ኣሌፌ
1 ባንታ ኦጌን ቦሬይ ባይንዳይቲኔ
ጎዳ ዎጋ ማላ
ሄሜቲዛይቲ ኣንጄቲዳይታ።
2 ኢዚ ዮቲዳይሳ ኦዛይቲኔ
ባ ኩሜ ዎዚናፔ
ኢዛ ኮይዛይቲ ኣንጄቲዳይታ።
3 ኢስቲ ማካላ ሚሽ ኦቴና፤
ጎዳ ኦጌን ሄሜቴቴስ።
4 ኔ ዎጋ ኣማኔቲዲ
ናጋና ማላ
ኔኒ ኑና ኣዛዛዳሳ።
5 ኔ ዎዳ ዎጋ ናጋናስ
ታ ኦጌይ ሚናና ማላ
ታ ኣሞታይስ።
6 ኔ ኣዛዞታ ኡባ
ታ ሎኤ ኣኬኪኮ
ሙሌካ ዬላቲኬ።
7 ኔ ጺሎ ፒርዳ ታኒ ታማርዳ ኬና
ሱሬ ዎዚናፔ ኔና ጋላታና።
8 ታኒ ኔ ዎዳ ማራታ ናጋና፤
ታና ሙሌካ ዬጎፋ።
ቤቴ
9 ናቴ ባ ኦጌ ጌሻቴን
ዎስቲ ናጋናስ ዳንዳይዜ?
ኔ ቃላይ ጊዛ ማላ
ዴኢኮ ዳንዳዬስ።
10 ታኒ ታ ኩሜ ዎዚናፔ
ኔና ኮያይስ፤
ኔ ኣዛዞታፔ ካሬ ኬዞንታ ማላ
ታና ናጋ።
11 ታኒ ኔ ቦላ
ናጋራ ኦንታ ማላ
ኔ ቃላ ታ ዎዚናን ቆታዲስ።
12 ኣቤት ጎዳዉ! ኔኒ ጋላቴታ!
ኔ ማራ ታና ታማርሳ።
13 ኔ ዶናፔ ኬዚዛ ማራ ኡባ
ታኒ ታ ኢንጻርሳን ዮታይስ።
14 ኣሲ ባ ዱሬቴን ኡፋዬቲዛ ማላ
ታኒ ኔኒ ኢሚዳ ማራ
ካላሼ ኡፋዬታይስ።
15 ኔ ዎዳ ዎጋታ
ዩሻ ቆፓይስ፤
ታ ዎዚናካ
ኔ ኦጌታን ዎዲስ።
16 ኔ ኣዋጃይ ታና ኡፋይሴስ፤
ኔ ቃላካ ታኒ ዶጊኬ።
ጋሜል
17 ታኒ ሼምፖራ ፓጻ
ዴኣና ማላኔ
ኔ ቃላስ ኣዛዜታና ማላ፥
ታስ ኔ ኣይሌስ ሎኦ ሚሽ ኦ።
18 ኔ ዎጋ ጊዶን ዲዛ
ማላሊሲዛ ቱማቴ
ታኒ ቤኣና ማላ ታ ኣይፌ ዶያ።
19 ታኒ ሃ ሳኣን ኢማ፤
ኔ ኣዛዞታ ታፔ ጌንፋ።
20 ታ ሼምፖያ ኡባ ዎዴ
ኔ ማራ ዴማናስ
ኬሃ ላሞታዱስ።
21 ኔ ኣዛዞዛፔ ካሬ ኬዚዛይታ፥
ኦቶሬቲዛይታኔ ቃንጌቲዛይታ
ኔኒ ሴራሳ።
22 ታ ኔኒ ዮቲዳይሳ
ናጊዳ ጊሻስ
ኢስታ ጫሻኔ ካዛ
ታ ቦላፌ ዲጋ።
23 ዴሬ ካሌዛይቲ ኡባቲ
ታ ቦላ ማቄቲኮካ
ታኒ ኔ ኣይሌይ
ኔ ኣዋጃታ ዩሻ ቆፓና።
24 ኔ ማርካቴቲ
ታና ኡፋይሴቴስ፤
ኢስቲካ ታና ዞሬቴስ።
ዳሌጼ
25 ታ ሼምፖይ ኬዛና ሃኔስ፤
ኔኒ ጊዳ ቃላ ማላ ታና ኣሻ።
26 ታኒ ታ ኦጌ ኡባ
ኔስ ቆንጪሳዲስ፤
ኔኒ ታስ ሲያዳሳ፤
ኔ ኣዋጃታ ታና ታማርሳ።
27 ኔ ማራ ታና ኣኬኪሳ፤
ማላሊሲዛ ኔ ኦሶ
ታ ዩሻ ቆፓና።
28 ታ ሼምፖያ ጬጬይ
ዳሪዳ ጊሻስ ዳቡራዱስ፤
ኔኒ ጊዳ ቃላ ማላ ታና ሚን።
29 ባሌዛ ኦጌ ታፔ ሃሳ፤
ኔ ኪያቴን
ኔ ዎጋ ታና ታማርሳ።
30 ታኒ ቱማ ኦጌ ዶራዲስ፤
ኔ ዎጋካ
ታ ዎዚናን ዎዲስ።
31 ኣቤት ጎዳዉ!
