ବ୍ରିବାନ୍ ଣ୍ଡିଆ
1 ଏନ୍ଇଡ଼ିଂ ଇସ୍ରାଏଲ୍ ଗଡ଼େଇଂନେ ସାପା ମଣ୍ଡଲି ସୀନ୍ କଣ୍ଡା ଆଡ଼ାବାନ୍ ଅଲେଙ୍ଗ୍ଚେ ମାପ୍ରୁନେ ଆଦେସ୍ ଅନୁସାରେ ସ୍ରିବକ୍ନେ ସାପା ମୁଇଂ ଜାଗାବାନ୍ ବାରିମୁଇଂ ଜାଗା ବିଚେ ରଫୀଦୀମନ୍ନିଆ ତାନାଃ ଆଃରେଆର୍କେ; ମାତର୍ ଆତେନ୍ ଜାଗାନ୍ନିଆ ରେମୁଆଁଇଂନେ ଆତ୍ଲା ଉଗ୍ନେସା ଣ୍ଡିଆ ଆଲେଗେ । 2 ଆତେନ୍ସା ରେମୁଆଁଇଂ ମୋଶା ଏତେ ୱିଙ୍ଗ୍ଆଚେ ବାସଙ୍ଗ୍ଆର୍କେ, "ଆନେକେ ଣ୍ଡିଆ ବିଃଲା; ନେ ନେଉଗ୍ଏ ।" ଆତ୍ବା ମୋଶା ବାସଙ୍ଗ୍କେ, "ପେ ନେଙ୍ଗ୍ ଏତେ ମେଃନ୍ସା କିର ପେମ୍ୟାକେ ? ନା ଜାଣ୍ଡେଃଚେ ମାପ୍ରୁକେ ପରିକ୍ୟା ଡିଂନାମ୍ୟାକେ ?"
3 ଆତେନ୍ ବେଲା ରେମୁଆଁଇଂ ଆତେନ୍ ଜାଗାନ୍ନିଆ ଣ୍ଡିଆ ଅବାବ୍ ଲେଃଗେସା ଉଗ୍ଡିଆ ନ୍ସାଃ ମୋଶାନେ ବିରୁଦ୍ରେ କିରଚେ ବାସଙ୍ଗ୍ଆର୍କେ, "ପେ ଆନେକେ ଆରି ନେନେ ଗଡ଼େଇଂକେ ଆରି ପସୁଇଂକେ ଉଗ୍ଡିଆ ଆଡଚେ ବାଗୁଏନ୍ସା ମିସର୍ବାନ୍ ଡୁଂନାପାଂକେ ?"
4 ତେଲା ମୋଶା ମାପ୍ରୁ ଡାଗ୍ରା ପାର୍ତନା ଡିଂଚେ ବାସଙ୍ଗ୍କେ, "ନେଙ୍ଗ୍ ଆକେନ୍ ରେମୁଆଁଇଂନେ ଆତ୍ଲା ମେଃ ଣ୍ଡିଂଏ ? ମେଇଂ ଆନେଙ୍ଗ୍କେ ବ୍ରି ଟୁଚେ ବାଗୁଏନ୍ସା ତିଆର୍ ଡିଂଲେଃଆର୍କେ ।"
5 ତେଲା ମାପ୍ରୁ ମୋଶାକେ ବାସଙ୍ଗ୍କେ, "ନା ମେଃ ଏତେ ଲଣ୍ଡିଆଃକେ ବଗ୍ ନାବଗେ, ଆତେନ୍ ଡୁଡୁକେ ନ୍ତିନିଆ ସାଚେ ଉଡ଼ିକ୍ଲିଗ୍ ମ୍ନାରେ ଏତେ କୁଡ଼େଚେ ଇସ୍ରାଏଲ୍ ରେମୁଆଁଇଂନେ ସିସେ ସିସେ ୱେଲା । 6 କେଲା, ନେ ହରେବ୍ନିଆ ଆତେନ୍ ମ୍ନା ବ୍ରି ଆଡ଼ାତ୍ରା ନା ସାମ୍ନେ ନେତୁଆଁଏ, ନା ଆତେନ୍ ମ୍ନା ବ୍ରିକେ ବଗ୍ଲା, ଆତ୍ବାନ୍ ଣ୍ଡିଆ ତାର୍ଏ, ଆରି ରେମୁଆଁଇଂ ଆତେନ୍ ଉଗ୍ଆର୍ଏ ।" ତେଲା ମୋଶା ଇସ୍ରାଏଲ୍ନେ ମ୍ନାରେଇଂନେ ସାମ୍ନା ଦେତ୍ରକମ୍ ଡିଂକେ ।
7 ବାରି ଆତେନ୍ ଜାଗାନ୍ନିଆ ଇସ୍ରାଏଲ୍ ଗଡ଼େଇଂନେ କିରମର ଡିଂଏ ଆରି ମାପ୍ରୁ ନେ ବିତ୍ରେ ଲେକ୍ଲେ ଣ୍ଡୁ, ଆକେନ୍ ବାସଙ୍ଗ୍ଚେ ମାପ୍ରୁକେ ପରିକ୍ୟା ଡିଂନେସା ମେଁ ଆତେନ୍ ଜାଗାନେ ମିନି ମଃସା17:7 ପରିକ୍ୟା ଆରି ମିରିବା17:7 କିରମର ମିନି ବଆର୍କେ ।
