1 I de ye he ke, i ma kpa kɔmɔ yemi! Titli ɔ, ke yayami peeli ba bɔle mi ɔ, i ma pee dii. 2 I pɛ ye nya mi nɛ ma de nɔ́ ko, kpakpa jio, yaya jio. Se ye nɔ́ nami ɔ ngɛ nɔ yae mohu.

3 I hao saminya, si abɔ nɛ i ngɛ yi mi susue ɔ, si abɔ nɛ i ngɛ haoe ngɛ ye mi ji lɔ ɔ nɛ. Nyagbe mi ɔ, i tu munyu nɛ i de Mawu ke: 4 Tsaatsɛ, moo ye kɛ bua mi nɛ ma le kaa be kpiti ko kɛkɛ i ma ye ngɛ zugba a nɔ. Mo ha nɛ ma le kaa be kuku ko pɛ nɛ piɛ ha mi. 5 Tsa pi ye wami se de kɛ! Ye wami be ɔ kulaa ngɛ kaa hɛ ngmɛfia ngɛ o hɛ mi. Adesa bee kaa kɔɔhiɔ nɛ ngɛ fiae. 6 E ngɛ kaa nini ko kɛkɛ. Nɛ e dengme gbomi yami kɛ bami kulaa ya peeɔ yaka. E gboɔ dengme nɛ e buaa níhi a nya, se e li nɔ nɛ ba yeɔ. 7 Tsaatsɛ Mawu, mɛnɔ nɔ nɛ ma wo ye hɛ kɛ fɔ mɔ? Mo pɛ o nɔ nɛ ye hɛ ngɛ.

8 Mo je mi kɛ je ye yayami ɔmɛ tsuo a mi; ko ha nɛ nihi nɛ be juɛmi ɔ a muɔ mi.

9 Tsaatsɛ Mawu, i plɛ mumui ngɛ o hɛ mi. I be nɔ́ ko dee, ejakaa mo nɛ o ha nɛ i ngɛ nɔ́ nae kikɛ ɔ nɛ.

10 Tsaatsɛ Mawu, mo ko fia mi nɔ hu. Bɔ nɛ o gbla ye tue ɔ e hiɛ; i ma ho gbomi ya. 11 Ke o gbla nɔmlɔ tue ngɛ e yayami he ɔ, kɛkɛ e hɛ mi kpata, ejakaa nɔmlɔ he wɛ, e ngɛ kaa bo nɛ lohwe tsɔwi yeɔ ngɛ kpɛɛ mi. Ee, nɔmlɔ bee kaa kɔɔhiɔ nɛ ngɛ fiae.

12 Oo Tsaatsɛ Mawu, moo bu ye kue fami ɔ tue! Nɛ o nu ye ya fomi ɔ. Mo ko pee kɔ nɛ o pui ye nya mi. Mo he mi koo, be nɛ i ngɛ ya foe ɔ. Ami hu o nubwɔ kɛkɛ ji mi. Blɔ hialɔ kɛkɛ ji mi nɛ i bee ngɛ je ɔ mi kaa ye tsɛ ɔmɛ nɔuu.

13 Tsaatsɛ Mawu, moo na mi mɔbɔ nɛ o kɛ pa mi. Ko tú o hɛ mi kɛ wo mi hu, konɛ ami hu ma na bua jɔmi bɔɔ ekohu, loko ji ye gbenɔ be nɛ ba su.