ታኒ ኔ ዮቲዳይሳ
ሚን ኦይካዲስ፤
ኔ ታና ዬላስ ኣ ኢሞፋ።
32 ኔኒ ታ ዎዚና ኣሲዳ ጊሻስ
ታኒ ኔ ኣዛዞ ኦጌን ዎጻይስ።
ሄ
33 ኣቤት ጎዳዉ!
ኔ ኣዋጃታ ታና ታማርሳ፤
ታኒ ዉርሴ ጋካናስ
ኢዛ ናጋና።
34 ታኒ ኔ ዎጋ ናጋና ማላኔ
ኩሜ ዎዚናፔ
ኢዛስ ኣዛዜታና ማላ
ኔኒ ታስ ኣኬካ ኢማ።
35 ኔ ኣዛዞይ ታና ኡፋይሴስ፤
ሄሳ ጊሻስ ኔ ኦጌን
ታና ካሌ።
36 ታ ዎዚና ቤሶንታ ጎኣስ ጊዶንታ
ኔ ማራ ፖላና ማላ ዛራ።
37 ፓንታ ሚሽ ጼሎንታ ማላ
ታ ኣይፌታ ናጋ፤
ኔ ቃላ ማላ ታ ዴኦ ኦራጺሳ።
38 ኔስ ያያና ማላ
ኔ ጌሊዳ ቃላ
ታስ ኔ ኣይሌዛስ ፖላ።
39 ኔ ፒርዳይ ሱሬ ጊዲዳ ጊሻስ
ታኒ ያዪዛ ካዉሻቴፌ
ታና ናጋ።
40 ታኒ ኔ ዎጋ ናጋናዉ ኣሞታይስ፤
ኔኒ ጺሎቴን
ታ ዴኦ ኦራጺሳ።
ዋው
41 ኣቤት ጎዳዉ!
ኔ ሜርና ሲቆይ ታኮ ሃ ዮ፤
ኔኒ ጊዳ ቃላ ማላ ታና ኣሻ።
42 ታኒ ኔ ቃላን ኣማኔታይስ፤
ታና ጫዪዛይታስካ
ታኒ ዛሮ ኢማና።
43 ታኒ ኔ ዎጋን ሂዶታ ኦዲስ፤
ቱማ ቃላ
ታ ዶናፔ ይሶፋ።
44 ታኒ ሜሪ ሜርናስካ
ኔ ዎጋስ ኡባ ዎዴ ኣዛዜታና።
45 ታኒ ኔ ዎጋ ሲቂዛ ጊሻስ
ላኣን ሲሜሬታና።
46 ታኒ ካዎታ ሲንን ኤቃዳ
ኔኒ ዮቲዳይሳ
ዮታሼ ዬላቲኬ።
47 ታኒ ኔ ኣዛዞታ ዶሳይስ፤
ኢስታንካ ኡፋዬታይስ።
48 ታኒ ሲቂዛ ኔ ኣዛዞታ ቦንቻይስ፤
ኔ ኣዋጃታ ዩሻ ቆፓና።
ዛይ
49 ኔኒ ታስ ኔ ኣይሌዛስ
ኢሚዳ ቃላ ቆፓ፤
ሄሳ ጊሻስ ታኒ ሄ ቃላን
ሂዶታ ኦይስ።
50 ኔ ቃላይ ታስ ዴኦ ኢሚዴስ፤
ሄሲ ሜቶ ዎዴ
ታና ሚንስ።
51 ኦቶራንቻቲ ታና ኬሂ ካዳ፤
ጊዶ ኣቲን ታኒ
ኔ ዎጋፔ ሼርኢ ጊኬ።
52 ኣቤት ጎዳዉ!
