪಿಳ್ಗಿಕ್ ಚಾಲ್ವುಕ್ ಸಾಟ್ನಿ ಅಸೆ ಅಜಾಪ್ ರಿತಿನ್ ತುಮ್ಕಾ ರಾಕ್ವನ್ ಕರುಕ್ ಸಾಟ್ನಿ ಮಾಕಾ ತುಮ್ಚ್ಯಾನ್ ಫಿಡೆಚ್ ಧಾಡ್ಲ್ಯಾನ್. 8 ಮಾಕಾ ಹಿತ್ತೆ ಧಾಡಲೆ ದೆವಾನುಚ್ ತುಮಿ ನೈ, ತೆನಿ ಮಾಕಾ ಪರೊಹ್ ರಾಜ್ಯಾಚೊ ಬಾಬಾ, ಅನಿ ರಾಜ್ವಡ್ಕಿಕ್ ಅಧಿಪತಿ ಅನಿ ಇಜಿಪ್ತ್ ದೆಶ್ಯಾಕ್ ಸಗ್ಳ್ಯಾ ನಮುನ್ಯಾಚೊ ಅಧಿಕಾರಿ ಕರ್ಲ್ಯಾನ್.

9 ತುಮಿ ಮಾಜೊ ಬಾಬಾಕ್ಡೆ ಜಾವ್ನ್ ತುಜೊ ಲೆಕ್ ಜುಜೆ ಅಸೊ ಮನ್ತಾ, ದೆವಾನ್ ಮಾಕಾ ಇಜಿಪ್ತ್ ದೆಶ್ಯಾಕ್ ಅಧಿಪತಿ ಕರುನ್ ನೆಮ್ಲಾ, ತುಮಿ ತಡೊ ಕರಿನಸ್ತಾನಾ ಮಾಜೆಕ್ಡೆ ಯೆವ್ಚೆ, 10 ಹಿತ್ತೆ ಮಾಜ್ಯಾ ಜಗ್ಗೊಳುಚ್ ತುಮಿ ತುಮ್ಚಿ ಪೊರಾ ನಾತ್ರಾ, ಗೊರಾಡೊರಾ, ಬಕ್ರಿ, ಶೆಳಿಯಾ, ಅನಿ ಆಸ್ತಿ ಸಗ್ಳೆಬಿ ಮಾಜ್ಯಾ ವಾಂಗ್ಡಾ ಗೊಶೆನ್ ಪ್ರಾಂತ್ಯಾತ್ ರಾವ್ಕ್ ಹೊತಾ. 11 ಬರ್‍ಗಾಲ್ ಕಳ್ದುಕ್ ಅನಿ ಪಾಂಚ್ ವರಿಸ್ ಹಾಯ್, ತುಮ್ಕಾ ಅನಿ ತುಮ್ಚ್ಯಾ ಕುಟ್ಮಾಕ್ ಅನಿ ಅನಿ ತುಮ್ಕಾ ಹೊತ್ತ್ಯಾ ಸಗ್ಳ್ಯಾಕ್ನಿಬಿ ಗರಿಬ್ಪಾನ್ ಯೆಯ್ನಾ ಸಾರ್ಕೆ ಮಿಯಾ ತುಮ್ಕಾ ಬಾಳಗ್ತಾ ತುಮ್ಚಿ ಜನಾವರಾ ಭುಕೆನ್ ಮರ್ತಲೆ ಮಾಜ್ಯಾನ್ ಬಗುಕ್ ಹೊಯ್ನಾ, ಮನುನ್ ಸಾಂಗಲೆ ತೆಂಕಾ ಕಳ್ವಾ.

12 "ಮಿಯಾಚ್ ಸ್ವತಾ ತುಮ್ಚ್ಯಾ ವಾಂಗ್ಡಾ ಬೊಲಲ್ಯಾಕ್ ತುಮಿಚ್ ಸಾಕ್ಷಿ ಅನಿ ಮಾಜೊ ಭಾವ್ ಬೆಂಜ್ಯಾಮಿನ್ಬಿ ಸಾಕ್ಷಿ, ಹೆ ಸಗ್ಳೆ ಸಾಂಗುನ್ ಬಾಬಾಕ್ ಲಗ್ಗುನಾ ಹಿತ್ತೆ ಬಲ್ವುನ್ ಹಾನಾ", ಮಟ್ಲ್ಯಾನ್. 13 ತುಮಿ ಹಿತ್ತೆ ಇಜಿಪ್ತಾತ್ ಮಾಕಾ ಹೊತ್ತಿ ಮರ್ಯಾದ್ ಅನಿ ಗೌರವ್ ಕಸೆ ಹಾಯ್ ಮನುನ್ ಬಗಟಲ್ಲೆ ಬಾಬಾಕ್ ಸಾಂಗುನ್ ಲಗ್ಗುನಾ ತೆಕಾ ಹಿತ್ತೆ ಬಲ್ವುನ್ ಹಾನಾ, ಮಟ್ಲ್ಯಾನ್.

