1 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଫାରୋ ଡାଗ୍ରା ୱେଲା; ମେଃଡାଗ୍‌ଲା ନେ ଡିରକମ୍‌ ଆକେନ୍‌ ରେମୁଆଁଇଂନେ ବିତ୍‌ରେ ଆକେନ୍‌ ସାପା ଚିନ୍‌ ନେରାସୁଏଃଏ । 2 ଆରି ନେ ମିସ୍ରିୟଇଂନେ ଆଡ଼ାତ୍ରା ମେଃ ମେଃ ଡିଂନେବକେ ଆରି ମେଙ୍ଗ୍‌ନେ ବିତ୍‌ରେ ନେ ଚିନ୍ ରକମ୍‌ ମେଃ ମେଃନେ କାମ୍‌ ଡିଂନେବକେ, ଆତେନ୍‌ ସାପା ଗଟ୍‌ନା ପେ ଡିରକମ୍‌କି ପେଉଂକେ ଆରି ଉଂନେ ଉଂକେ ପେବାସଙ୍ଗ୍‌ଏ, ଆରି ନେ ଯେ ମାପ୍‌ରୁ ଆକେନ୍‌ ମେଇଂ ମ୍ୟାଃଆର୍‌ଏ ।"

3 ଆତେନ୍‌ ବେଲା ମୋଶା ଆରି ହାରୋଣ ଫାରୋ ଡାଗ୍ରା ୱେଚେ ବାସଙ୍ଗ୍‌କେ, "ଏବ୍ରୀୟଇଂନେ ମାପ୍‌ରୁ ପର୍‌ମେସର୍‌ ବାସଙ୍ଗ୍‌ଡିଂକେ, ନା ନେଙ୍ଗ୍‌ ଡାଗ୍ରା ଦରମ୍‌ ଡିଂନେସା ଉଡ଼ିଦିନ୍‌ ଜାକ ମନା ନାଡିଂଏ ? ନେନେ ସେବା ଡିଂନେସା ନେ ରେମୁଆଁଇଂକେ ଆନ୍ତାର୍‌ବି । 4 ଜଦି ନେଙ୍ଗ୍‌ନେ ରେମୁଆଁଇଂକେ ୱେନ୍‌ସା ମନା ନାଡିଂଏ, ତେଲା ନାକେଏ, ନେ ଞ୍ଜଡ଼େ ପେ ଇନି ଗିତାଙ୍ଗ୍‌ଡ଼ିଆଃଇଂ ନେବେଏ । 5 ମେଇଂ ତୁବଃ ଆଡ଼ାତ୍ରା ଦେକ୍‌ରକମ୍‌ ଚୁନ୍‌ଚୁନା ଆଡିଂବିଆର୍‌ଏ ଜେ, ଜା ଆତେନ୍‌ କେଆୟାଆର୍‌ ଣ୍ଡୁ; ବାରି ଆରେଣ୍ଡିଆବାନ୍‌ ରକ୍ୟା ବାନେ ଆରି ପେନେ ଉଡ଼ି ମ୍ବ୍ରଲେକେ, ଆତେନ୍‌ ମେଇଂ ଚଙ୍ଗ୍‌ବିଏ, ବାରି ପେନି ଲିଜଅରିଆ ଲେକ୍ନେ ସାପା ସ୍ଲାଃ ପାଃଡ଼ୁଇଂ ଚଙ୍ଗ୍‌ବିଏ । 6 ବାରି ମେଙ୍ଗ୍‌ନେବାନ୍‌ ପେନି ଡୁଆ ଆରି ପେନି ଚାକର୍‌ଇଂନେ ଡୁଆ ଆରି ସାପା ମିସ୍ରିୟଇଂନେ ଡୁଆ ବର୍ତି ଡିଂଏ; ଆକେନ୍‌ ଦେସ୍‌ନେ ପେନି ନ୍ତାଞ୍ଜାଇଂନେ ଆରି ମେଙ୍ଗ୍‌ନେ ନ୍ତାଞ୍ଜାଇଂନେ ଜନମ୍‌ ଡିଂକ୍ନେବାନ୍‌ ଏଃ ଜାକ ଅଃନା ଦେକ୍‌ରକମ୍‌ ଡିଂନେ କେଆଲେଆର୍‌ଗେ ।" ଆତ୍‌ବା ମୋଶା ପ୍ଲେଗ୍‌ଚେ ଫାରୋ ଡାଗ୍ରାବାନ୍‌ ତାର୍‌ୱେକେ ।