ቤኒሶፌ ዲዛ ኔ ዎጋ
ታኒ ቆፓዲስ፤
ሄሳን ታኒ ሚኔታይስ።
53 ኢታቲ ኔ ዎጋስ ኣዛዜቶንታይሳ
ቤኣዳ ኬሃ ሃንቄታዲስ።
54 ታኒ ኢማቴን
ዴኢዛ ቢታን
ኔ ዎጋይ ታስ ማዛሙሬ ጊዲዴስ።
55 ኣቤት ጎዳዉ!
ታኒ ጊዶ
ኔ ሱን ቆፓይስ፤
ኔ ዎጋካ ናጋይስ።
56 ታ ኔ ዎጋስ ኣዛዜታና፤
ሄሲ ታስ ኦሶ ጊዲዴስ።
ሄት
57 ኣቤት ጎዳዉ!
ታ ቃዳይ ኔና፤
ታኒ ኔ ቃላስ
ኣዛዜታናስ ቃቻዲስ።
58 ታኒ ኩሜ ዎዚናፔ
ኔና ኮያይስ፤
ኔኒ ጊዳ ቃላ ማላ
ታስ ቃታ።
59 ታኒ ታ ኦጌ ጾሞሳ ጼላዲስ፤
ኔ ማራ ካላናስ ሲማዲስ።
60 ታኒ ኔ ኣዛዞ ናጋናስ
ኤሶታናፔ ኣቲን ታኪኬ።
61 ኢታቲ ታና ኦይካና ጊቴ ዬጊዳ፤
ታኒ ጊዲኮ
ኔ ዎጋ ዶጋቤኬ።
62 ኔ ጺሎ ዎጋ ጊሻስ ታ ኔና
ጋላታናስ ጊዶ ዴንዳይስ።
63 ታኒ ኔስ ያዪዛይታ ኡባሲኔ
ኔ ዎጋ ናጊዛይታስ ላጌ።
64 ኣቤት ጎዳዉ!
ሳኣይ ኔ ሜርና ሲቆን ኩሚዴስ፤
ኔ ኣዋጃታ ታና ታማርሳ።
ጼት
65 ኣቤት ጎዳዉ!
ኔ ጊዳ ቃላ ማላ
ታስ ኔ ኣይሌዛስ ሎኦ ኦዳሳ።
66 ታኒ ኔ ኣዛዞታ ኣማናይስ፤
ሎኦ ፒርዳኔ
ኤራቴ ታና ታማርሳ።
67 ታ ቃጻዬታናፔ ካሴ
ኔ ዎጋፔ ካሬ ኬዛዲስ፤
ሃኢ ታኒ ኔ ቃላስ ኣዛዜታና።
68 ኔኒ ሎኦ፤ ኔ ኦሶይካ ሎኦ፤
ሄሳ ጊሻስ ኔ ኣዋጃታ
ታና ታማርሳ።
69 ኦቶራንቻቲ ታ ሱን
ዎርዶራ ሞሪዳ፤
ጊዶ ኣቲን ታኒ ኔ ዎጋ
ታ ኩሜ ዎዚናፔ
ናጋይስ።
70 ኢስታ ዎዚናይ ሙሌካ ዳሚዴስ፤
ጊዶ ኣቲን ታኒ
ኔ ዎጋን ኡፋዬታይስ።
71 ታኒ ቃጻዬቲዳይሲ
ታስ ሎኦ ጊዲዴስ፤
ኔ ዎጋ ታማራና ማላ
ታና ማዲዴስ።
72 ዳሮ ሺ ቢራፔኔ ዎርቃፌ
ኔ ዶናፔ ኬኢዳ ዎጋይ
ታስ ኣስ።
ዮድ
73 ታና ኔ ኩሼይ
ሜዴሲኔ ጊግሲዴስ፤
ኔ ኣዛዞ ታኒ ታማራና ማላ
ታስ ኣኬካ ኢማ።
74 ታኒ ኔ ቃላ ሂዶታ ኦዲስ፤
ሄሳ ጊሻስ ኔስ ያዪዛይቲ
ታና ቤኢዲ ኡፋዬቴቶ።
75 ኣቤት ጎዳዉ!