ଅମାଲେକୀୟଇଂ ଏତେ ଜୁଜ୍
8 ଆତେନ୍ ବେଲା ଅମାଲେକ ପାଙ୍ଗ୍ଚେ ରଫୀଦୀମନ୍ନିଆ ଇସ୍ରାଏଲ ଏତେ ଜୁଜ୍ ଡିଂକେ । 9 ଆତେନ୍ସା ମୋଶା ଯିହୋଶୂୟକେ ବାସଙ୍ଗ୍କେ, "ନା ନେ ଆତ୍ଲା ରେମୁଆଁକେ ୱାଚେ ଅମାଲେକ ଏତେ ଜୁଜ୍ ଡିଂନେସା ୱେଲାପା; ଞ୍ଜଡ଼େ ନେଙ୍ଗ୍ନେ ନ୍ତିନିଆ ପର୍ମେସର୍ନେ ଡୁଡୁ ସାଚେ କଣ୍ଡା ଟିପେ ନ୍ତୁଆଁଏ ।" 10 ତେଲା ମୋଶାନେ ଆଦେସ୍ ଇସାବ୍ରେ ଯିହୋଶୂୟ ଅମାଲେକ ଏତେ ଜୁଜ୍ ଡିଂକେ, ବାରି ମୋଶା ଆରି ହାରୋଣ, ହୂର୍ କଣ୍ଡା ଆଡ଼ାତ୍ର ଡେଃକେ । 11 ବାରି ମୋଶା ନ୍ତିକେ ଆଡ଼ାତ୍ରା ଟେକେକ୍ନେ ବେଲା ଇସ୍ରାଏଲ୍ ଜିତେଆର୍କେ ଆରି ମେଁ ନ୍ତିକେ ଆଲ ଆଃଜାର୍ ବକ୍ନେ ବେଲା ଅମାଲେକ ଜିତେକେ । 12 ମାତର୍ ମୋଶାନେ ନ୍ତି ଲୁଆଁତି ୱେଲା; ମେଇଂ ମୁଇଂ ବ୍ରି ଡୁଂପାଂଚେ ମେଁ ଆଲ ବଆର୍କେ, ମୋଶା ଆତେନ୍ ଆଡ଼ାତ୍ରା କକେ, ବାରି ହାରୋଣ ଆରି ହୂର୍ ମୁଇଂଜା ଆଙ୍କ୍ପାକା ବାରି ମୁଇଂଜା ଆନ୍ତ୍ପାକା କଚେ ମେଁନେ ନ୍ତି ଟେକେଚେ ସାଃଲେଃଆର୍ଗେ, ତେଲା ସ୍ନି ଲଗ୍ ଜାକ ମେଁ ନ୍ତି ଦେତୁଆ ଡିଂଚେ ଲେଃଗେ । 13 ତେଲା ଯିହୋଶୂୟ ଅମାଲେକକେ ଆରି ମେଁନେ ରେମୁଆଁଇଂକେ କାଣ୍ଡା ଏତେ ଆଃଆରେଆର୍କେ ।
14 ଏନ୍ଇଡ଼ିଂ ମାପ୍ରୁ ମୋଶାକେ ବାସଙ୍ଗ୍କେ, "ଆକେନ୍ ସାମୁଆଁ ମନେ ବନ୍ସା ବଇନିଆ ଗୁଆର୍ଚେ ବପା, ବାରି ଯିହୋଶୂୟନେ ସେଃମଁ ଆତେନ୍ ପଡ଼େପା; ଆତେନ୍ଇଂ ଡିଂଡିଂକେ, ନେ ଦର୍ତନିବାନ୍ ଅମାଲେକଇଂକେ ନେରାବୁଡ଼େଏ ।" 15 ଆତ୍ବା ମୋଶା ମୁଇଂ କୁଡ଼ିଆ ଆଃରେଚେ ମେଁନେ ମିନି ଯିହବାଃ-ନିଃଷି17:15 ମାପ୍ରୁ ନେଙ୍ଗ୍ନେ ଜେଣ୍ଡା ବକେ । 16 ବାରି ମାପ୍ରୁନେ ଜେଣ୍ଡାନିଆ ନ୍ତି ବିଚେ ବାସଙ୍ଗ୍କେ, "ଜୁଗ୍ ଜୁଗ୍ ଜାକ ଅମାଲେକ ଏତେ ମାପ୍ରୁନେ ଜୁଜ୍ ଡିଂଏ ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)