1 Samwẹl 24

Devid obhumọ Saul ofhufhọ

1 K’ogbe kw’Saul okwun za ch’okwubhọ aPhilistiya, matek-ẹ bẹ́, "Devid oning z’ibyi s’anọng nna arukọ, z’Ẹn-Gẹdi." 2 Ofona nya, Saul oteka ajinọng ny’Israẹl maphyir p’ade anọng nnọhna nchenọmfa okwuma arọbh ijobh, otima bẹ od-oror Devid ttara ajinọng pẹ za ch’ọnyọm Ntakpa s’Avu p’Ẹgba. 3 Okwu opyirẹ k’ivu-ninga s’inyọm eden, nya ch’ọtakpamma wanẹ oning, Saul odim nya bẹ́, okwoka ọwọhng. Ny’ogbe nwo, Devid ọttara ajinọng pẹ maning z’ẹtaanga, z’nnam-nnam kw’ọtakpamma nwo.

4 Ajinọng p’Devid aben bẹ́, "Ma wọ ode ewu ndo ch’iwa Ọvaar Ibinọkpaabyi ọgbaak odik ọmaana, ch’oben-ọ bẹ́, ‘Kaam m’ntọka ọwawunanọng kwọ nkọ-ọ ny’mbọhk bẹ́, asẹ-ẹ k’ose kw’ọdaak-ọ.’ " Nya o, Devid obina ozenga bẹ́ mekem-mekem od-omekẹ ẹmma ch’owurọ-baba kw’Saul.

5 Ettem ekwu ẹyaak Devid odik okurọ ch’omekẹ ẹmma ch’ọnọhma-baba kw’Saul. 6 Oben ajinọng pẹ bẹ́, "Ọvaar Ibinọkpaabyi mòchera bẹ́, nsi ọttọhkse mva nnang atte kwaam kw’Ọvaar Ibinọkpaabyi ikk’ana obyenga k’eso. Mòbira ochera bẹ́, nyaangẹ ọbọhk kwaam ntwẹ-ẹ k’itama, okurọ bẹ́, Ọvaar Ibinọkpaabyi kk’ẹ ana obyenga k’eso."

7 Devid ọgbọ ajinọng pẹ ẹmọng okurọ idik nja, obir ọkpa bẹ eden bẹ́, maning Saul ọttọhk asi. Minna kw’Saul obin ny’ọtakpamma nwo ofona.

8 Nya o, Devid obina oyin ny’ọtakpamma nwo, oyerẹ Saul bẹ́, "Ttatta ọvaarnọng kwaam!" Saul ọbhakẹ nnam nya o, Devid ọraka eso otwu izek.

9 Oben Saul bẹ́, "Kayen kw’ad-ayonga itọhng k’anọng p’ad-aben bẹ́, ‘Devid ọkam-ọ itama o?’ 10 Menda, k’achen pọ atima aze ose kw’Ọvaar Ibinọkpaabyi ọtọk-ọ oke-m k’mbọhk z’ọtakpamma. Anọng banẹ machọhm-m bẹ́, mfhọ-ọ, kaam mmum bẹ́, mfhọ-ọ. Mben bẹ́, ‘Kaam ọbọhk mìnyaangẹ k’itama ntwu atte kwaam, okurọ bẹ́, Ọvaar Ibinọkpaabyi kk’ẹ ana obyenga k’eso.’ 11 Atte kwaam, ze ka e. Ẹkpa ch’owurọ-baba kwọ dọ ch’ntim m’ọbọhk! Kaam mmekẹ chẹ ny’ẹmma ch’owurọ-baba kwọ, mbira mmum bẹ́, mfhọ-ọ, ọfha azonga, abir aze bẹ́, kaam epinẹ kinsi, eso kimbir ngaangẹ. Kaam kọ kimpinẹ. Okenaka, ad-aror-m bẹ́, afhọ-m. 12 Tte Ọvaar Ibinọkpaabyi osi aponga p’ikọ ọttara kaam, obir otuka mpinẹ s’ikk’aam asa. Ṉ́nòde kaam, ọbọhk kwaam kọ mòtwu. 13 Ode k’ose kw’magbaakẹ ẹzẹmẹ bẹ́, ‘nkwurọ imaanẹ itama.’ Ṉ́nòde kaam, ọbọhk kwaam kọ mòtwu.

14 "Ọvaarnọng kw’Israẹl oyinẹ k’iyaan bẹ́, orima anyi ábẹ̀ o? Anyi wọ kw’ad-akwubh o? Kọ ad-akwubh ọffa-bukọ o? Etitaana nda ch’ad-akwubh o? 15 Tte Ọvaar Ibinọkpaabyi osi aponga pamina, obir ọkpaara ọnang mina. Tte kẹ oze idik saam, obir ọkkaan-m ọrọbh-m z’ikọ k’mbọhk."

16 K’ose kw’Devid ocher odik kwẹ nya, Saul oben bẹ́, "Nnwa kwaam Devid, ẹmọng chọ dọ nya o?" Minna kw’Saul ọsọbhọ ẹmọng nya, obhom. 17 Oben Devid bẹ́, "Kọ wọ atorọ ọtam ayọhng-m; kọ asi ejibha anang-m, okenaka, kaam nsi kọ itama. 18 Menda kk’ejibha ch’ikk’asa anang-m ayaaka. Kaam kafhọ k’ogbe kw’Ọvaar Ibinọkpaabyi ọtọk-m ọkọ-ọ k’mbọhk, okenaka, abhum bẹ́, afhọ-m. 19 K’ogbe kw’ọnọng ọbọk ọwawunanọng kwẹ, ma, ọd-ọttẹ-ẹ ọbọhk ofona, ọkpakpa ogwum-ẹ o? Tte Ọvaar Ibinọkpaabyi ọtaam-ọ mawuriji k’ejibha ch’asi anang-m menda. 20 K’odik ọkkọkka, kaam nzong bẹ́, kọ m’ade ọvaarnọng ode, mbira nzonga bẹ́, ẹvaar ch’ẹkọma ch’Israẹl m’ettima k’ikọ k’ogbe. 21 Chekẹ k’eche ch’Ọvaar Ibinọkpaabyi nang-m bẹ́, kwuna ẹnọmma chaam màdimẹ, eche chaam z’efona ch’atte kwaam màbira affurọ."

22 Minna kw’Devid ochekẹ ọnang Saul. Saul o, ọbhana. Okenaka, Devid ọttara ajinọng pẹ, makpa nnam z’abẹ k’itubhabyi.