ኔ ፒርዳይ ጺሎ ጊዲዳይሳኔ
ኔኒ ታና ቃጻይዳይ
ኣማኔቴን ጊዲዳይሳ
ታኒ ኤራይስ።
76 ኔኒ ታስ ኔ ኣይሌዛስ
ጌሊዳ ቃላ ማላ
ኔ ሜርና ሲቆይ
ታና ሚን።
77 ኔ ዎጋይ ታና ኡፋይሲዛ ጊሻስ
ታኒ ሼምፖራ
ፓጻ ዴኣና ማላ
ታስ ቃታ።
78 ኦቶራንቻቲ ታና ዎርዶን
ሞቲዛ ጊሻስ ዬላቴቶ።
ታኒ ጊዲኮ ኔ ዎጋታ
ዩሻ ቆፓይስ።
79 ኔስ ያዪዛይቲኔ
ኔ ኣዛዞ ኤሪዛይቲ ኡባይ
ሃ ታኮ ሲሜቶ።
80 ታኒ ዬላቶንታ ማላ
ኔ ማራን ታ ዎዚናይ
ቦሬይ ባይንዳዝ ጊዶ።
ካፍ
81 ኔ ታና ኣሻና ማላ
ታ ሼምፖያ ኬሃ ላሞታዱስ፤
ታኒካ ኔ ቃላ
ሂዶታ ኦዲስ።
82 «ኣይዴ ታና ሚንንዴሻ?»
ጉሳን ኔ ኢሚዳ
ሂዶታ ቃላ ታ ናጊሺን
ታ ኣይፌይ ዶልጁሚዴስ።
83 ጩዋን ካቂዳ
ሉካሞ ማላ ጊዳዲስ፤
ጊዲኮካ ኔ ኣዋጃታ
ባላቤኬ።
84 ታኒ ኔ ኣይሌይ
ኣዉዴ ጋካናስ ዳኔ?
ታና ዬዴዛይታ ቦላ
ኔኒ ኣዉዴ ፒርዳኔ?
85 ኔ ዎጋ ናጎንታ ኦቶራንቻቲ
ታና ይሳናስ
ኦላ ቦኬቴስ።
86 ኔ ኣዛዞቲ ኡባይ ኣማኔቲዛይታ፤
ኣሳይ ጋሶይ ባይንዳ
ዬዴዛ ጊሻስ
ታና ማዳ!
87 ኢስቲ ታና
ቢታፌ ይሳና ጋኪዳ፤
ጊዶ ኣቲን ታኒ
ኔ ዎጋ ኣጋቤኬ።
88 ኔ ሜርና ሲቆን
ታ ዴኦ ኦራጺሳ፤
ታኒካ ኔ ኣዛዞታ ናጋና።
ላሜድ
89 ኣቤት ጎዳዉ!
