1 ጎዳይ ካዎቲዴስ፤

ሳኣን ዴኢዛ ኣሳይ ኡፋዬቶ፤

ኣባ ጊዶን ዴኢዛ

ሃሩሮቲ ኡፋዬቴቶ።

2 ሻራይኔ ሳካና ማይ

ኢዛ ዩዪ ኣዴስ፤

ጺሎቴኔ ቱማቴ

ኢዛ ካዎቴ

ኣራታስ ዮቻ።

3 ታማይ ኢዛፔ ሲንራ ቤስ፤

ኢዛ ዩሾን ዲዛ

ሞርኬታካ ጹጌስ።

4 ኢዛ ዎልቃን ሳኣ ፖኢሴስ፤

ቢታይ ሄሳ ቤኢዲ ቃጼስ።

5 ጎዳ ሲንን፥

ሳኣ ኡባ ጎዳ

ሲንን ዙማቲ

ሙቃዳ ማላ ሴሪዳ።

6 ሳሎቲ ኢዛ ጺሎቴ ኣዋጄቴስ፤

ኣሳይ ኡባይ ኢዛ ቦንቾ ቤኤስ።

7 ሚስሌታስ ጎይኒዛይቲኔ

ኤቃ ጾሳታን ጬቄቲዛይቲ

ኡባይ ዬላቴቶ!

ኤቃ ጾሳቲ ኡባይ

ጎዳስ ጉልባቴቶ!

8 ኣቤት ጎዳዉ!

ጺዮኔ ኣሳይ ኔ ጺሎ ፒርዳ

ሲዪዲ ኡፋዬቴስ፤

ዩሁዳ ካታማቲካ፥

«ሃሹ» ጌቴስ።

9 ኣቤት ጎዳዉ!

ኔኒ ሳኣ ኡባፌ ቃሳ፤

ጾሳታ ኡባፌ ኔኒ ጊታታሳ።✝

10 ጎዳ ዶሲዛይቶ! ኢታ ኢጺቴ፤

ኢዚ ባስ ኣማኔቲዛይታ

ሼምፖ ናጌስ፤

ቃሴካ ኢታታ ኩሼፔካ

ኣሼስ።

11 ጺሎታስ ፖኦይ ፖኢ ፖኢ ባና፤

ዎዚና ሱሬታስ ኡፋይሲ ዳና።

12 ኢንቴኖ ጺሎቶ!

ጎዳን ኡፋዬቲቴ፤

ጌሻ ሱን

ኢዛይሳ ጋላቲቴ።