ካዎ ኣቢሜሌኬ ሲንፌ ኣቲ ቢዳ ዎዴ ዳዊቲ ዬጺዳ ማዛሙሬ
1 ታኒ ጎዳ ኡባ ዎዴ ጋላታና፤
ኢዛ ጋላታይ ኣይ ዎዴንካ
ታ ዶናፔ ፓጬና።34፡1-22 1ሳሜ 21፡13-15
2 ታኒ ጎዳን ጬቄታይስ፤
ናቄቲዳይቲ ሄሳ ሲዪዲ
ኡፋዬቴቶ።
3 ኣኔ ታናራ ኢሲፌ
ጎዳ ቦንቾስ፤
ኢዛ ሱንካ
ቁ ቁ ኦስ።
4 ታኒ ጎዳ ኮያዲስ፤
ኢዚካ ታስ ዛሪዴስ፤
ታኒ ያዪዛ ሚሽ ኡባፌ
ታና ኣሺዴስ።
5 ኢዛኮ ጼሊዛ ኡባ
ሲንይ ፖኤስ፤
ኢስቲ ሙሌካ ዬላቴቴና።
6 ሃ ሂዬሳይ ዋሲዴስ፤
ጎዳይ ኢዛ ዋሶዛ ሲዪዴስ፤
ሜቶ ኡባፌ ኢዛ ኣሺዴስ።
7 ጎዳ ኪታንቻይ
ጎዳስ ያዪዛይታ ናጌስ፤
ኢዚ ኢስታ ዩሾዛን ጊዲዲ
ኢስታ ኣሼስ።
8 ጎዳይ ኪያ ጊዲዳይሳ
ዩሺ ቆፒቴ፤
ኢዛኮ ሺቂዳይ ኣንጄቲዳዴ።34፡8 1ጴጽ 2፡3
9 ኢንቴኖ ጌሻ ኣሳቶ!
ጎዳስ ያዪቴ፤
ኣይስ ጊኮ ኢዛስ ያዪዛ ኡባታስ
ኣይኮይካ ፓጬና።
10 ጋሞቲ ሚዛዚ ዪን
ኮሻቴቴስ፤
ጎዳ ኮይዛይታስ ጊዲኮ
ሎኦ ሚሺ
ኣይኮካ ፓጬና።
11 ናይቶ! ሃ ዪቴ፤
ታ ጊዛዝ ሲዪቴ፤
ታኒ ኢንቴና
ጎዳስ ያሻቴ
ታማርሳና።
12 ኣዱሳ ላይ ዳናስ ዶሲዛይኔ
ሎኦ ሚሽ ቤያናስ
ኮይዛይ ኦኔ?
13 ኔ ኢንጻርሳ
ኢታ ሃሳዮንታ ማላ ናጋ፤
ኔ ዶናፔ ዎርዶይ
ኬዞንታ ማላ ናጌታ።
14 ኢታፔ ሻኬታ፤
ሎኦ ሚሽ ኦ፤
ሳሮቴ ኮያዳ ካላ።
15 ጎዳ ኣይፌይ ጺሎታኮ ጼሌስ፤
ቃሴ ኢዛ ሃይ
ኢስታ ዎሳ ኤዝጌስ።
16 ኢስታ ሃሳኢሲዛ ሚሽ
ቢታፌ ይሳና ማላ፥
ጎዳይ ኢታ ኦዛይታ
ባ ሃንቆ ኣይፌን ጼሌስ።34፡12-16 1ጴጽ 3፡10-12
17 ጺሎቲ ዋሴቴስ፤
ጎዳይ ኢስታ ዋሶ ሲዬስ፤
ኢዚካ ኢስታ ሜቶ
ኡባፌ ኣሼስ።
18 ጎዳይ ዎዚናይ ሜቂዳይታስ
ማታን ዴስ፤
ቃሴ ሂዶታ ቃንጺዳይታካ
ኣሼስ።34፡18 ሂዶታ ቃንጺዳይታካ ኣሼስ ጊዛይሳ ኢሲ ኢሲ ጌሻ ማጻፋ ቢርሼን ባንታ ኣያናን ሊቂዳይታ ኣሼስ ጌቴቲ ጻፌቲዴስ።
19 ጺሎ ኣስ ጋኪዛ ሜቶይ ዳሮ፤
ጊዶ ኣቲን ጎዳይ
ኢዛ ሄ ኡባፌ ኣሼስ።
20 ጎዳይ ኢዛ ሚን ናጌስ፤
ኢዛ ሜቄታፔ
ኢሶይካ ሜቄና።34፡20 ዮሃ 19፡36
21 ኢታታ ኢስታ ኢታቴ ዎና፤
ጺሎታ ኢጺዛይቲ ፒርዴታና።
22 ጎዳይ ባ ኦሳንቻታ ኣሼስ፤
ኢዛኮ ባቃቲዳ ኦኒኔ
ፒርዴቴና።