1 യഹോവേ, ഞാൻ അങ്ങയിൽ അഭയംതേടുന്നു;

ഞാൻ ഒരുനാളും ലജ്ജിച്ചുപോകരുതേ;

അവിടത്തെ നീതിയിൽ എന്നെ വിടുവിക്കണമേ.

2 അങ്ങയുടെ ചെവി എന്നിലേക്കു ചായ്ച്ച്,

എന്നെ മോചിപ്പിക്കാൻ വേഗം വരണമേ;

അങ്ങ് എനിക്ക് അഭയമാകുന്ന പാറയും

എന്നെ രക്ഷിക്കുന്ന ഉറപ്പുള്ള കോട്ടയും ആകണമേ.

3 അങ്ങ് എന്റെ പാറയും കോട്ടയും ആകുകയാൽ

തിരുനാമമഹത്ത്വത്തിനായി എനിക്കു വഴികാട്ടണമേ.

4 എന്റെ ശത്രുക്കൾ എനിക്കായി ഒരുക്കിയിരിക്കുന്ന കെണിയിൽനിന്നും എന്നെ വിടുവിക്കണമേ,

കാരണം അവിടന്ന് എന്റെ സങ്കേതം ആകുന്നു.

5 ഞാൻ എന്റെ ആത്മാവിനെ തിരുക്കരങ്ങളിൽ ഭരമേൽപ്പിക്കുന്നു;

വിശ്വസ്തദൈവമായ യഹോവേ, എന്നെ മോചിപ്പിക്കണമേ.