1 ዉሻይ ፑልቶ ሃ ላሞቲዛ ማላ፥

ኣቤት ጾሳዉ፥

ታኒካ ኔና ላሞታይስ።

2 «ታ ሼምፖያ

ታኒ ባዳ ጾሳ ሲን

ቤያናይ ኣዉዴሻ?» ጋዳ

ጾሳ፥ ዴኦ ጾሳ ሳሜታዱስ።

3 ኣሳይ ኡባቶ፥

«ኔ ጾሲ ኣዋን ዲዜ?»

ጊዛ ዎዴ ታስ ጋላሲኔ ኦማርስ

ኣፉን ቁማ ጊዲዴስ።

4 ታ ዎዚናያ ጬጬን ጊዶራ

ሴራሼ ሃይታንታ ኣኬካዱስ፤

ዳሮ ዎዴ ታ ጾሳ ኬ

ካሌሼ

ኢሊሊሳኒኔ ጋላታ ዬን

ባኣሌ ቦንቻና

ሺቂዳ ዳሮ ኣሳ ጊዶራ

ታ ዋና ቢዛኮ ኣሙሳዲስ።

5 ታኒ ኣይስ ሂዶታ ቃንጻዚና?

ቃሴ ኣይስ ጬጫዚና?

ታኒ ጾሳን ኣማኔታይስ፤

ታና ኣሺዛ ታ ጾሳ

ታ ቡሮ ጋላታና።

6 ታ ጾሳዉ!

ታ ዎዚናያ ጬጫዱስ፤

ሄሳ ጊሻስ

ታኒ ዮርዳኖሴ ቢታን

ሄርሞኔ ዙምቡላ

ሚዛሬ ዙማ ቦላ ኤቃዳ

ኔና ታ ቆፓና።

7 ኔ ፒሳ ጉንን

ጪማይ ጪማስ ኣንኬስ፤

ቃሴ ኔ ዳምባላይኔ

ኔ ጫርኮ ኡባይ

ታ ቦላራ ኣዴስ።

8 ጎዳይ ባ ሜርና ሲቆ ጋላስ

ታስ ኪቴስ።

ታኒካ ኦማርስ ኢዛስ

ጋላታ ማዛሙሬ ሺሻይስ፤

ሄሲካ ታ ዴኦ ጾሳስ

ሺሺዛ ዎሳ።

9 ታ ጾሳዉ ታስ ዛላዉ!

«ኔ ታና ኣይስ ዶጋዲ?

ታ ሞርኬቲ ታና ቆሂሺን

ታ ጬጫሼ

ኣይስ ዴኦ?» ጋይስ።

10 ታ ሞርኬቲ ታና ኡባ ዎዴ፥

«ኔ ጾሳይ ኣዋን ዲዜ?»

ጊዲ ዮኦን ታና ጫዴቴስ፤

ሜቄካ ሜን ጫዬቴስ።

11 ታኒ ኣይስ ሂዶታ ቃንጻዚና?

ቃሴ ኣይስ ጬጫዚና?

ታኒ ጾሳን ኣማኔታይስ፤

ታና ኣሺዛ ታ ጾሳ

ታ ቡሮ ጋላታና።