ኔ ቃላይ ሜርናሳ፤
ኢዚካ ሳሎን ሚኒ ዴስ።
90 ኔ ኣማኔቴይ ዬሌታፔ
ዬሌታ ጋካናስ ዴስ፤
ኔኒ ሳኣስ ዮቻ ዬጋዳሳ፤
ኢዚካ ሚኒዲ ዴስ።
91 ኔኒ ጊዳ ማላ ኡባይካ
ሃች ጋካናስ ሚኒዲ ዴስ፤
ኣይስ ጊኮ ኡባቲካ
ኔ ኣይሌታ።
92 ታ ሜቶቲዳ ዎዴ
ያይቻና ሺን
ኔ ዎጋይ ታስ ኡፋይስ ጊዲዴስ።
93 ኔ ኣዛዞቲ ታና ሼምፖራ
ፓጻ ዎዳ ጊሻስ
ታኒ ሙሌካ ኢስታ ዶጊኬ።
94 ታኒ ኔሳ፤
ታና ኣሻርኪ!
ታኒ ዎጋ ናጋናዉ ኮያይስ።
95 ኢታቲ ታና ይሳናዉ
ዛማዲዲ ናጌቴስ፤
ጊዶ ኣቲን ኔኒ ዮቲዳይሳ
ታኒ ዩሻ ቆፓይስ።
96 ፖሎ ጊዲዳ ሚሽ ኡባስ ዛዋይ
ዲዛይሳ ታኒ ቤኣዲስ፤
ጊዶ ኣቲን ፖሎ ጊዲዳ
ኔ ኣዛዞታስ ዛዋይ ዴና።
ሜም
97 ታኒ ኔ ዎጋ ኣይ ኬና ሲቃዚና!
ጋላስ ኩሜ
ታኒ ኢዛ ዩሻ ቆፓይስ።
98 ኔ ኣዛዞቲ ኡባ ዎዴካ
ታናራ ዲዛ ጊሻስ
ታ ሞርኬታፔ ኣዲ
ታና ኣኬካንቻ ሂስቲዳ።
99 ኔ ዎዳ ዎጋ
ዩሻ ቆፒዛ ጊሻስ
ታና ታማርሲዳ ኡባፌ
ዎዚናማ ጊዳዲስ።
100 ታኒ ኔ ኣዛዞታ ካሊዛ ጊሻስ
ጪማታፔ ቦላራ
ኣኬኪዛ ኣስ ጊዳዲስ።
101 ታኒ ኔ ቃላስ
ኣዛዜታናስ ኮይዛ ጊሻስ
ታ ቶሆ ኢታ ኦጌ ኡባፌ ናጋዲስ።
102 ኔኒ ታና ታማርሲዳ ጊሻስ
ታኒ ኔ ዎጋፔ ሼርኢ ጋቤኬ።
103 ኔ ቃላይ ኣይ ማላ ማልኢዜ!
ኤሳ ኢሊሎፔካ ኣዲ
ዶናን ማልኤስ።
104 ኔ ዎጋፔ ኣኬካ ዴማዲስ፤
ሄሳ ጊሻስ ታኒ
ጌላ ኦጌ ኡባ ኢጻዲስ።
ኖን
105 ኔ ቃላይ ታ ቶሆስ ጾምፔ፤
ታ ኦጌስካ ፖኦ።
106 ኔ ጺሎ ዎጋ ናጋናስ
ታኒ ጫቂዳ ጫቆዛ ሚንና።
107 ኣቤት ጎዳዉ!
ታ ኬሃ ሜቶታዲስ፤
ኔኒ ጊዳ ቃላ ማላ
ታና ሼምፖራ ፓጻ ዎ።
108 ኣቤት ጎዳዉ!
ታ ዶናፔ ኬዚዛ
ጋላታ ያርሾዛ
ኔ ኤካ፤
ኔ ዎጋ ታና ታማርሳ።
109 ታ ሼምፖያ ኡባ ዎዴ
ሜቶ ቦላ ዳዉስ፤
ታኒ ጊዲኮ ኔ ዎጋ ባላቤኬ።
110 ኢታቲ ታና ኦይካናስ
ዎጺማዴ ዎዳ፤
ጊዶ ኣቲን ታኒ ኔ ዎጋፔ
ሼርኢ ጋቤኬ።
111 ኔ ኢሚዳ ዎጋይ
ታስ ሜርናስ ላታ፤
ታ ዎዚናይ ኢዛን ኡፋዬቴስ።
112 ታ ሃይቃና ጋካናስ
ኔ ኢሚዳ ኣዛዞ ፖላናስ
ቃላ ጌላዲስ።
ሳምኬት
113 ታኒ ዎዚና ባላታ ኢጻይስ፤
ጊዶ ኣቲን ኔ ዎጋ ሲቃይስ።
114 ኔኒ ታስ ጎንዳሌኔ
ባቃታ ኣቲዛሶ፤
ታኒ ኔ ቃላ ሂዶታ ኦይስ።
115 ታኒ ታ ጾሳ ኣዛዞ
ናጋና ማላ
ኢንቴኖ ኢታ ኦዛይቶ!
