1 ኣቤት ጎዳዉ!

ኔኒ ታና ጪማፌ ኬሳዳሳ፤

ታ ሞርኬቲ ታ ቦላ

ኡፋዬቶንታ ማላ ኦዳሳ፤

ሄሳስ ታ ኔና

ቁ ቁ ሂስታይስ።

2 ኣቤት ታ ጎዳዉ!

ኔኒ ታና ማዳና ማላ

ታ ኔኮ ዋሳዲስ፤

ኔካ ታና ፓዳሳ።

3 ኣቤት ጎዳዉ!

ታና ዱፎን ቦንታ ማላ

ናጋዳሳ፤

ዱጌ ጪማ ኦላን ጌሎንታ ማላ

ኔኒ ታና ኣሻዳሳ።

4 ኢንቴኖ ጾሳ ኣሳቶ!

ጎዳስ ዬጺቴ፤

ኢዛ ጌሻ ሱንካ ሳቢቴ።

5 ኢዛ ሃንቆይ ጉ ዎዴሳ፥

ጊዶ ኣቲን ኢዛ ኪያቴ

ዴኦ ላይ ኡባሳ፤

ኦማርስ ዬኪሼ ኣቂኮካ

ማላዶ ዛዋይ

ባይንዳ ኡፋይስ ጊዴስ።

6 ታኒ ዎፓን ዲዛ ዎዴ፥

«ታኒ ሙሌካ ኮኮሪኬ» ጋዲስ።

7 ኣቤት ጎዳዉ!

ኔኒ ታስ ኪዪዳ ዎዴ፥

ታና ጊታ ዙማ ማላ

ሚን ኤሳዳሳ፤

ጊዶ ኣቲን ኔኒ ኔ ሲን

ታፔ ሃራሶ ዛሪዳ ዎዴ

ታኒ ዳጋማዲስ።

8 ኣቤት ጎዳዉ!

ታኒ ኔና ጼይጋዲስ፤

ታኒ ጎዳፔ

ማሮቴ ዎሳዲስ፤

9 «ታ ሃይቂኮ ዎይኮ

ዱፎን ጌሊኮ

ኔ ታፔ ኣይ ዴማኔ?

ቢታን ጌሊዳ ኣሲ

ኔና ጋላቲ ኤሪዜ?

ኔ ኣማኔቴ

ሃሳዪ ኤሪዜ?

10 ኣቤት ጎዳዉ!

ታ ዎሳ ኔ ሲያ፤

ታስ ቃታ።

ኣቤት ጎዳዉ!

ኔ ታስ ማዶ ጊዳ» ጋዲስ።

11 ታ ዬሆ ዬን ላማዳሳ።

ካዮ ማይኦዛ ታፔ ቃራዳ

ኡፋይሳ ማይኦ

ታና ማይዛዳሳ።

12 ሄሳ ጊሻስ ታኒ ኔና

ሳባናፔ ኣቲን ጮኡ ጊኬ።

ኣቤት ታ ጎዳዉ!

ታኒ ኔና ሜርናስ ጋላታና።