7 ଏନ୍‌ଇଡ଼ିଂ ଫାରୋନେ ଚାକର୍‌ଇଂ ଆମେକେ ବାସଙ୍ଗ୍‌ଆର୍‌କେ, "ଆକେନ୍‌ ରେମୁଆଁ ଉଡ଼ି ମୁଆଁ ଜାକ ଆନେକେ ବ୍ନେଗ୍‌ ରକମ୍‌ ଡିଂଲେଃଏ ? ଆକେନ୍‌ ରେମୁଆଁଇଂନେ ମାପ୍‌ରୁ ପର୍‌ମେସର୍‌ନେ ସେବା ଡିଂନେସା ଆକ୍ମେଇଂକେ ଆନ୍ତାର୍‌ବିପା; ମିସର୍‌ ଦେସ୍‌ ଜେ, ନଷ୍ଟ ଡିଂଡିଂକେ, ଆକେନ୍‌ ପେ ଏବେ ଜାକ ପେମ୍ୟାଃକେ ଣ୍ଡୁ ?"

8 ତେଲା ମୋଶା ଆରି ହାରୋଣକେ ବାର୍‌ମୁଇଂତର୍‌ ଫାରୋ ଡାଗ୍ରା ରାଙ୍ଗ୍‌ପାଙ୍ଗ୍‌ଆର୍‌କେ, ମେଁ ଆମେଇଂକେ ବାସଙ୍ଗ୍‌କେ, ୱେଲାପା, ପେନି ମାପ୍‌ରୁ ପର୍‌ମେସର୍‌ନେ ସେବା ଡିଂପା; ମାତର୍‌ ଜା ଜା ପେୱେଏ ?

9 ଆତ୍‌ବା ମୋଶା ବାସଙ୍ଗ୍‌କେ, ନେ ନେନେ ଗଡ଼େଇଂକେ ଆରି ଡକ୍ରା ସାପାରେକେ ନେ ଏତେ ରାଙ୍ଗ୍‌ନେୱେଏ ଆରି ନେ ନେନେ ଗଡ଼େଇଂକେ, ବାରି ଅରେଃ ମେଣ୍ଡାଇଂକେ ଡିଗ୍‌ ନେ ଏତେ ରାଙ୍ଗ୍‌ନେୱେଏ, ମେଃଡାଗ୍‌ଲା ମାପ୍‌ରୁନେ ମ୍ନିରେ ନେ ପାଣ୍ଡେଃ ଡିଂନେ ପଡ଼େଏ ।

10 ତେଲା ଫାରୋ ଆମେଇଂକେ ବାସଙ୍ଗ୍‌କେ, "ଆଁ ଡିଂପା, ମାପ୍‌ରୁ ପେ ଏତେ ଲେଃଲେ, ନେ ତ ଆପେକେ ଆରି ପେନି ଗଡ଼େଇଂକେ ୱେନ୍‌ସା ଆନ୍ତାର୍‌ନେବିଏ; ମାତର୍‌ ସାବ୍‌ଦାନ୍‌, ବିପଦ୍‌ ପେ ସେଃମଁ ଲେଃକେ । 11 ଦେକ୍‌ରକମ୍‌ ଆଡିଂ ଣ୍ଡୁ, ପେ ଉଡ଼ିରୁଆ ଙ୍ଗିର୍‌ବୁଏ ପେଲେକେ, ୱେଲାପା, ମାପ୍‌ରୁନେ ସେବା ଡିଂପା; ମେଃଡାଗ୍‌ଲା ଆକେନ୍‌ ପେ ଚାଏଁ ପେଡିଂକେ ।" ଆତ୍‌ବା ମେଇଂ ଫାରୋନେ ସେଃମଁବାନ୍‌ ଆତାର୍‌ ବିଆର୍‌କେ ।

