1 ମିସର୍‌ ଦେସ୍‌ବାନ୍‌ ଇସ୍ରାଏଲ୍‌ ରେମୁଆଁଇଂ ତେତାର୍‌ନେ ଞ୍ଜି ଆର୍କେନେ ପର୍‌ତୁମ୍‌ ଦିନ୍‌ ମେଇଂ ସୀନୟ କଣ୍ଡାଅରିଆ ୱେଚାଆର୍‌କେ । 2 ମେଇଂ ରଫୀଦୀମବାନ୍‌ ୱେଚେ ସୀନୟ କଣ୍ଡାନିଆ ପାଙ୍ଗ୍‌ଆର୍‌କେ, ଆତେନ୍‌ କଣ୍ଡାନିଆ କୁଡ଼ିଆ ମୁଇଂ ଆଃରେଆର୍‌କେ; ଇସ୍ରାଏଲ୍‌ଇଂ ଆତେନ୍‌ ଜାଗାନେ କଣ୍ଡା ଆଲ କୁଡ଼ିଆ ଆଃରେଆର୍‌କେ । 3 ଏନ୍‌ଇଡ଼ିଂ ମୋଶା ପର୍‌ମେସର୍‌ ଡାଗ୍ରା ୱେକେ, ମାପ୍‌ରୁ କଣ୍ଡାବାନ୍‌ ଆମେକେ ୱାଚେ ବାସଙ୍ଗ୍‌କେ, "ନା ଯାକୁବ ବଂଶକେ ଆକେନ୍‌ ସାମୁଆଁ ବାସଙ୍ଗ୍‌ ଆରି ଇସ୍ରାଏଲ୍‌ନେ ଗଡ଼େଇଂକେ ଆକେନ୍‌ ସାମୁଆଁ ଆଃମ୍ୟାଃ । 4 ନେ ମିସ୍ରିୟଇଂନେ ଆଡ଼ାତ୍ରା ମେଃ ନେଡିଂକେ ଆରି ଆପେକେ ଡିରକମ୍‌ ଚାଃଟିଃଆଁ ପିଗ୍‌ନେ ଡେନାନ୍ନିଆ ସାଚେ ନା ଡାଗ୍ରା ଡୁଂନେପାଂକେ, ଆତେନ୍‌ ପେ କେପେଲେଃକେ । 5 ଏବେ ପେ ଜଦି ନେ ସାମୁଆଁକେ ପେସାଃଏ ଆରି ନେ ନିଅମ୍‌କେ ପାଲନ୍‌ ପେଡିଂଏ, ତେଲା ପେ ସାପା ରେମୁଆଁଇଂନେ ବିତ୍‌ରେ ନେ ନିଜେ ଆର୍‌ଜେକ୍ନେ ଦନ୍‌ ଡିଂଏ; ମେଃଡାଗ୍‌ଲା ସାପା ମଚ୍‌ପୁର୍‌ ନେନେ । 6 ବାରି ପେ ନେ ଆତ୍‌ଲା ପୁଜାରିଇଂନେ ମୁଇଂ ରାଜାନେ ବଁସ୍‌ ଆରି ମୁଇଂ ପବିତ୍ର ଜାତି ଡିଂଏ; ଆକେନ୍‌ ସାପା ସାମୁଆଁ ଇସ୍ରାଏଲ୍‌ନେ ଗଡ଼େଇଂକେ ବାସଙ୍ଗ୍‌ପା ।" 7 ତେଲା ମୋଶା ପାଙ୍ଗ୍‌ଚେ ରେମୁଆଁଇଂନେ ମ୍ନାଃ ରେମୁଆଁଇଂକେ ୱାଚେ ମାପ୍‌ରୁବାନ୍‌ ଡିଂଲେକ୍ନେ ଆକେନ୍‌ ସାପା ସାମୁଆଁ ମେଙ୍ଗ୍‌ ସାମ୍‌ନେ ବାସଙ୍ଗ୍‌ଆର୍‌କେ । 