1 Mawu jɔɔ nihi nɛ naa ohiafohi mɔbɔ ɔ. E jeɔ mɛ kɛ jeɔ a haomihi a mi. 2 E buu a he nɛ e baa a yi. E woɔ a hɛ mi nyami ngɛ ma hɛ mi, nɛ e kpataa a he nyɛli a he wami. 3 E yeɔ kɛ buaa mɛ ngɛ a hiɔ numi be mi nɛ e tsaa mɛ.

4 I sɔle nɛ i de ke, "Oo Tsaatsɛ Mawu, moo na mi mɔbɔ nɛ o tsa mi, i pee yayami kɛ si mo." 5 Ye he nyɛli ngɛ dee ngɛ ye he ke, "Mɛni be e ma gbo nɛ e biɛ maa laa!" 6 Ke i be he wami nɛ a ba slaa mi ɔ, a toɔ hɛ mi saminya kaa nɔ nɛ a kɛ mi ngɛ huɛ si himi kpakpa mi; se be fɛɛ be nɛ ɔ, a sume mi nɛ a bua jɔɔ a he kaa i hwɔɔ si ngɛ hiɔ sa nɔ. Ke a ba slaa mi nɛ a yaa a, a yeɔ ye he fɛu nɛ a muɔɔ mi. 7 A to a yi mi nɔ́ nɛ a maa pee ke i gbo. 8 A ke, "E hiɔ ɔ he wa; e be si tee!"

9 Nɔmlɔ nɛ i buu kaa lɛ ji ye huɛ kpakpa pe kulaa nɛ i kɛ lɛ yeɔ ni ngɛ ka kake mi ɔ hu te si kɛ wo mi. 10 Oo Tsaatsɛ Mawu, ko kua mi, moo na mi mɔbɔ nɛ o tle mi si ekohu, konɛ ma na nɔ́ ko ma de ye he nyɛli ɔmɛ ! 11 I le kaa o bua jɔ ye he, ejakaa o ha we nɛ ye he nyɛli ɔmɛ nɛ a ye ye nɔ. 12 O baa ye yi, ejakaa i yeɔ anɔkuale; nɛ o ha mi he blɔ nɛ ma hi o ngɔ daa.

13 Nyɛ je Yehowa Israel Mawu ɔ yi, nɔ nɛ ngɛ kɛ je blema, nɛ e ngɛ kɛ yaa neneene ɔ. Amen!