12 ଏନ୍‌ଇଡ଼ିଂ ମାପ୍‌ରୁ ମୋଶାକେ ବାସଙ୍ଗ୍‌କେ, "ନା ମିସର୍‌ ଦେସ୍‌ ଆଡ଼ାତ୍ରା ଗିତାଙ୍ଗ୍‌ଡ଼ିଆଃ ଡିଂନେସା ନାନେ ନ୍ତିକେ ଆଡ଼ାତ୍ରା ଲିଙ୍ଗ୍‌, ଆତ୍‌ବା ମେଇଂ ମିସର୍‌ ଦେସ୍‌ ପାଙ୍ଗ୍‌ଚେ ଆରେଣ୍ଡିଆ ଆଗୁର୍‌କ୍ନେବାନ୍‌ ଉଡ଼ି ରକ୍ୟା ବାଲେକ୍ନେ ତୁବଃନେ ଆମାଃଇଲି ସାପାକେ ଚଙ୍ଗ୍‌ବିଏ ।" 13 ଆତ୍‌ବା ମୋଶା ମିସର୍‌ ଦେସ୍‌ନେ ମିନି ସାଚେ ମେଁନି ଡୁଡୁକେ ଆଡ଼ାତ୍ରା ଟେକେଲା, ମାପ୍‌ରୁ ଆତେନ୍‌ ସ୍ମି ମିଡିଗ୍‌ ଆତେନ୍‌ ଦେସ୍‌ଅରିଆ ଅଃସେ ଦିଗ୍‌ ପାକାବାନ୍‌ ୱେଡ଼ିଆ ବେକେ; ଞ୍ଜିର୍‌ ଡିଂଲା, ଅଃସେ ଦିଗ୍‌ବାନ୍‌ ପାଙ୍ଗ୍‌କ୍ନେ ୱେଡ଼ିଆ ଏତେ ଗିତାଙ୍ଗ୍‌ଡ଼ିଆଃଇଂ ପାଙ୍ଗ୍‌ଆର୍‌କେ । 14 ଆତ୍‌ବା ସାପା ମିସର୍‌ ଦେସ୍‌ନିଆ ଗିତାଙ୍ଗ୍‌ଡ଼ିଆଃଇଂ ଡିଂୱେଗେ, ମିସର୍‌ନେ ସାପା ଏରିଆ ଗିତାଙ୍ଗ୍‌ଡ଼ିଆଇଂ ଲଃଆର୍‌କେ; ମେଇଂ ବୟ୍‌ଙ୍କାର୍‌ ଲେଆର୍‌ଗେ; ଦେକ୍‌ରକମ୍‌ ଅଃନାଡିଗ୍‌ ଗିତାଙ୍ଗ୍‌ଡ଼ିଆଃଇଂ ଡିଂଆଲେଃଗେ, କି ଆରି ଅଃନା ଆଡିଂ ଣ୍ଡୁ । 15 ମେଇଂ ସାପା ତୁବଃ ଆଡ଼ାତ୍ରା ଡାବିଆର୍‌କେ ଆରି ମେଇଂନେବାନ୍‌ ଆତେନ୍‌ ଦେସ୍‌ ତାଂକିଗ୍‌ ଡିଂୱେଗେ, ତୁବନିଆ ଲେକ୍ନେ ଆମାଃଇଲି ଆରି ସ୍ଲାଃନେ ଚୁଚୁଇଂ ଆରେଣ୍ଡିଆଃ ଗୁର୍‌କ୍ନେବାନ୍ ଉଃଡ଼ି ମ୍ବ୍ରଲେଆର୍‌ଗେ, ଆତେନ୍‌ ମେଇଂ ଚଙ୍ଗ୍‌ବିଆର୍‌କେ; ଆତ୍‌ବା ସାପା ମିସର୍‌ ଦେସ୍‌ନିଆ ମେଃଡିଗ୍‌ ସ୍ଲାଃ କି ଲିଜନ୍ନିଆ ଲିଲି ଲେକ୍ନେ ପାଃଡ଼ୁଇଂ ବାରି ଆମାଃଇଲି ମେଃଡିଗ୍‌ ଆବଆର୍‌କେ ଣ୍ଡୁ ।

