Salmos 12

ዳዊቲ ዛማሬታ ካቦስ ኦስፑን ሻያን ዋጼቲዳ ዲን ዬጺዳ ማዛሙሬ

1 ጎዳዉ! ሎኦ ኣሲ ቢታ ቦላፌ ዉሪዳ ጊሻስ

ኔ ታና ማዳርኪ፤

ዴራ ጊዶን ኣማኔቲዛ

ኣሲ ዴና።

2 ኢሶይ ኢሳስ ዎርዶ ሃሳዬስ፤

ኢሶይ ኢሳ ዶናን ጪሜቴስ፤

3 ኣቤት ጎዳዉ!

ባሌዛ ዶና ጎርዳ፤

ኦቶሮን ሃሳይዛ

ኢንጻርሳታ ቃንጻ፤

4 ኢስቲ፥ «ኑኒ ኑ ኢንጻርሳን ጾናና፤

ኑ ዶናይ ኑሳ፤

ኑስ ጎዳይ ኦኔ?» ጌቴስ።

5 ጎዳይ፥ «ሂዬሳቲ ኡንኤቲዳ

ጊሻሲኔ

ሜቶታንቻታ ዋሶ ጊሻስ

ሃኢ ታኒ ዴንዳና፤

ታኒ ኢስቲ ኣሞቲዛ ሳሮቴን

ኢስታ ዎና» ጌስ።

6 ጎዳ ቃላይ ኢዛን

ዋላካይ ባይንዳ ሙሩታ፤

ጮጬ ታማን ላፑንቶ

ፓጬቲ ጌዪዳ ቢራ ማላ።

7 ኣቤት ጎዳዉ!

ኔኒ ኑና ሳሮቴን ናጋ፤

ሃ ዎዴን ዲዛ ኢታ ዬሌታፔ

ሜርናስ ኔ ኑና ኣሻ።

8 ኣሳ ጊዶን ኢታይ

ቦንቼቲዳ ዎዴ

ጌላቲ ኡባ ዎዴ

ኦቶሬቴን ሲሜሬቴቴስ።