1 ጎዳይ ጊታ፤

ኑ ጾሳ ካታማን

ጌሻ ዙማዛን

ጊታ ጋላታይ ኢዛስ ቤሴስ።

2 ቢታ ኡባስ ኡፋይስ ጊዲዳይ፥

ፑዴሃ ባጋራ ቤቲዛይ

ቃኔ ሎኦ ጊዲዳ

ጺዮኔ ዙማይ

ዎጋ ካዎዛ ካታማ።✝48፡2 ማቶ 5፡35

3 ሄ ካታማ ጊምቤዛ ጊዶን፥

ኢዚ ካታማይስ ኣሺዛ

ሚጻ ጊዲዳይሳ ቤሲዴስ።

4 ካዎቲ ባንታ ቶራንቻታራ

ኢሲፌ ሺቂዳ፤

ሂስቲዲ ጺዮኖ ኦላናዉ ዪዳ።

5 ጊዶ ኣቲን ኢዞ ቤኢዲ ማላሌቲዳ፤

ዳጋሚዲ ጉዬ ባቃቲዳ።

6 ኢስቲ ሄሳን ዴኢሺን

ኢስታ ያሻ ኮኮሪሲ ኦይኪዴስ፤

ሚጻይ ኦይኪዳ

ማጫሳ ማላ ሚጻቲዳ።

7 ኣርሼይ ሞኪዛሶ ባጋ

ዎልቃማ ጫርኮን ሜቂዛ

ታርሴሴ ማርካቤታ ማላ

ኢስታ ኮኮርሳዳሳ።

8 ኑኒ ሲዪዳ ማላካ፥

ኡባፌ ዎልቃማ

ጎዳ ካታማን፥

ኑ ጾሳ ካታማን

ኢዚ ኦዳይሳ

ኑ ቤኢዶስ።

ጾሲ ሄ ካታማ ሜርናስ

ሚን ኤሳና።

9 ኣቤት ጾሳዉ፥

ኔ ኬ ጊዶን

ኔ ሜርና ሲቆ ቆፖስ።

10 ኣቤት ጾሳዉ፥

ኔ ሱን ማላካ

ኔ ጋላታይ ሳኣ ጋጻ ጋኪዴስ፤

ኔ ኡሻቻ ኩሼይ

ጺሎቴን ኩሚዴስ።

11 ኔ ፒርዳ ጊሻስ፥

ጺዮኔ ኣሳይ ኡፋዬቴስ፤

ዩሁዳ ካታማቲካ

ኡፋይሳን ሆምቦጬቴስ።

12 ጺዮኔ ዩሾን ሄሜቲቴ፤

ኢዚ ጊምቤታ ዩሾን

ያኔ ሃ ሲሜሬቲቴ፤

ኢዚ ሻኮታ ቆዲቴ።

13 ዪዛ ዬሌታስ ዮታና ማላ፥

ኢዚ ኣሆ ጊምቤዛ ኣኬኪቴኔ

ኢዚ ሚጻታ ጾሞሲቴ።

14 ኢንቴ፥ «ሜሪ ሜርናስ

ሃ ጾሳይ ኑ ጾሳ፤

ኑ ሃይቃና ጋካናስ

ኢዚ ኑና ካሌና»

ጊዲ ዮቲቴ።