16 ଆତ୍‌ବା ଫାରୋ ଜିଆଃ ଜିଆଃ ମୋଶା ଆରି ହାରୋଣକେ ୱାଚେ ବାସଙ୍ଗକେ, "ନେ ପେନେ ମାପ୍‌ରୁ ପର୍‌ମେସର୍‌ନିଆ ଆରି ପେ ବିରଦ୍‌ରେ ପାପ୍‌ ଡିଂମ୍ୱକେ । 17 ଗୁଆରି ଡିଂନେଡିଂକେ, ଏବେ ମୁଇଂତର୍‌ ଆନେକେ ପାପ୍‌ କେମା ଡିଂଚେ ନେ ଡାଗ୍ରାବାନ୍‌ ଆକେନ୍‌ ମରନ୍‌ ଦୁର୍‌ ଆଡିଂନେସା ପେନି ମାପ୍‌ରୁ ପର୍‌ମେସର୍‌ ଡାଗ୍ରା ପାର୍‌ତନା ଡିଂପା ।" 18 ଆତ୍‌ବା ମେଁ ଫାରୋବାନ୍‌ ୱେଚେ ମାପ୍‌ରୁ ଡାଗ୍ରା ପାର୍‌ତନା ଡିଂକେ, 19 ମାପ୍‌ରୁ ବୟଙ୍କାର୍‌ ପଶ୍ଚିମ୍‌ ଦିଗ୍‌ବାନ୍‌ ୱେଡ଼ିଆ ବେଚେ ଦେସ୍‌ବାନ୍‌ ଗିତାଙ୍ଗ୍‌ଡ଼ିଆଃଇଂକେ ଡୁଙ୍ଗ୍‌ୱେ ରାଙ୍ଗ୍‌ଡଚେ ସୁପ କେଣ୍ଡିଆଃନିଆ ଜଗ୍‌ତ୍ଲାଗ୍‌ ବିକେ; ଆତ୍‌ବା ମିସର୍‌ନେ ଆଣ୍ଡିନେ ଜାଗାନ୍ନିଆ ଡିଗ୍‌ ମୁଇଂଡିଗ୍‌ ଗିତାଙ୍ଗ୍‌ଡ଼ିଆଃଇଂ ଆଲେଗେ ଣ୍ଡୁ । 20 ମାତର୍‌ ମାପ୍‌ରୁ ଫାରୋନେ ମନ୍‌କେ ଡାଟ୍‌ ଆଡିଂକେ, ବାରି, ମେଁ ଇସ୍ରାଏଲ୍‌ ରେମୁଆଁଇଂକେ ଆଆନ୍ତାର୍‌କେ ଣ୍ଡୁ ।

21 ଆରି ମାପ୍‌ରୁ ମୋଶାକେ ବାସଙ୍ଗ୍‌କେ, "ନା କିତଙ୍ଗ୍‌ଇନି ଆଡ଼ାତ୍ରା ନ୍ତି ଟେକେ, ଆତ୍‌ବା ମିସର୍‌ ଦେସ୍‌ନିଆ ତାଂକିଗ୍‌ ଡିଂଏ ଆରି ତାଂକିଗ୍‌ଲା ରେମୁଆଁଇଂ ଆଲାପୁତା ଆର୍‌ଏ ।" 22 ଏନ୍‌ଇଡ଼ିଂ ମୋଶା କିତଙ୍ଗ୍‌ଇନି ଆଡ଼ାତ୍ରା ନ୍ତି ଟେକେଲା, ଜିର୍‌ସି ଜାକ ମିସର୍‌ ଦେସ୍‌ନେ ସାପା ପାକା ଦେକ୍‌ରକମ୍ ତାଂକିଗ୍‌କେ ଜେ, ଜାଡିଗ୍‌ ଆଜାକେ କେଆୟାଆର୍‌କେ । 23 ବାରି ଜିର୍‌ସି ଜାକ ଜାଡିଗ୍‌ ନିଜେନେ ଜାଗାବାନ୍‌ ତଃଡ଼ିଆ ଆୟାଆର୍‌କେ ଣ୍ଡୁ; ମାତର୍‌ ଇସ୍ରାଏଲ୍‌ ରେମୁଆଁଇଂନେ ସାପା ଡୁଆ ତାର୍‌କିଗ୍‌ ଲେଃଗେ ।

