1 ታኒ፥ «ኢንጻርሳን

ናጋራ ኦንታ ማላ

ታኒ ታ ኦጌ ናጋና፤

ኢታ ኣሳቲ

ታ ሲንን ዲዛ ዎዴ

ታ ዶና ጎርዳና» ጋዲስ።

2 ታኒ ዱዴ ማላ ጮኡ ጋዲስ፤

ሃራይ ኣቶሺን ሎኦ ሚሽ

ሃሳያናፔካ ጮኡ ጋዲስ፤

ጊዶ ኣቲን ታ ዋዬይ

ሃ ዳሪዴስ።

3 ታ ዎዚናይ ቆፋን ሴሊዴስ፤

ታ ዩሻ ቆፒሺን ታማ ማላ

ኤጺ ኬዚዴስ።

ሂስቲን ታኒ ሃሳያ ዶማዲስ።

4 «ኣቤት ጎዳዉ! ታ ዴኦ ዉርሴኔ

ታስ ዴኣናስ ኣቲዳ ጋላሳታ

ታና ቤሳ።

ቃሴ ታ ዳና ላይይ

ኣይ ኬና ቃንኮ

ታና ኤሪሳ።

5 ኔኒ ታ ላይ

ቂ ታኮ ኬና ኬሳዳሳ፤

ታ ላይ ኔ ሲንን

ቆዳን ባይንዳ ማላ፤

ቱማፔ ኣሲ ኡባይ

ኢሲቶ ኣ ቢዛ ጫርኮ ማላ።

6 ቱማፔ ኣሳ ዱሲ ኤሾ ማላ፤

ጮ ሜላ ሃዳ ሃሮ

ሺሾን ዳቡሬስ፤

ጊዶ ኣቲን ኦኒ ኤካናኮ ኤሬና።

7 «ኣቤት ጎዳዉ!

ኔፔ ኣቲን ሃራ

ኦናኮ ጼሎ?

ታ ሂዶታይ ኔናና።

8 ታ ሞሮ ኡባፌ ታና ኣሻ፤

ኤያታ ሚቻስ ታና ኬሶፋ።

9 ሃይሳ ኡባ ኦዳይ

ኔና ጊዲዳ ጊሻስ

ታኒ ጮኡ ጋና፤

ዶናካ ፖጊኬ።

10 ኔ ቦሻ ታ ቦላፌ ዴን፤

ኔ ዎልቃማ ሾቻ ጋሶን

ታ ዳቡራዲስ።

11 ኔኒ ኣስ ኢዛ ናጋራ ጊሻስ

ሴራሳኔ ሙራሳ፤

ኢዛስ ዲዛ ኣልኦ ሚሽ ባዳ ማላ

ኔ ዉርሳሳ፤

ቱማፔ ኣሲ ኡባይ ኢሲቶ

ጫርኪ ኣዛ ጫርኮ ማላ።

12 «ኣቤት ጎዳዉ!

ታ ዎሳ ሲያ፤

ታና ማዳናስ ታ ዋሶዛ ኤዝጋ።

ታ ኣፉን ጮኡ ጎፓ፤

ታኒ ካሴ ታ ኣዋታ ኡባ ማላ

ቤቴ ኣሲኔ ኢማ ጊዳዳ

ኔ ኬን ዳይስ።

13 ታኒ ጉዬ ሲማ ያናስ

ዳንዳዮንታሶ ባናፔ ካሴ

ጉ ዎዴ ኡፋዬታና ማላ

ታና ኣጋሻርኪ!» ጋዲስ።