1 ኣቤት ጾሳዉ!

ካዎቴቲ

ኔ ቢታ ዎራጂዳ፤

ጌሻ ጊዲዳ

ጾሳ ኬ ቱኒሲዳ፤

ዬሩሳላሜ ላሊ ዬጊዳ።✝

2 ኢስቲ ኔ ኣይሌታ ኣሃ

ሳሎ ካፎታስ

ቁማ ኦዲ ኢሚዳ፤

ቃሴ ኔ ጌሻ ኣሳታ ኣሾ

ሳኣ ዶኣታስ ኢሚዳ።

3 ኢስታ ሱ ዬሩሳላሜ ዩሾን

ሃ ማላ ጉሲዳ፤

ኢስታ ኣሃ

ሞጊዛ ኣሲ ይዴስ።

4 ኑ ሾሮታስ ኑኒ ቂልጫስ ጊዲዶስ፤

ኑ ሄራን ዲዛይታስ ቂሲኔ

ሚቻስ ኣቲዶስ።

5 ኣቤት ጎዳዉ!

ሃይሲ ኣዉዴ ጋካናስ

ሃናኔ?

ኔኒ ሜርናስ ሃንቄታኔ?

ኔ ቃናቴይ ታማ ማላ

ኤጺሼ ዴኣኔ?

6 ኔና ኤሮንታ ዴሬታ ቦላኔ

ኔ ሱን ጼይጎንታ

ካዎቴታ ቦላ

ኔ ሃንቆዛ ጉሳ።

7 ኣይስ ጊኮ ኢስቲ

ያቆቤ ዜሬታ

ዎዳኔ

ኢስቲ ዴኢዛሶዚካ

ሙሌራ ይሲዳ።

8 ካሴ ኑ ኣዋታ ናጋራ

ኑ ቦላ ቆዶፓ፤

ኤሶን ኔ ማሮታ ኑስ ኪታ፤

ኣይስ ጊኮ

ኑኒ ኬሂፔ ሜቶቲዶስ።

9 ኣቤት ኑና ኣሺዛ ጾሳዉ!

ኔ ሱን ቦንቾ ጊሻስ

ኑና ማዳ፤

ኔ ሱን ጊሻስ ኑና ኣሻ፤

ኑ ናጋራካ ኣቶ ጋ።

10 ካዎቴቲ፥ ኣይስ «ኢስታ ጾሲ

ኣዋን ዲዜ?» ጋኔ?

ኔ ኣይሌታ ሱ

ኢስቲ ጉሲዳይሳ

ኔኒ ሃሎ ኬሲዛይሳ

ኑ ኣይፌይ ቤኢሺን

ካዎቴታ ኤሪሳ።

11 ቃሾ ኣሳታ ኦሌይ

ኔ ሲን ጋኮ፤

ሃይቆስ ፒርዴቲዳይታ

ኔ ሚኖ ቄሴን ኣሻ።

12 ኣቤት ጎዳዉ!

ኑ ሾሮቲ ኔና ቂዳይሳ

ሃሎ ላፑን ኩሼ ኢስታስ ዛራ።

13 ሄ ዎዴ ኑኒ ኔ ዴሬቲኔ

ኔስ ዉዴ ዶርሳቲ

ሜርናስ ጋላታ ኔስ ኢማና፤

ዬሌታፔ ዬሌታ ጋካናስ

ኔኒ ኑስ ኦዳ ኦሶዛ

ኑ ዮታና።