14 ಮಾನಾ ಜುಜೆನ್ ಅಪ್ಲೊ ಭಾವ್ ಬೆಂಜ್ಯಾಮಿನಾಕ್ ಯಾಂಗ್ ಮಾರುನ್ ರಡ್ಲ್ಯಾನ್, ಅನಿ ಬೆಂಜ್ಯಾಮಿನಾನ್ಬಿ ರಡ್ಲ್ಯಾನ್, 15 ಅನಿ ಅಪ್ಲ್ಯಾ ಭಾವಾಕ್ನಿ ಸಗ್ಳ್ಯಾಕ್ನಿಬಿ ಉಪ್ಪಾ ದಿಲ್ಯಾನ್, ಮಾನಾ ತೆನಿ ಸಗ್ಳ್ಯಾನಿ ತೆಚ್ಯಾ ವಾಂಗ್ಡಾ ಬೊಲ್ಲ್ಯಾನಿ.

16 ಜುಜೆಚಿ ಭಾವಾ ಯೆಲ್ಲಿ ಖಬರ್ ಪರೊಹಾಚ್ಯಾ ರಾಜಾಚ್ಯಾ ಘರಾಕ್ ಪಾವ್ಲಿ, ಪರೊಹ್ ಅನಿ ತೆಚ್ಯಾ ಘರಾಚ್ಯಾ ಲೊಕಾನಿ ಹೆ ಆಯ್ಕುನ್ ಲೈ ಖುಶಿ ಹೊಲ್ಯಾನಿ. 17 ತನ್ನಾ ಪರೊಹಾನ್ ಜುಜೆಕ್ ಬಲ್ವುಕ್ ಲಾವ್ನ್, ತಿಯಾ ತುಜ್ಯಾ ಭಾವಾಕ್ನಿ ಕಳ್ವುಚೆ ಹೊಲ್ಲೊ ಹುಕುಮ್ ಹ್ಯೊ; ತುಮಿ ತುಮ್ಚ್ಯಾ ಗಾಡ್ವಾಂಚ್ಯಾ ವರ್‍ತಿ ಸಗ್ಳಿ ಸಾಮಾನಾ ವಾವುನ್ ಘೆವ್ನ್ ಕಾನಾನ್ ದೆಶ್ಯಾಕ್ ಜಾವ್ನ್ ಥೈತ್ನಾ, 18 ತುಮ್ಚ್ಯಾ ಬಾಬಾಕ್ ಅನಿ ಕುಟ್ಮಾಚ್ಯಾ ಸಗ್ಳ್ಯಾಕ್ನಿ ಬಲ್ವುನ್ಗೆವ್ನ್ ಮಾಜೆಕ್ಡೆ ಯೆವಾ, ಇಜಿಪ್ತಾತ್ ತುಮ್ಕಾ ಲೈ ಬರೊ ಜಾಗೊ ದಿತಾ, ಅನಿ ತುಮ್ಕಾ ಹ್ಯಾ ದೆಶ್ಯಾತ್ ಸುಕ್ ಅನಿ ಆಸ್ತಿ ಗಾವ್ತಾ. 19 ತುಜಾ ಭಾವಾಕ್ನಿ ತೆಂಚ್ಯಾ ಬಾಯ್ಕೊ ಪೊರಾಕ್ನಿ ಅನಿ ಬಾಬಾಕ್ ಹಾನುಕ್ ಇಜಿಪ್ತಾಕ್ನಾ ರಥಾ ಘೆವ್ನ್ ಜಾವಾ; ಅನಿ ತೆಂಕಾ ಘೆವ್ನ್ ಯೆವ್ಕ್ ಸಾಂಗ್, 20 ಆಸ್ತಿಚ್ಯಾ ವಿಶಯಾತ್ ತುಮಿ ಚಿಂತ್ತಲೆ ನಕ್ಕೊ, ಇಜಿಪ್ತಾತ್ ಲೈ ಬರೊ ಭಾಗ್ ತುಮ್ಕಾ ಗಾವ್ತಾ,

