1 ዴሬዞ፥ ኢንቴ ኡባቲካ

ሃይሳ ሲዪቴ!

ኢንቴኖ ሳኣ ቦላ ዲዛ ኡባቶ!

ሃይሳ ኤዝጊቴ።

2 ቃይኔ ዚቃይ፥

ዱሬይኔ ማንቆይካ ሲዪቴ።

3 ታ ዎዚና ቆፋይ ኣኬካ ኢሜስ፤

ታ ዶናይ

ኣ ኤራቴ ቃላ

ሃሳዬስ፤

4 ታኒ ታ ሃይ

ሌሚሶታኮ ዛራና፤

ኢስታ ቢርሼካ

ታ ዲን ቆንጪሳና።

5 ሜቶ ጋላሲ ዪዛ ዎዴኔ

ኢታቴን ታና ላቢዛይቲ

ዶዲ ኡቲኮ

ታ ኣይስ ባቦ?

6 ባ ኣቆታን ኣማኔቲዛይታሲኔ

ባ ዱሬቴ ዳሮን

ጬቄቲዛይታስ ታ ኣይስ ባቦ?

7 ኣሲ ባርካ ባና ዎዜና፤

ዎይኮ ባ ሼምፖ ጊሻስ

ጾሳስ ዋጋ ቃንጻናስ

ዳንዳዬና።

8 ኣሳ ሼምፖ ዋጋይ

ኬሂፔ ኣልኦ፤

ሼምፖ ዱዛ ዋጋይ

ሙሌካ ዴና።

9 ኣይ ዋጋ ቃንጺንካ

ኢዚ ሜርናስ ዴኣና ማላ፥

ዎይኮ ኢዚ ሃይቆንታ ማላ

ኦናዉ ዳንዳዬና።

10 ኤያቲኔ ዳማቲ ሃይቂዛ ማላ

ኣ ኤራንቻቲካ ሃይቃና፤

ኡባይካ ባ ኣቆታ

ሃራስ ዬጊ ባና፤

ሄሳ ኡባይካ ቤኣና።

11 ዳሮ ጋዴ

ኢስቲ ባ ሱንን ሃሪኮካ

ኢስታስ ሜርና ኬይ ዱፎ፤

ኢዚካ ኢስታስ

ዬሌታፔ ዬሌታ ጋካናዉ

ዱሳሶ ጊዳና።

12 ኣሲ ኣይ ዱሬቲኮካ

ባ ዱሬቴራ ካንና፤

ኢዚ ዶኣ ማላ ሃይቃና።

13 ባናን ኣማኔቲዛ

ኤያታ ቃዳይኔ

ኢስታ ቃላ ካሊዛይታ

ዉርሴ ሳማይ ሃይሳ።

14 ሹካስ ቆሬቲዳ ዶርሳታ ማላ

ኢስቲ ዱፎስ ዶሬቲዳ፤

ሃይቆይ ኢስታ ሄንንቻ

ጊዳና፤

ኢስቲ ባንታ ያሊሶ ኬፌ

ሃኪዲ ዱፎን ሙሳና።

ሱሬ ኣሳቲ ማላዶራ

ኢስታ ዱፎ ቦላራ ሲሜሬታና።

15 ጊዶ ኣቲን ጾሲ

ታ ሼምፖ ዎዛና፤

ኢዚ ታና ሃይቆ ዎልቃፌ

ኣሺ ኤካና።

16 ኣሲ ዱሬቲዛ ዎዴኔ

ኢዛ ኣቆታይ ዳሪ ዳሪ ቢዛ ዎዴ

ኢዛዴስ ያዮፋ።

17 ጋሶይካ ኢዚ ሃይቂሼ

ኣይኮካ ኤኪ ቤና፤

ኢዛ ኣቆታይ ኢዛራ ኢሲፌ

ዱፎን ጌሌና።

18 ኣሲ ፓጻ ዲዛ ዎዴን፥

«ታስ ኩሚዴስ» ጊኮካ፥

ኡባይ ኢዛስ ጊጊዳ ጊሻስ

ጋላቴቲኮካ፥

19 ሲሚዲ ሙሌካ

ፖኦ ቤኦንታሶ

ባ ኣዋታ ማባራን ጋይቴስ።

20 ኣሲ ኤራቴ ባይንዳ

ኣይ ዱሬቲኮካ

ኢዚ ዶኣ ማላ ሃይቃና።