1 ኣቤት ታ ጺሎ ጾሳዉ!

ታኒ ጼይጊዛ ዎዴ

ኔ ታስ ኮያ።

ታኒ ኡንኤቲዳ ዎዴ፥

ኔኒ ታና ሼምፒሳዳሳ፤

ታስ ቃታዳ ታ ዎሳ ሲያ።

2 ኢንቴኖ ኣሳቶ!

ኢንቴ ኣዉዴ ጋካናስ

ታ ቦንቾ ካዉሻኔ?

ኢንቴ ኣዉዴ ጋካናስ

ሃዳ ሚሽ ሲቃኔ?

ኢንቴ ኣዉዴ ጋካናስ

ዎርዶ ሚሽ ካላኔ?

3 ጎዳይ ጺሎ ኣሳታ

ባስ ሻኪ

ዱማ ዎዳይሳ

ኢንቴ ኤሪቴ፤

ሄሳ ጊሻስ ታኒ ጎዳ

ጼይጊዛ ዎዴ

ኢዚ ታስ ሲዬስ።

4 ሃንቄቲቴ፤ ጊዶ ኣቲን

ኢንቴ ሃንቆን

ናጋራ ኦፍቴ።

ሂጻን ኢቺ ዲዛ ዎዴ

ሲርጲ ጊዲ ኢንቴ ዎዚና ቆሪቴ።✝

5 ጎዳስ ቤሲዛ ያርሾ ያርሺቴ፤

ጎዳንካ ጾሳንካ

ኣማኔቲቴ።

6 ዳሮቲ፥ «ኑና

ሎኦ ቤሳናይ

ኦኔ?» ጌቴስ፤

ኣቤት ጎዳዉ!

ኔ ሎኦ ኣይፌሶይ

ኑ ቦላ ፖኦ።

7 ካኔ ዎይኔ ኡሹ

ዳሮ ዴሚዲ

ሃራቲ ኡፋዬቲዛይሳፌ ኣዳ

ኔኒ ታ ዎዚና

ኡፋይሳን ኩንዳሳ።

8 ኣቤት ጎዳዉ!

ኔ ጻላ ታና ሳሮን ናጋ

ኣይሲዛ ጊሻስ

ታኒ ኢቻዳ ሳሮቴን

ስካይስ።