ታፔ ሃኪቴ!
116 ኔኒ ጊዳ ቃላ ማላ
ታና ካፋ፤
ሂስቲኮ ታኒ ሼምፖራ
ፓጻ ዴኣና፤
ታ ሂዶታይ ሃዳ ጊዲን
ታና ዬላሶፓ።
117 ኔ ታና ካፋ ኦይካ፤
ሂስቲኮ ታ ሳሮን ዴኣና፤
ታኒ ኡባ ዎዴ
ኔ ኣዋጃታ ፖላና።
118 ኔ ዎጋፔ ካሬ ኬዚዳይታ
ኡባ ዬጋ ኣጋዳሳ፤
ኢስቲ ባሌኒኔ ዎርዶን
ኦዳ ኡባይ ሃዳ ጊዳና።
119 ሳኣን ዴኢዛ ኢታታ ኡባ
ኔኒ ቡራ ማላ ዬጋ ኣጋሳ፤
ሄሳ ጊሻስ ታኒ
ኔ ኢሚዳ ኣዛዞ ዶሳዲስ።
120 ታ ኣሾይ ኔስ ያዪዲ ኮኮሬስ፤
ታካ ኔ ፒርዳስ ያያይስ።
ኤ
121 ታኒ ሱሬኔ ጺሎ ሚሽ ኦዲስ፤
ታና ኡንኤዛይታስ
ኣ ኢሞፋ።
122 ታስ ኔ ኣይሌዛ ሎኤቴስ
ዋሴ ጊዳ፤
ታና ኦቶራንቻታን ኡንኤፋ።
123 ታ ኣይፌቲ ኔ ኣሺዛይሳኔ
ኔ ጺሎ ቃላ ናጊሼ ዶልጁሚዳ።
124 ታስ ኔ ኣይሌዛስ
ኔ ሲቆዛ ኬና ኦ፤
ኔ ዎጋ ታና ታማርሳ።
125 ታኒ ኔ ኣይሌ፤
ኔ ዎጋ ታ ኤራና ማላ
ታስ ኣኬካ ኢማ።
126 ኣቤት ጎዳዉ!
ኔ ኢሚዳ ዎጋይ
ሞሬቲሼ ዴስ፤
ኔኒ ፒርዳና ዎዴያ ሃኖ።
127 ታኒ ኔ ኣዛዞ
ዎርቃፌ ኣዳ ሲቃይስ፤
ሙሩታ ዎርቃፌካ
ኣዳ ዶሳይስ።
128 ኔ ዎጋቲ ኡባይ
ቱሙ ጊዲዳይሳ ኣማናዲስ፤
ሄሳ ጊሻስ ጌላ ኦጌ
ኡባ ኢጻዲስ።
ፔ
129 ኔ ዮቲዳ ቃላይ ኡባይ ማላሊሴስ፤
ሄሳ ጊሻስ ታ ሼምፖያ
ኢዛ ናጋዉስ።
130 ኔ ቃላ ቢርሼይ
ፖኦ ኢሜስ፤
ኣኬካይ ፓጪዳይታስ
ኣኬካ ኢሜስ።
131 ታኒ ኔ ቃላ ሳሜታዲስ፤
ታ ዶናካ ዶያዳ ዬሞታይስ።
132 ሃ ታኮ ሲማ፤
ኔ ሱን ሲቂዛይታ ኡባስ
ኔኒ ኦዛይሳ ማላ
ታስካ ቃታ።
133 ታ ሄሜታ ኔ ቃላ ማላ ሱሪሳ፤
ናጋራይ ሃራና ማላ
ታና ኣ ኢሞፋ።
134 ታኒ ኔ ኣዛዞ ናጋና ማላ
ታና ኡንኤዛይታ
ኩሼፔ ዎዛ።
135 ታስ ኔ ኣይሌዛስ
ኔ ኣይፌሶ ፖኢሳ፤
ኔ ኣዋጃታ ታና ታማርሳ።
136 ኔ ዎጋይ ቦንቼቶንታ ጊሻስ
ታ ኣፉን
ሃ ማላ ጎጌስ።
ጻዴ
137 ኣቤት ጎዳዉ! ኔኒ ጺሎ፤
