1 Onkuume, Ayi Katonda,

kubanga ggwe buddukiro bwange.

2 Nagamba Mukama nti, "Ggwe Mukama wange,

ebirungi byonna bye nnina biva gy’oli."

3 Abatukuvu abali mu nsi be njagala

era mu bo mwe nsanyukira.

4 Ennaku y’abo abagoberera bakatonda abalala

yeeyongera.

Siriwaayo ssaddaaka zaabwe ez’omusaayi,*

wadde okusinza bakatonda baabwe.

5 Mukama, ggwe mugabo gwange,

era ggw’oliisa obulamu bwange; era ggw’olabirira ebyange.

6 Ensalo zange ziri mu bifo ebisanyusa,

ddala ddala omugabo omulungi.

7 Nnaatenderezanga Mukama kubanga annuŋŋamya

ne mu kiro ayigiriza omutima gwange.

8 Nkulembeza Mukama buli kiseera,

era ali ku mukono gwange ogwa ddyo,

siinyeenyezebwenga.

9 Noolwekyo omutima gwange gusanyuka, n’akamwa kange ne kajaguza;

era n’omubiri gwange gunaabeeranga mu mirembe.

10 Kubanga omwoyo gwange toliguleka magombe,

wadde okukkiriza Omutukuvu wo okuvunda.

11 Olindaga ekkubo ery’obulamu;

w’oli we wanaabanga essanyu erijjuvu,

era mu mukono gwo ogwa ddyo nga mwe muli ebisanyusa emirembe gyonna.