1 Neneene Tsɛ, mo kɛkɛ o nɔ i heɔ yeɔ. Ko ha nɛ ye he nyɛli ɔmɛ a ye ye nɔ. Mo kpɔ mi, ejakaa mo ji Mawu nɛ peeɔ nɔ́ dadɛ be fɛɛ be. 2 Mo ha ye tsɛmi ɔ heto mla. Moo bu ye pɛɛ kpami ɔ tue, nɛ o pee o he tɛ sa ha mi nɛ ma laa ye he kɛ je ye he nyɛli ɔmɛ a dɛ mi. 3 Mo ji ye tɛ sa kɛ ye mwɔ, mo kudɔ mi kɛ je oslaa nɛ ɔ mi nɛ o kɛ wo o biɛ ɔ hɛ mi nyami. 4 Mo kudɔ ye nane kɛ je klama amɛ nɛ ye he nyɛli ɔmɛ tsɔ mi ɔ a he. Ejakaa mo ji ye laami he. 5,6 I to ye klaa kɛ wo o dɛ mi.

O kpɔ mi, mo Mawu nɛ o yeɔ o si womi nɔ. Mo pɛ i sɔmɔɔ. O sume nihi nɛ jaa wɔhi. 7 Ngɛ o mɔbɔ nami ɔ he je ɔ, i na bua jɔmi, ejakaa o bu ye haomi ɔmɛ a he tue nɛ o na pimi nɛ ye susuma ngɛ pie ɔ. 8 O ha we he blɔ nɛ ye he nyɛli ɔmɛ a nine nɛ su ye nɔ; o ha mi sida he nɛ ma kɛ fa ye he.

9,10 Oo Mawu, moo na mi mɔbɔ ngɛ ye haomi ɔ mi. I fo ya hluu nɛ ye hɛ ngmɛhi tsu ngɛ ye yi he; kɔmɔ yemi ha nɛ i pee hiɔtsɛ. Kɔmɔ yemi ha nɛ i ngɛ he lo tae, nɛ ye wami be ɔ ngɛ kpiti pee. Ye he yayami ɔmɛ ha nɛ i gbɔjɔ. Nɛ i fɔɔ si kɛ aywilɛho kɛ zo. 11 Ye he nyɛli ɔmɛ kɛ ye kasa nyatsɛmɛ kɛ ye huɛmɛ po ngɛ ye he fɛu yee. A sume nɛ a na mi. Nɛ ke a kɛ mi kpe ɔ, a plɛɔ a hɛ mi kɛ fɔɔ he kpa. 12 Nɔ tsuaa nɔ hɛ je ye nɔ kaa nɔ nɛ gbo. I pee kaa buɛ kokoe nɛ a sake kɛ fɔ he. 13 I nu lakpa nɛ ye he nyɛli ɔmɛ ngɛ yee ngɛ ye he ɔ. He fɛɛ he nɛ i gu ɔ, i ngɛ gbeye yee, ejakaa a ngɛ ye he ga toe nɛ a maa gbe mi.

14,15 Se Tsaatsɛ, mo o nɔ nɛ i wo ye hɛ ngɔ fa. I de ke, "Mo pɛ ji ye Mawu; ye be ɔmɛ kulaa ngɛ o dɛ mi. Mo kpɔ mi kɛ je ye he nyɛli ɔmɛ kɛ ni nɛmɛ nɛ ngɛ mi hlae nɛ a ma puɛ ɔ a dɛ mi. 16 Moo na o sɔmɔlɔ ɔ mɔbɔ ekohu; mo he ye yi wami, ejakaa o mi mi jɔ saminya. 17 Mawu, mo nɛ i ngɛ tsɛe, ko ha nɛ ye hɛ mi nɛ pue si. Dikali ɔmɛ lɛɛ mo ha nɛ a hɛ mi nɛ pue si ngɛ nɔ́ nɛ a heɔ yeɔ ɔ he je; nɛ o ha nɛ a ya hwɔ ngɛ a gbogboe muɔ ɔmɛ a mi. 18 Ha nɛ lakpa yeli ɔmɛ, he nɔ woli kɛ he woli ɔmɛ nɛ gbee dali a he guɛ ɔ, a nya nɛ jɔ."

19 Oo, o mi mi jɔmi ɔ kle kɛ ha nihi nɛ deɔ faii ke o ma kpɔ mɛ ɔ. Ejakaa o ngɔ jɔɔmi babauu kɛ to ha nihi nɛ heɔ o nɔ yeɔ nɛ a buu mo ɔ.

20 Moo ngɔ nihi nɛ o suɔ mɛ ɔ ngɔ laa ngɛ o hɔ̃ ɔ sisi, nɛ o nine nɛ bu a he kɛ je a he nyɛli a dɛ mi. 21 A jɔɔ Tsaatsɛ Mawu, ejakaa e ha nɛ i na kaa e suɔmi ɔ ngɛ ye he bue daa kaa mwɔ he gbogbo. 22 Ye nya sɔ tsɔ benɛ i de ke, "Nutsɔ ɔ kua mi" ɔ, ejakaa o bu ye pɛɛ kpami ɔ tue nɛ o ha mi heto.

23 Oo, nyɛɛ suɔ Mawu, nyɛ e he tsɔli ɔmɛ tsuo, ejakaa Mawu buu nihi nɛ yeɔ lɛ anɔkuale ɔ a he, nɛ e kɛ mi mi fumi gblaa nihi kulaa nɛ kuaa lɛ kɛ he nɔ womi ɔ a tue. 24 Lɔ ɔ he je ɔ, nyɛ nya nɛ nyɛ na kã, ke ji Mawu nɔ nɛ nyɛ ngɔ nyɛ hɛ kɛ fɔ ɔ.