18 ଆତେନ୍ ବେଲା ସାପା ରେମୁଆଁ ତ୍ରିଗ୍ଡିଆ ଗର୍ଜେନେ ଆରି ବିଜ୍ଲି ଆରି ପ୍ନିଃ ସବ୍ଦ ଡିଂନେ ଆରି ମାଃସ ଡିଂକ୍ନେ କଣ୍ଡାକେ କେଆର୍କେ । ବାରି ଆତେନ୍ କେଚେ ମେଙ୍ଗ୍ ବୁଟଚେ ସୁଲ ତୁଆଁଆର୍କେ । 19 ଆରି ମେଇଂ ମୋଶାକେ ବାସଙ୍ଗ୍ଆର୍କେ, "ପେ ନେ ଏତେ ସାମୁଆଁ ବାସଙ୍ଗ୍, ନେ ନେଅଁଏ; ମାତର୍ ପର୍ମେସର୍ ନେ ଏତେ ସାମୁଆଁ ଆବାଇର୍ଲେ, ଣ୍ଡୁଲା ନେ ନେଗୁଏଃଏ ।"
20 ଆତ୍ବା ମୋଶା ରେମୁଆଁଇଂକେ ବାସଙ୍ଗ୍କେ, "ଆବ୍ଟଗେପା ନାମ; ମେଃଡାଗ୍ଲା ଆପେକେ ପରିକ୍ୟା ଡିଂନେସା ଆରି ପେ ଡିରକମ୍ କି ପାପ୍ ପେଡିଂ ଣ୍ଡୁ, ଆତେନ୍ସା ପେ ବୁଟନେ ପେ ମ୍ମୁଆଃ ସାମ୍ନେ ଆଃସୁଏ ନ୍ସା ପର୍ମେସର୍ ପାଂଲାଏଃକେ ।" 21 ଆତେନ୍ସା ରେମୁଆଁଇଂ ସୁଲ ତୁଆଁଚେ ଲେଃଆର୍ଗେ; ମାତର୍ ଆଣ୍ଡିଅରିଆ ପର୍ମେସର୍ ଲେଃଗେ, ମୋଶା ଆତେନ୍ ଜାବର୍ ତାଙ୍ଗ୍କିଗ୍ ଡାଗ୍ରା ଅଲେଙ୍ଗ୍କେ ।
ପୁଜା ବେଦି ବିସୟ୍ରେ ନିଅମ୍
22 ଏନ୍ଇଡ଼ିଂ ମାପ୍ରୁ ମୋଶାକେ ବାସଙ୍ଗ୍କେ, "ପେ ଇସ୍ରାଏଲନେ ଉଂଡେଇଂକେ ଆକେନ୍ ସାମୁଆଁ ବାସଙ୍ଗ୍, ନେ ସର୍ଗେବାନ୍ ଲେଃଚେ ପେ ଏତେ ମ୍ୱାଇର୍ମ୍ୱାତାକେ, ଆକେନ୍ ପେ ନିଜେ ପେକେକେ । 23 ଆତେନ୍ସା ପେ ନେ ରେମୁଆଁଇଂ ଆତ୍ଲା, ବିନ୍ ଦେବ୍ତାଇଂନେ ମୁର୍ତି ତିଆର୍ ପେଡିଂ ଣ୍ଡୁ, ପେ ଆତ୍ଲା ରୁପାନେ ଦେବ୍ତା ଆରି ସୁନାନେ ଦେବ୍ତା ପେରାରେ ଣ୍ଡୁ । 24 ପେ ନେ ଆତ୍ଲା ମୁଇଂ ତୁବନେ ବେଦି ପେରାରେଏ, ଆରି ମେଁ ଆଡ଼ାତ୍ରା ପେନେ ଅରେଃ ଗିମିଃ ସୁଆ ବଲି20:24 ପସୁଇଂକେ ସୁଆନିଆ ଆଃଗିନେ ବଲି ଆରି ସାନ୍ତି ଡିଂନେ ନ୍ସାଃ ବଲି ପେବିଏ; ନେ ଆଣ୍ଡିନେ ଜାଗାନ୍ନିଆ ନା ମିନି ମନେ ନେତ୍ଲାଗ୍ଏ, ଆତେନ୍ ସାପା ଜାଗାନ୍ନିଆ ନେ ନା ଡାଗ୍ରା ପାଙ୍ଗ୍ଚେ ଆପେକେ ଆସିର୍ବାଦ୍ ନେଡିଂଏ । 25 ଅଃନା ନେ ନା ଆତ୍ଲା ବ୍ରିନେ କୁଡ଼ିଆ ନେରାଃରେଏ, ତେଲା ଆତେନ୍ ଅସ୍ତର୍ ଏଃତେ ଆଃରେନାବକ୍ନେ ବ୍ରି ଏଃତେ ଆତେନ୍ ତିଆର୍ ପେଡିଂ ଣ୍ଡୁ; ମେଃଡାଗ୍ଲା ଆତେନ୍ ଆଡ଼ାତ୍ରା ନାନେ ଗ୍ନଗ୍ ଲିଙ୍ଗ୍ଲା, ଆତେନ୍ ଅପବିତ୍ର ଡିଂଏ । 26 ଆରି ନା ଡିକ୍ଚା ନାଲେଃକ୍ନେ ନେ ବେଦି ଆଡ଼ାତ୍ରା ଯେନ୍ତିକି ଆତ୍ନା ଣ୍ଡୁ, ଆତେନ୍ସା ପେ ପିଣ୍ଡଲି ବିଚେ ନେ ବେଦି ଆଡ଼ାତ୍ରା ପେପାଙ୍ଗ୍ ଣ୍ଡୁ ।"