8 ଆତ୍‌ବା ସାପା ରେମୁଆଁ ମୁଇଂମାଡ୍‌ରେ ରାଜି ଡିଂଚେ ବାସଙ୍ଗ୍‌କେ, "ମାପ୍‌ରୁ ମେଃନେ ସାମୁଆଁ ବାସଙ୍ଗ୍‌ବକେ, ଆତେନ୍‌ ସାପା ନେ ନେଃଡିଂପା ।" ଆତେନ୍‌ ବେଲା ମୋଶା ମାପ୍‌ରୁ ଡାଗ୍ରା ରେମୁଆଁଇଂନେ ସାମୁଆଁ ଆଃମ୍ୟାଃକେ ।

9 ତେଲା ମାପ୍‌ରୁ ମୋଶାକେ ବାସଙ୍ଗ୍‌କେ, "କେଲା, ନେ ପେ ଏତେ ସାମୁଆଁ ବାଇର୍‌ନେ ବେଲା ରେମୁଆଁଇଂ ଡିରକମ୍‌ ଆତେନ୍‌ ଦ୍ରିଗ୍‌ଆର୍‌ଏ, ଆରି ନା ଡାଗ୍ରା କାଲାଆଃ ବିସ୍‌ବାସ୍‌ ଡିଂଆର୍‌ଏ, ଆତେନ୍‌ସା ନେ ତ୍ରିଗ୍‌ଡିଆ ଏତେ ନା ଡାଗ୍ରା ପାଂନେଡିଂକେ" ଆରି ଆତ୍‌ଅରିଆ ମୋଶା ରେମୁଆଁଇଂନେ ସାମୁଆଁ ମାପ୍‌ରୁକେ ଆଃମ୍ୟାକେ । 10 ତେଲା ମାପ୍‌ରୁ ମୋଶାକେ ବାସଙ୍ଗ୍‌କେ, "ନା ରେମୁଆଁଇଂନେ ଡାଗ୍ରା ୱେଚେ ଏଃକେ ବାରି ଞ୍ଜଡ଼େ ଆମେଇଂକେ ପବିତ୍ର ଆଡିଂ, ବାରି ମେଇଂ ନିଜର୍‌ ନିଜର୍‌ନେ ସକା ତାଣ୍ଡିଆ ଆର୍‌ଲେ । 11 ଆରି ମାର୍‌ତଡ଼େ ସାପାରେ ତିଆର୍‌ ଡିଂଆର୍‌ଲେ, ମେଃଡାଗ୍‌ଲା ମାର୍‌ତଡ଼େ ମାପ୍‌ରୁ ସାପା ରେମୁଆଁନେ ସାମ୍‌ନେ ସୀନୟ କଣ୍ଡା ଆଡ଼ାତ୍ରାବାନ୍‌ ଜାର୍‌ଏ । 12 ଆତେନ୍‌ସା ନା ରେମୁଆଁଇଂନେ ପିତୁର୍‌ ପାକା ଗାର୍‌ ଟାନେଚେ ଆକେନ୍‌ ସାମୁଆଁ ବାସଙ୍ଗ୍‌, ପେ କଣ୍ଡା ଡେଃନେ ଆରି ଆତ୍‌ଅରିଆନେ ଗିରାକେ ଲିଗ୍‌ନେସା ସାବ୍‌ଦାନ୍‌ ଡିଂପା; ଜା ଜଦି କଣ୍ଡାକେ ଲିଗ୍‌ଏ, ମେଁ ଡିଲାଡିଗ୍‌ ଗୁଏଃଏ । 