ኔ ፒርዳይካ ሊኬ።
138 ኔ ኢሚዳ ኣዛዞቲ
ጺሎኔ ኣማንዛዛ።
139 ታ ሞርኬቲ ኔ ቃላ ቶቺዳ፤
ሂስቲን ኔ ቃላ ሚሻይ
ታ ጎምፓን ታማ ማላ ኤጺዴስ።
140 ኔ ቃላይ ፓጬቲ ጌዪዳዛ፤
ታኒ ኔ ኣይሌይ ኢዛ ሲቃይስ።
141 ታኒ ላፋኔ ካቲዳ ኣሳ፤
ጊዲኮካ ታኒ ኔ ዎጋ
ዶጋቤኬ።
142 ኔ ጺሎቴይ ሜርናስ ዴስ፤
ኔ ዎጋይካ ቱማ።
143 ሜቶይኔ ቱጋይ ታና ጋኪዴስ፤
ጊዶ ኣቲን ኔ ኣዛዞቲ
ታና ኡፋይሴቴስ።
144 ኔኒ ዮቲዳይሲ ሜርናስካ ጺሎ፤
ታኒ ሼምፖራ ፓጻ ዳና ማላ
ኔ ታስ ኣኬካ ኢማ።
ቆፍ
145 ኣቤት ጎዳዉ!
ታኒ ኩሜ ዎዚናፔ
ኔኮ ዋሳዲስ፤
ታና ኣላ።
ታኒ ኔ ኣዋጃታስ ኣዛዜታና።
146 ታኒ ኔኮ ዋሳይስ፤
ኔ ታና ኣሻ፤
ታኒ ኔ ኢሚዳ ኣዛዞዛ ናጋና።
147 ባዞይ ዞኦንታ ዎንታራ ዴንዳዳ፥
«ታና ማዳ» ጋዳ
ኔኮ ዋሳይስ፤
ኔ ታስ ጌሊዳ ቃላ
ሂዶታ ኦይስ።
148 ኔ ቃላ ዩሻ ቆፓሼ
ኦማርስ ኩሜ ኣይፌ ቂጶንታ
ኡታ ኣቃይስ።
149 ኣቤት ጎዳዉ!
ኔ ሲቆ ኬና ታ ቃላ ሲያ፤
ኔ ዎጋ ማላ ታና
ሼምፖራ ፓጻ ዎ።
150 ጌኔ ቆፒዛይቲ ታኮ ሺቂዳ፤
ሄይቲካ ኔ ዎጋፔ
ሃኪ ዲዛይታ።
151 ኣቤት ጎዳዉ!
ኔኒ ጊዲኮ ታ ማታን ዳሳ፤
ኔ ኣዛዞቲ ኡባይካ ቱማ።
152 ኔ ኢስታ ሜርናስ
ሚን ኤሳዳሳ፤
ሄሳ ታኒ ቤኒፔ ዶማዳ
ኔ ዎጋፔ ታማራዲስ።
ሬስ
153 ታ ቱጋ ቤያዳ ታና ኣሻ፤
ኣይስ ጊኮ ታኒ ኔ ዎጋ
ዶጋቤኬ።
154 ኔ ታ ጊሻስ ሞቴታዳ
ታና ዎዛ፤
ኔ ጊዳ ቃላ ማላ
ታና ሼምፖራ ፓጻ ዎ።
155 ኢታቲ ኔ ዎጋ ኮዮንታ ጊሻስ
ኢስታስ ኣቶቴ ዴና።
156 ኣቤት ጎዳዉ! ኔ ቃታይ ዳሮ፤
ኔ ቃላ ማላ
ታና ሼምፖራ ፓጻ ዎ።
157 ታ ሞርኬቲኔ
ታና ዬዴዛይቲ ዳሮ፤
ጊዶ ኣቲን ታኒ
ኔ ዮቲዳ ቃላፔ
ሼርኢ ጋቤኬ።
158 ኔ ኣዛዞታ ናጎንታ ጊሻስ
ታ ኣማኔቶንታይታ
ቤያዳ ሻቴታዲስ።
159 ኣቤት ጎዳዉ!
