Utumbula 2

18 Bambu Chapanga akajova, "Chabwina lepi mundu uyu kutama mwene. Yati nimkitila mundu mweawanini nayu." 19 Ndi Bambu Chapanga akakita kuhuma muludaka kila chinyama cha kudahi, na kila chidege cha kunani, akamletela Adamu nambu alola yati akuhikemela wuli, na mahina geahikemili Adamu ndi gavii mahina gavi. 20 Adamu akahipela mahina gavi kila chinyama cha kudimwa, na ya kudahi na hidege, nambu awonikini lepi mundu mweawanini nayu.

21 Bambu Chapanga akamletela Adamu lugono, ndi akagona tipitipi, peagonili akamuwusa luvafu lwaki lumonga na kupagubika kavili pandu pala kwa nyama. 22 Kuhuma muluvafu lwenulo lwealuwusili kwa Adamu, Bambu Chapanga akamuwumba mundu mdala, na akamuleta kwa Adamu. 23 Adamu akajova,

"Hinu mwenuyu ndi lihupa mumahupa gangu.

Na nyama munyama yangu.

Mwenuyo yati ikemelewa ‘mdala’ Muni ahumili muhiga ya mgosi."

24 Ndava yeniyo mgosi yati akumleka dadi waki na nyina waki na yati iwungana na mdala waki, na vene yati vivya higa yimonga.