1 ታ ኩሼታ ኦላስ፥

ታ ቢራታካ

ጾንጌስ

ሎሂሲዳ ጎዳይ

ታ ዛላይ ጋላቴቶ!

2 ኢዚ ታና ሲቂዛኔ

ጌንዛ ጾሳ፤

ኢዚ ታስ ሚጻኔ

ታና ኣሺዛይሳ፤

ኢዚ ታ ጎንዳሌኔ

ታኒ ባቃታዳ ኣቲዛሶ፤

ካዎቴታካ

ኢዚ ታስ ሃሪሲዛይሳ።

3 ኣቤት ጎዳዉ!

ኔ ሃይሳ ሲሬ ቦንቻናስ

ኣሲ ኣዜ?

ኔ ሃይሳ ኣሳስ ቆፓናዉ

ኣሳ ናይ ኣዜ?✝

4 ኣሲ ኢሲቶ ጫርኪ ኣዛ

ጫርኮ ማላ፤

ኢዛ ላይቲካ

ኤሶን ይዛ ኩዋ ማላ።

5 ኣቤት ጎዳዉ!

ኔኒ ሳላ ዳካዳ

ዱጌ ዎ!

ዙማታ ቦቻዳ ጩዋሳ!

6 ዎልቃን ዬዳዳ

ኔ ሞርኬታ ላላ!

ኔ ዎንዳፌ ዪሻን

ዱካዳ ዬዴ!

7 ቦላፌ ኔ ኩሼ ዬዳዳ፥

ታና ዎልቃማ ሃፌ

ጎቻ ኬሳ፤

ኣላጋ ኣሳታ ኩሼፔ

ኔ ታና ኣሻ።

8 ኢስታ ዶናይ ዎርዶ ሃሳዬስ፤

ኢስቲ ኡሻቻ ኩሼ ዴንዲ

ዎርዶ ጫቄቴስ።

9 ኣቤት ጾሳዉ!

ታኒ ኔስ ኦራ

ማዛሙሬ ዬጻና፤

ታሙ ሻያን ዋጼቲዳ ዲን

ኔስ ዬጻና።

10 ካዎታስ ጾኖ ኢማሳ፤

ኔ ኣይሌ ዳዊቴ ጊ

ማሻፌ ኣሻሳ።

11 ዎርዶ ሃሳይዛይታፔኔ

ባ ኡሻቻ ኩሼ ዴንዲ

ዎርዶ ጫቂዛይታፔኔ

ኣላጋታፔ ታና ኣሻኔ ናጋ።

12 ኑ ኣቱማ ናይቲ

ባ ናቴቴን ዳልቂዳልቂዲ

ዲጪዛ ሚ ማላ ጊዴቶ!

ኑ ማጫ ናይቲካ

ካዎ ኬ ጉላን

ኣሌቆስ ኤሲዳ

ቱቄ ማላ ጊዴቶ።

13 ኑ ጎታራታን ዱማ ዱማ

ቆሞ ካ ኩሞ፤

ኑ ዶርሳቲ ሺ ላቃ

ጋካናስ ዬሌቶ፤

ሄሜቲዛሶን ታሙ ሺ

ጋካናዉ ዳሬቶ።

14 ኑ ሚዛቲ ዬሊዛይታ ጊዴቶ፤

ኢስቲ ኣዉጫዮንታ

ዬሌቲዲ ጮራቴቶ።

ኑና ኣሲ ዲኦፖ፤

ኑ ዛጎን ዋሶይ ሲዬቶፎ።

15 ሃ ኣንጆይ ኢዛ ጋኪዛ ዴሬይ

ኣንጄቲዳ ዴሬ፤

ጾሲ ኢዛስ ጎዳ ጊዲዳ ዴሬይ

ኣንጄቲዳ ዴሬ።