24 ଆତ୍‌ବା ଫାରୋ ମୋଶାକେ ୱାଚେ ବାସଙ୍ଗ୍‌କେ, "ପେ ମାପ୍‌ରୁକେ ସେବା ଡିଂନେସା ୱେଲାପା; ମୁଇଂ ପେନେ ଅରେଃ ଗିମିଃଇଂ ଲେଆର୍‌ଲେ; ପେନି ଗଡ଼େଇଂ ଡିଗ୍‌ ପେ ଏତେ ୱେଆର୍‌ଲେ ।"

25 ଆତ୍‌ବା ମୋଶା ଫାରୋକେ ବାସଙ୍ଗ୍‌କେ, "ନେ ପେନି ମାପ୍‌ରୁ ପର୍‌ମେସର୍‌ନେ ମ୍ନିରେ ଆଣ୍ଡିନେ ବଲି ଆରି ସୁଆ ବଲି ଜିନିସ୍‌ ନେବିଏ, ଆତେନ୍‌ ଡିଗ୍‌ ନେ ନ୍ତିବାନ୍‌ ଆନାକେ ବିଃନେ ପଡ଼େଏ । 26 ନେନେ ପସୁଇଂ ନେ ଏତେ ୱେଆର୍‌ଏ, ମୁଇଂ ପସୁ ଡିଗ୍‌ ଆତ୍ଅରିଆ ଆଲେ ଣ୍ଡୁ; ମେଃଡାଗ୍‌ଲା ନେନେ ମାପ୍‌ରୁ ପର୍‌ମେସର୍‌ନେ ସେବା ଆତ୍‌ଲା ମେଙ୍ଗ୍‌ନେବାନ୍‌ ବଲି ଡୁଂୱେନେ ପଡ଼େଏ; ବାରି ମେଃ ବିଃଚେ ମାପ୍‌ରୁନେ ସେବା ଡିଂନେ ପଡ଼େଏ, ଆତେନ୍‌ ଆତ୍ଅରିଆ ଆୱେଚାଲା, ନେ ମ୍ୟାଃ ନେୟା ଣ୍ଡୁ ।"

27 ମାତର୍‌ ମାପ୍‌ରୁ ଫାରୋନେ ମନ୍‌କେ ଡାଟ୍‌ ଆଡିଂକେ, ବାରି ମେଁ ଆମେଇଂକେ ଆନ୍ତାର୍‌ନ୍‌ସା ରାଜି ଆଡିଂକେ ଣ୍ଡୁ । 28 ତେନ୍‌ସା ଫାରୋ ଆମେକେ ବାସଙ୍ଗ୍‌କେ, "ନେ ଡାଗ୍ରାବାନ୍‌ ଲାଗ୍‌ଡଲା, ନା ବିସ‍ଏରେ ତରକ୍‌ ଲାଃଲା, ନେ ସାର୍ମୁଆଃ ଆରି ଅଃନା ଆକେଗେ; ଆଣ୍ଡିନେ ଦିନା ନେନେ ସାର୍ମୁଆଃ ନାକେଏ, ଆତେନ୍ ଦିନା ନାଗୁଏଃଏ ।"

29 ଆତ୍‌ବା ମୋଶା ବାସଙ୍ଗ୍‌କେ, "ନା ନିମାଣ୍ଡା ନାବାସଙ୍ଗ୍‌କେ, ନେଙ୍ଗ୍‌ ଅଃନା ଆରି ନା ସାର୍ମୁଆଃ ନାକେ ଣ୍ଡୁ ।"