1 ኣቤት ጎዳዉ!

ዳዊቴኔ ኢዚ ዳንዳይዳ

ሜቶዛ ኡባ ኔ ቆፓ።

2 ጎዳዉ! ኢዚ ኔስ ጫቂዳ ቃላ፥

ዎልቃማ ያቆቤ ጾሳስካ

ኣዲኔቲዳ ኣዲና ቆፓ።

3 ኢዚካ፥ «ሃይሳፌ ሲንን

ታኒ ታሶ ጌሊኬ፤

ታ ሂጻንካ ኬዚኬ፤

4 ስኮካ ስኪኬ፤

ታ ኣይፌታካ ሊጲኬ።

5 ሄሲካ ታኒ ጎዳስ ዱሳሶ፥

ዎልቃማ ያቆቤ ጾሳስ

ኣቆሶ ጊጊሳና

ጋካናሳ» ጊዴስ።

6 ሄኮ ኑኒ ታቦታዛ ጊሻስ

ኤፍራታን ዲሼ ሲዪዶስ፤

ቂሪያቴ-ዪኣሪሜ ቢታን

ኢዛ ዴሚዶስ።

7 ኑኒ፥ «ኣኔ ኢዚ ዲዛሶ ቦስ፤

ኢዛ ቶሆይ ዬዛሶን

ጉፋኒዲ ኢዛስ ጎይኖስ።

8 «ኣቤት ጎዳዉ! ዴንዳ!

ኔ ሚኖቴስ

ማላታ ጊዲዳ ታቦታራ

ኔ ኬ ጌላዳ ሼምፓ።

9 ኔ ቄሴቲ ጺሎቴ ማይኤቶ፤

ጌሽ ጊዲዳ

ኔ ኣሳቲ ኢሊሌቶ» ጊዶስ።

10 ኔ ኣይሌ ዳዊቴ ጊሻስ ጋዳ

ኔኒ ቲይዳይሳ ዬጎፋ።✝

11 ጎዳይ ዳዊቴስ

ቃንፌ ጫቂዴስ፤

ላሜቶንታ ቃላን፥

«ኔ ናይታፔ ኢሳ ታኒ

ኔ ኣራታን ኡቲሳና።✝

12 ኔ ናይቲ ታ ጫቆ ቃላኔ

ታኒ ታማርሲዳ ቃላ

ኢስቲ ናጊኮ

ኢስታ ናይቲካ

ኔ ካዎቴ ኣራታን

ሜርናስ ኡታና» ጊ ጫቂዴስ።

13 ጎዳይ ጺዮኖ ዶሪዴስ፤

ባስ ዴኢዛሶ

ኦናስ ኣሞቲዲ፥

14 «ሃና ታስ ሜርናስ

ሼምፖሶ ጊዳና፤

ታኒ ኢዞ ዶሲዳ ጊሻስ

ኢዚን ዴኣና።

15 ታኒ ኢዞ ኬሃ ኣንጃና፤

ኢዚን ዴኢዛ ማንቆታካ

ካ ካልሳና።

16 ታኒ ኢዚን ዲዛ ቄሴታ

ኣቶቴ ማይዛና፤

ኢዚን ዴኢዛ ጾሳ ኣሳቲካ

ኡፋይሳን ዬጻና።

17 «ሃ ሶሆን ዳዊቴ ዜሬፌ

ካዎ ኬሳና፤

ታኒ ቲይዳይሳስ ፖኦ ጊጊሳና።✝

18 ታኒ ኢዛ ሞርኬታ ዬላቻና፤

ጊዶ ኣቲን ኢዛ ሁኣን ዴኢዛ

ካዎቴ ካላቻይ ጶላና» ጊዴስ።