21 ಜಾಕೊಬಾಚ್ಯಾ ಪೊರಾನಿ ತಸೆಚ್ ಕರ್ಲ್ಯಾನಿ, ಪರೊಹಾಚ್ಯಾ ಹುಕುಮಾ ಸಾರ್ಕೆ ಜುಜೆನ್ ತೆಂಕಾ ವಾಟೆರ್ ಪಾಜೆ ಹೊಲ್ಲೆ ಜೆವಾನ್ ಅನಿ ಘೊಡ್ಕಿಯಾಂಚಿ ರಥಾ ದಿವ್ನ್ ಧಾಡ್ಲ್ಯಾನ್, 22 ಅನಿ ತವ್ಡೆಚ್ ನಸ್ತಾನಾ ಹರ್ ಎಕ್ಲ್ಯಾಕ್ಬಿ ನ್ಹವೆ ಕಪ್ಡೆ ನೆಸ್ವುನ್ ಧಾಡ್ಲ್ಯಾನ್, ಅನಿ ಬೆಂಜ್ಯಾಮಿನಾಕ್ ತಿನ್ಸೆ ಚಾಂದಿಚೆ ಪೈಸೆ, ಅನಿ ಪಾಂಚ್ ಜೊಡಿ ಕಪ್ಡೆ ದಿಲ್ಯಾನ್, 23 ಅಪ್ಲ್ಯಾ ಬಾಬಾ ಸಾಟ್ನಿ ಇಜಿಪ್ತ್ ದೆಶ್ಯಾಚಿ ಬರಿ ಸಾಮಾನಾ ಧಾ ಗಂಡ್ ಗಾಡ್ವಾ ವೈನಿ ವಾವುನ್, ಅನಿ ಧಾ ಹೆನ್ನ್ ಗಾಡ್ವಾರ್ನಿ ದಾನೆ ಅನಿ ಜೆವ್ನಾಕ್ ಪಾಜೆ ಹೊಲ್ಲೆ ಸಗ್ಳೆ ದಿವ್ನ್ ಧಾಡ್ಲ್ಯಾನ್. 24 ಅನಿ ಅಪ್ಲ್ಯಾ ಭಾವಾಕ್ನಿ ವಾಟೆ ವರ್‍ತಿ ಝಗ್ಡುನಕಾಸಿ ಮನುನ್ ಸಾಂಗುನ್ ಧಾಡ್ಲ್ಯಾನ್, ತೆನಿ ಗೆಲೆ.

25 ತೆನಿ ಇಜಿಪ್ತಾಕ್ನಾ ಜಾವ್ನ್ ಅಪ್ಲೊ ಬಾಬಾ ಜಾಕೊಬಾಕ್ಡೆ ಕಾನಾನಾಕ್ ಪಾವ್ಲೆ, 26 ಅನಿ ಜುಜೆ ಅಜುನ್ ಝಿತ್ತೊ ಹಾಯ್, ಅನಿ ತೊ ಇಜಿಪ್ತ್ ದೆಶ್ಯಾಚೊ ಅಧಿಪತಿ ಹೊಲಾ ಮನುನ್ ಕಳ್ವುಲ್ಯಾನಿ, ತೆನಿ ಹೆ ಆಯ್ಕುನ್ ತೆಂಚೊ ಬಾಬಾ ಕಂಗಾಲ್ ಹೊಲೊ ಅನಿ ತೆಂಚ್ಯಾ ಗೊಸ್ಟಿಕ್ ವಿಶ್ವಾಸ್ ಕರುಕ್ನಾ.

27 ಖರೆ ಜುಜೆನ್ ಸಾಂಗುನ್ ಧಾಡಲಿ ಗೊಸ್ಟ್ ಅನಿ ಪರ್ಯಾನಾಕ್ ಪಾಜೆ ಹೊಲ್ಲೆ ರಥಾ ಬಗುನ್ ಜಾಕೊಬಾಕ್ ಖುಶಿ ಹೊಲೊ ಅನಿ ನ್ಹವ್ವೊ ಜಿವ್ ಯೆಲ್ಯಾ ಸಾರ್ಕೆ ಹೊಲೆ, 28 ಮಾನಾ ಜಾಕೊಬಾನ್, "ಮಾಜೊ ಲೆಕ್ ಜುಜೆ ಝಿತ್ತೊ ಹಾಯ್ ಮನುನ್ ಮಿಯಾ ವಿಶ್ವಾಸ್ ಕರ್ತಾ, ಮಾಕಾ ತವ್ಡೆಚ್ ಫಿರೆ! ಮಿಯಾ ಮರುಚ್ಯಾ ಅದ್ದಿಚ್ ಜಾವ್ನ್ ತೆಕಾ ಬಗ್ತಾ" ಮಟ್ಲ್ಯಾನ್.