13 ଜାନେ ନ୍ତି ଡିଗ୍‌ ଆମେକେ ଆଲିଗ୍‌ ଣ୍ଡୁ, ମାତର୍‌ ମେଁ ଜଦି ଲିଗ୍‌ଏ ତେଲା ବ୍ରି ଆନିଗ୍‌ଚାଚେ ଗୁଏଃଏ, ଣ୍ଡୁଲା ଙାଁ ଏତେ ଟୁଇଂଚେ ଗୁଏଃଏ; ପଶୁ ଡିଂଲେ କି ରେମୁଆଁ ଡିଂଲେ, ଜା ଡିଗ୍‌ ଆବଞ୍ଚେ ଣ୍ଡୁ; ପିନିଃନେ ନ୍ନାଂସାଲା ମେଇଂ କଣ୍ଡା ଜାକ ତଡ଼ିଆଚେ ପାଂଆର୍‌ଏ ।"

14 ଏନ୍‌ଇଡ଼ିଂ ମୋଶା କଣ୍ଡାବାନ୍‌ ଜାର୍‌ଚେ ରେମୁଆଁଇଂନେ ଡାଗ୍ରା ପାଙ୍ଗ୍‌ଚେ ଆମେଇଂକେ ପବିତ୍ର ଆଡିଂକେ, ବାରି ମେଇଂ ନିଜର୍‌ ନିଜର୍‌ନେ ସକାପାଟାଇ ସାପା ତାଣ୍ଡିଆ ଆର୍‌କେ । 15 ତେଲା ମେଁ ରେମୁଆଁଇଂକେ ବାସଙ୍ଗ୍‌କେ, "ପେ ଜିର୍‌ସି ନ୍‌ସା ତିଆର୍‌ ଡିଂଲାଲାପା; ନିଜର୍‌ ନିଜର୍‌ନେ ସେଲାମ୍ବୁଏଃ ଏତେ ଆରାଡ୍ଲୁଏଗ୍‌ପା ।"

16 ଏନ୍‌ଇଡ଼ିଂ ତୁର୍ତିୟ ଦିନ୍‌ ତାରାଃକେ, ତ୍ରିଗ୍‌ଡିଆ ଗଡ଼୍‌ଗଡ଼ି ଡିଂନେ ଆରି ବିଜିଲି ବଗ୍‌ନେ ଆରି କଣ୍ଡା ଆଡ଼ାତ୍ରା ଜାବର୍‌ ତ୍ରିଗ୍‌ଡିଆ ଡାବନେ ଆରି ଜାବର୍‌ ସାରସାଗାଚେ ପ୍ନିଃ ସବ୍‌ଦ ପାଙ୍ଗ୍‌କେ । ଆତେନ୍‌ କୁଡ଼ିଆନିଆ ଲେକ୍ନେ ସାପା ରେମୁଆଁଇଂ ଜୁର୍‌ୱେଆର୍‌କେ । 17 ତେଲା ପର୍‌ମେସର୍‌ ଏତେ ମିସୁଃନ୍‌ସା ମୋଶା ରେମୁଆଁଇଂକେ କୁଡ଼ିଆବାନ୍‌ ଆତାର୍‌ ଡୁଂପାଂକେ, ତେଲା ମେଇଂ କଣ୍ଡା ଆଲ ତୁଆଁଆର୍‌କେ । 18 ଆତେନ୍‌ ବେଲା ସୀନୟ କଣ୍ଡା ମାଃସ ଡିଂଲେଗେ; ମେଃଡାଗ୍‌ଲା ମାପ୍‌ରୁ ସୁଆ ଏତେ ଆତେନ୍‌ ଆଡ଼ାତ୍ର ଡେଃକେ, ଆତ୍‌ବାନ୍‌ ତ୍ରୁଗ୍‌ସନେ ମାଃସ ରକମ୍‌ ଆତ୍‌ବାନ୍‌ ମାଃସ ତାର୍‌କେ, ବାରି ସର୍‌ତେ କଣ୍ଡା ଲିଗିର୍‌ ୱେକେ । 