12 ଏନ୍ଇଡ଼ିଂ ମାପ୍ରୁ ମୋଶାକେ ବାସଙ୍ଗ୍କେ, "ନା ମିସର୍ ଦେସ୍ ଆଡ଼ାତ୍ରା ଗିତାଙ୍ଗ୍ଡ଼ିଆଃ ଡିଂନେସା ନାନେ ନ୍ତିକେ ଆଡ଼ାତ୍ରା ଲିଙ୍ଗ୍, ଆତ୍ବା ମେଇଂ ମିସର୍ ଦେସ୍ ପାଙ୍ଗ୍ଚେ ଆରେଣ୍ଡିଆ ଆଗୁର୍କ୍ନେବାନ୍ ଉଡ଼ି ରକ୍ୟା ବାଲେକ୍ନେ ତୁବଃନେ ଆମାଃଇଲି ସାପାକେ ଚଙ୍ଗ୍ବିଏ ।" 13 ଆତ୍ବା ମୋଶା ମିସର୍ ଦେସ୍ନେ ମିନି ସାଚେ ମେଁନି ଡୁଡୁକେ ଆଡ଼ାତ୍ରା ଟେକେଲା, ମାପ୍ରୁ ଆତେନ୍ ସ୍ମି ମିଡିଗ୍ ଆତେନ୍ ଦେସ୍ଅରିଆ ଅଃସେ ଦିଗ୍ ପାକାବାନ୍ ୱେଡ଼ିଆ ବେକେ; ଞ୍ଜିର୍ ଡିଂଲା, ଅଃସେ ଦିଗ୍ବାନ୍ ପାଙ୍ଗ୍କ୍ନେ ୱେଡ଼ିଆ ଏତେ ଗିତାଙ୍ଗ୍ଡ଼ିଆଃଇଂ ପାଙ୍ଗ୍ଆର୍କେ । 14 ଆତ୍ବା ସାପା ମିସର୍ ଦେସ୍ନିଆ ଗିତାଙ୍ଗ୍ଡ଼ିଆଃଇଂ ଡିଂୱେଗେ, ମିସର୍ନେ ସାପା ଏରିଆ ଗିତାଙ୍ଗ୍ଡ଼ିଆଇଂ ଲଃଆର୍କେ; ମେଇଂ ବୟ୍ଙ୍କାର୍ ଲେଆର୍ଗେ; ଦେକ୍ରକମ୍ ଅଃନାଡିଗ୍ ଗିତାଙ୍ଗ୍ଡ଼ିଆଃଇଂ ଡିଂଆଲେଃଗେ, କି ଆରି ଅଃନା ଆଡିଂ ଣ୍ଡୁ । 15 ମେଇଂ ସାପା ତୁବଃ ଆଡ଼ାତ୍ରା ଡାବିଆର୍କେ ଆରି ମେଇଂନେବାନ୍ ଆତେନ୍ ଦେସ୍ ତାଂକିଗ୍ ଡିଂୱେଗେ, ତୁବନିଆ ଲେକ୍ନେ ଆମାଃଇଲି ଆରି ସ୍ଲାଃନେ ଚୁଚୁଇଂ ଆରେଣ୍ଡିଆଃ ଗୁର୍କ୍ନେବାନ୍ ଉଃଡ଼ି ମ୍ବ୍ରଲେଆର୍ଗେ, ଆତେନ୍ ମେଇଂ ଚଙ୍ଗ୍ବିଆର୍କେ; ଆତ୍ବା ସାପା ମିସର୍ ଦେସ୍ନିଆ ମେଃଡିଗ୍ ସ୍ଲାଃ କି ଲିଜନ୍ନିଆ ଲିଲି ଲେକ୍ନେ ପାଃଡ଼ୁଇଂ ବାରି ଆମାଃଇଲି ମେଃଡିଗ୍ ଆବଆର୍କେ ଣ୍ଡୁ ।
Publicidade