Salmos 29

ዳዊቴ ማዛሙሬ

1 ኢንቴኖ ሳሎን ዲዛ ሜታቶ!

«ቦንቾይኔ ዎልቃይ

ጎዳሳ» ጊዲ ዮቲቴ።

2 ጎዳ ቦንቾ

ሱን ጋላቲቴ፤

ኢዛ ጌሻቴ ቴማስ

ጎዳ ጎይኒቴ።✝29፡1-2 ማዛ 96፡7-9

3 ጎዳ ጬንጉርሳይ

ሃታ ቦላን ሲዬቴስ።

ቦንቾ ጾሳይ

ዳዳ ማላ ጉሜስ፤

ጎዳይ ጊታ ሃታ ቦላን

ጉሜስ።

4 ጎዳ ጬንጉርሳይ ዎልቃማ፤

ጎዳ ጉንይ፥

«ኔስ ሆላ!» ጊሲዛዛ።

5 ጎዳ ጬንጉርሳይ

ዚጋ ሚ ሜንሬስ፤

ሊባኖሴ ዚጋታካ

ጎዳይ ሜንሬስ።

6 ሊባኖሴ ዙማ

ጋሎ ማራ ማላ ቡራቂሴስ፤

ሲሪዮኔ ዙማካ

ሜን ማላ ጺኪሴስ።*29፡6 ሲዶና ቃላራ ሲሪዮኔ ጊዛይሲ ሄርሞኔ ቤሴስ።

7 ጎዳ ጬንጉርሳይ

ዎልቃን ፖፖልኡ ጌስ።

8 ጎዳ ጬንጉርሳይ

ባዞ ቃስ፤

ጎዳይ ቃዴሴ ባዞ ቃስ።

9 ጎዳ ጬንጉርሳይ

ዎላታ ቃስ፤

ሚ ሃይካ ቆቆፌስ።

ኢዛ ኬን ዴኢዛይቲ፥

«ቦንቾይ

ጎዳስ ጊዶ» ጌቴስ።

10 ጎዳይ ዲኦ ሃ ቦላ

ባ ኣራታ ዎዲ ኡቲዴስ፤

ጎዳይ ባ ካዎቴ

ኣልጋን ኡቲዲ

ሜርናስ ሃሬስ።

11 ጎዳይ ባ ዴራስ ዎልቃ ኢሜስ።

ባ ኣሳካ ሳሮቴን ኣንጄስ።