Ezequiel 39

गोग राज़ेरी सेनारो नाश

1 यहोवा इन भी ज़ोते, ओ नाश भोने बाला मैन्हु, गोगेरे खलाफ नबूवत केरतां एन ज़ो, हे गोग राज़ा, रोश, मेशेक ते तूबल नगरां केरे प्रधान, परमेशर यहोवा एन ज़ोते: अवं तेरे खलाफ आईं। 2 अवं तीं घुमेइतां वापस आनेलो, ते उत्तरेरे दूर-दूर मुल्खेरां चढ़ाई केरतां आनेलो, ते इस्राएलेरे पहाड़न पुड़ पुज़ेइलो। 3 तैड़ी अवं तेरू धनुष तेरे बांए हथ्थे मरां बिछ़ोड़ेलो, ते तेरे तीरन तेरे देइने हथ्थे मरां बिछ़ोड़ेलो। 4 तू अपने सैरी सेनाई समेत ज़ैना कौमां तीं सेइं साथी आन तैन समेत इस्राएलेरे पहाड़न पुड़ मारो गालो; अवं तीं किसमे-किसमेरे मास खानेबाले च़ुड़ोलू ते जंगली जानबरां केरि खूराक बनेइलो। 5 तुसां खुल्‍ले मैइदाने मां मेरतां बिछ़ड़ेले, किजोकि मीएं एन ज़ोवरूए, परमेशर यहोवा एन ज़ोते। 6 अवं मागोग प्रदेशे मां ते जज़ीरां केरे निडर रानेबालां केरे मझ़ाटे अग लेइलो; ते तैन्न पतो लग्गेलो कि अवं यहोवा आईं।✝39:6 आम. 1:10.

7 "अवं अपने इस्राएली लोकन मां अपनु नवं बांदो केरेलो; ते अपनु पवित्र नवं फिरी अपवित्र न भोने देइलो; तैखन कौमां-कौमां केरे लोकन भी पतो लग्गेलो कि अवं इस्राएलेरो पवित्र यहोवा आईं। 8 एन्च़रे भोनेबालूए, ते भोइ गालू, परमेशर यहोवा एन ज़ोते। ऐह तैए दिहाड़ीए ज़ेसेरे बारे मां मीं ज़ोवरू थियूं।

9 "तैखन इस्राएलेरे नगरन मां रानेबाले निस्सेले ते हथियारन अग लेइतां फुक्‍की देले, ढाल ते फरी, धनुष ते तीर, सोटी, बर्छे एन सेभन सत सालन तगर फुकते राले। 10 एन्च़रे सेइं तैना जंगले मरां कैड़ु न आनेले, न जंगले मां कट्टेले, किजोकि तैना हथियारन फुकते राले; ते तैना अपने लुटने बालन लुटते राले, ते अपने थिसोड़ने बालन करां थिसोड़ेले, परमेशर यहोवा एन ज़ोते।"

गोग राज़ेरे लेई कब्रास्तान

11 "तैस मौके अवं गोगे इस्राएल मुल्खे मां कब्रास्तान देइलो, तैन समुन्दरेरे पूर्वी पासे भोल्हु; तैस जो एजने गाने बालां केरि वादी ज़ोले, ते एजने गानेबालन तैड़ी रुकनू पेनूए; तैड़ी सेभी सेनाई समेत गोग दब्बो गालो ते तैस ठारारू नवं गोगेरी भीड़री वादी पेलू। 12 इस्राएली लोकन सत महीन्न तगर तैन केरि लाशां दबते राले ताके अपने मुल्खे शुद्ध केरन। 13 मुल्खेरे सारे लोक मिलतां तैन्न दबेले; ते ज़ैस मौके मेरी महिमा भोल्ही, तैस मौके इस्राएली केरू नवं भी महान भोल्हु, परमेशर यहोवा एन ज़ोते। 14 तैखन इस्राएली लोक मैन्हन च़ुनेले, ज़ैना लगातार एस्से कम्मे मां लगोरे राले, मतलब मुल्खे मां हेंठी फिरतां एजने गानेबालन सेइं साथी भोइतां मुल्खे शुद्ध केरनेरे लेई तैन लाशन ज़ैना तल्‍ले पेवरी भोन दबेले; ते सत महीने बीतने तगर तैना तोप्पी-तोप्पी एन कम केरते राले। 15 मुल्खे मांमेइं एजते गांते बार अगर कोन्ची मैन्हु कोन्ची मैन्हेरी हड्डी मैल्हे, त तै मैन्हु तैखन तगर निशान खड़ो केरेलो, ज़ांतगर दबने बाले तैस गोगेरी सेनारी वैदी मां न दब्बन। 16 तैट्ठेरे नगरेरू नवं भी ‘हमोना’ आए। एस तरीके सेइं मुल्ख शुद्ध कियो गालो।