ታኒ ኔ ዎጋ ዶሲዛኮ ቤኣ፤
ኔ ሲቆ ማላ
ታና ሼምፖራ ፓጻ ዎ።
160 ኔ ቃላ ኡባይ ቱማ፤
ኔ ጺሎቴ ዎጋይ ሜርናሳ።
ሳን
161 ዴሬ ሃሪዛይቲ
ታና ጮ ዬዴዳ፤
ጊዶ ኣቲን ታ ዎዚናይ
ኔ ቃላስ ያዬስ።
162 ዳሮ ሚሽ ዲኢዳ ኣሲ
ኡፋዬቲዛ ማላ
ኔኒ ጊዳ ቃላን ታኒ ኡፋዬታይስ።
163 ታኒ ዎርዶ ኢጻይሲኔ ሻቴታይስ፤
ጊዶ ኣቲን ኔ ዎጋ ሲቃይስ።
164 ኔ ጺሎ ፒርዳ ጊሻስ
ታኒ ኔና ጋላሳን
ላፑንቶ ጋላታይስ።
165 ኔ ዎጋ ሲቂዛይታስ
ዳሮ ሳሮቴ ዴስ፤
ኢስታ ጲዛ ሚሺ ዴና።
166 ኣቤት ጎዳዉ!
ታኒ ኔ ኣቶቴ
ኡፋይሳን ናጋይስ፤
ኔ ኣዛዞታካ ፖላይስ።
167 ታኒ ኔ ዮቲዳ ቃላ ናጋይስ፤
ታ ኢዛ ዳሮ ሲቃይስ።
168 ታኒ ኔ ዎጋሲኔ
ኔ ዮቲዳ ቃላስ ኣዛዜታና፤
ታ ኦጌ ኡባይ ኔ ሲንን ቆንጬ።
ታው
169 ኣቤት ጎዳዉ!
ታ ዋሶይ ኔኮ ጋኮ፤
ኔኒ ጊዳ ቃላ ማላ
ታስ ኣኬካ ኢማ።
170 ታ ሾቤ ፑዴ ኔ ሲን ጋኮ፤
ኔኒ ጊዳ ቃላ ማላ
ታና ኣሻ።
171 ኔ ኣዋጃታ ታና ታማርሳዳሳ፤
ሄሳ ጊሻስ ታ ሜቴርሻታፔ
ጋላታይ ፑልቴስ።
172 ኔ ኣዛዞቲ ኡባይ ጺሎ፤
ሄሳ ጊሻስ ታ ዶናይ
ኔ ቃላ ዬጾ።
173 ታኒ ኔ ኣዛዞታ ዶራዲስ፤
ሄሳ ጊሻስ ኔ ኩሼይ
ታና ማዳናስ ጊጊ ኡቶ።
174 ኣቤት ጎዳዉ!
ኔ ኣቶቴ ታ ላሞታይስ፤
ኔ ዎጋይ ታና ኡፋይሴስ።
175 ታኒ ኔና ጋላታና ማላ
ታና ሼምፖራ ፓጻ ዎ፤
ኔ ዎጋይ ታስ ማዶ ጊዶ።
176 ይዳ ዶርሳ ማላ
ታኒ ቶይላታዲስ፤
ጊዶ ኣቲን ታኒ ኔ ዎጋ
ባላቤኬ፤
ሄሳ ጊሻስ ታና
ኔ ኣይሌዛ ኮያ።