19 ବାରି ପିନିଃନେ ନ୍ନାଂସା ବୟଙ୍କାର୍‌ ନ୍ନାଂସାଲା, ମୋଶା ସାମୁଆଁ ବାସଙ୍ଗ୍‌କେ, ଆତ୍‌ଅରିଆ ପର୍‌ମେସର୍‌ ମୁଇଂ ନ୍ନାଂସା ଆମେକେ ଉତର୍‌ ବିକେ । 20 ଏନ୍‌ଇଡ଼ିଂ ମାପ୍‌ରୁ ସୀନୟ କଣ୍ଡା ଟିପେ ଡେଃଚେ ମୋଶାକେ ଆତେନ୍‌ କଣ୍ଡା ଟିପେ ୱାକେ; ତେଲା ମୋଶା ଆଡ଼ାତ୍ରା ଡେକେ । 21 ଆତେନ୍‌ ବେଲା ମାପ୍‌ରୁ ମୋଶାକେ ବାସଙ୍ଗ୍‌କେ, ନା ଜାର୍‌ଚେ ରେମୁଆଁଇଂକେ ଡାଟାମ୍‌ ଆଦେସ୍‌ ବିଃ, ଣ୍ଡୁଲା ମାପ୍‌ରୁକେ କିକେନ୍‌ସା ଆତେନ୍‌ ଗିରାକେ ଗାଲେଗ୍‌ଲା, ମେଙ୍ଗ୍‌ନେ ବିତ୍‌ରେବାନ୍‌ ଗୁଲେରୁଆ ନସ୍‌ଟ ଡିଂଆର୍‌ଏ । 22 ଆରି ମୁଡ଼ି ପୁଜାରିଇଂ ମାପ୍‌ରୁନିଆ ଲେଆର୍‌ଏ ମେଇଂ ଆପେକେ ପବିତ୍ର ଆଡିଂଆର୍‌ଲେ, ଣ୍ଡୁଲା ମେଁ ଆମେଇଂକେ ଡଣ୍ଡ୍‌ ବିଃଏ ।

23 ଆତ୍‌ବା ମୋଶା ମାପ୍‌ରୁକେ ବାସଙ୍ଗ୍‌କେ, "ରେମୁଆଁଇଂ ସୀନୟ କଣ୍ଡା ଆଡ଼ାତ୍ରା ଡେଃ ଆୟାଆର୍‌ ଣ୍ଡୁ; ମେଃଡାଗ୍‌ଲା ନା ଡାଟ୍ ଆଦେସ୍‌ ବିଚେ ଆନେକେ ବାସଙ୍ଗ୍‌ନାବକେ, କଣ୍ଡାକେ ଗିରା ଟାନେଚେ ଆମେକେ ପବିତ୍ର ଆଃଡିଂପା ।"

24 ତେଲା ମାପ୍‌ରୁ ଆମେକେ ବାସଙ୍ଗ୍‌କେ, "ୱେଲା, ଆରି ଜାର୍‌ଲା; ବାରି ନା ହାରୋଣକେ ନା ଏତେ ରାଙ୍ଗ୍‌ୱେଚେ ଡେଃଲା, ମାତର୍‌ ପୁଜାରିଇଂନେ ଆରି ରେମୁଆଁଇଂନେ ଆଡ଼ାତ୍ରା ମାପ୍‌ରୁ ଯେନ୍ତିକି ଡଣ୍ଡ୍‌ ବିଃ ଆୟା ଣ୍ଡୁ, ଆତେନ୍‌ସା ମେଇଂ ମେଁ ଡାଗ୍ରା ପାଂନେସା ଗିରାକେ ଆପୁଏଃଆର୍‌ଲେ ।" 25 ତେଲା ମୋଶା ରେମୁଆଁଇଂ ଡାଗ୍ରା ପାଙ୍ଗ୍‌ଚେ ଆମେଇଂକେ ଦେତ୍‌ରକମ୍‌ ଆଦେସ୍‌ ବିକେ ।