अक ज़ींतनेरो जशन

17 "फिरी ओ नाश भोने बाला मैन्हु, परमेशर यहोवा एन ज़ोते: किसमे-किसमेरे उडरने बाले च़ुड़ोलन ते सेभी जंगली जानबरन हुक्म दे, अकोट्ठे भोइतां एज्जा मेरे इस बड्डे बलिदानेरे जगे मां ज़ैन अवं इस्राएलेरे पहाड़न पुड़ केरताईं, हर पासेरां अकोट्ठे भोथ कि तुसां मास खाथ ते खून पीया। 18 तुसां शूरबीरां केरू मास खाएले, ते धेरतरे प्रधाना केरो खून पीले ते हुड़, गबड़ां, थाव्वे ते दांतां केरू भी ज़ैना सारे बाशानेरे तियार कियोरे भोल्हे। 19 मेरे तैस धांमरे चेर्भी सेइं ज़ै अवं तुश्शे लेई तियार केरताईं, तुस खाते-खाते रेज़्ज़तां खाएले ते खून पीते-पीते मसत भोइ गाले। 20 तुसां मेरे धांमरे मेज़े पुड़ घोड़े, सुवार ते शूरबीरन ते हर किसमेरे जंगी सिपेहिन सेइं रेज़्ज़ी गाले, परमेशर यहोवा एन ज़ोते।

इस्राएल दुबारां आबाद भोते

21 "अवं कौमी-कौमी मां अपनि महिमा बांदी केरेलो, ते कौमां-कौमां केरे सारे लोक मेरे न्यायेरे कम्मे ज़ैन अवं केरेलो, ते मेरो हथ हेरेले ज़ै तैन पुड़ पेलो। 22 तैस दिहाड़े करां इस्राएलेरे घराने पतो लग्गेलो कि यहोवा इश्शो परमेशरे। 23 कौमां-कौमां केरे लोकन भी पतो लग्गेलो कि इस्राएली लोक अपने अधर्मेरे वजाई सेइं गुलैमी मां च़ले जेवरे थिये; किजोकि तैनेईं मीं सेइं एरहो धोखो कियो कि मीं अपनु तुत्तर तैन करां फिरवं, ते तैना तैन केरे दुश्मना केरे हथ्थे केरि दित्ते, ते तैना सब तलवारी सेइं मारे जे। 24 मीं तैन केरि अशुद्धता ते पापां केरे मुताबिक तैन सेइं बर्ताव केरतां तैन करां अपनु तुत्तर फिरावरू थियूं।

25 "एल्हेरेलेइ परमेशर यहोवा एन ज़ोते: कि हुनी अवं याकूबे गुलैमी मरां वापस आनेलो, ते इस्राएली लोकन पुड़ दया केरेलो; ते अपने पवित्र नंव्वेरे लेई मीं जलन भोल्ही। 26 तैखन तैस सारे धोखेरे वजाई सेइं तैना शरमिन्दे भोल्हे ज़ै तैनेईं मेरे खलाफ कियोरो थियो; ते अपने मुल्खे मां निडर राले, ते तैन कोई न डरालो। 27 ज़ैखन अवं तैन कौमी-कौमी मरां वापस आनेलो, ते तैन दुश्मना केरे मुल्खन मरां अकोट्ठे केरेलो, तैखन बेड़ि कौमां केरि नज़री मां तैन केरे ज़िरिये पवित्र ठहरेलो। 28 तैखन तैन्न पतो लग्गेलो कि यहोवा इश्शो परमेशरे, किजोकि मीं तैना कौमी-कौमी मां गुलाम बनेइतां फिरी तैना तैन केरे अपने मुल्खे मां अकोट्ठे कियोरेन। अवं तैन मरां कोई भी बखले मुल्खे मां न छ़डेलो, 29 ते फिरी तैन करां अपनु तुत्तर कधे न फिरेइलो, किजोकि मीं इस्राएली लोकन पुड़ अपनि आत्मा छ़डोरीए, परमेशर यहोवा एन ज़ोते।"