1 Oo Israel Kpakalɔ, mo nɔ nɛ o kudɔ Israel kaa tohi. Oo mo Neneene Tsɛ nɛ o hii si ngɛ Somi Daka a yi mi kaa matsɛ, moo ba o tue si nɛ o bu ye pɛɛ kpami ɔ tue. 2 Mo wo o he nɔ ngɛ Efraim kɛ Benyamin kɛ Manase hɛ mi nɛ o kpɔ wɔ kɛ o he wami ɔ.

3 Oo Tsaatsɛ Mawu, moo kpale wɔ kɛ ba o ngɔ ekohu, nɛ o ha o hɛ mi nɛ kpɛ ngɛ wa nɔ, nɛ wa yi nɛ na wami. 4 Oo Yehowa, Hiɔwe tahi a Mawu, mɛni be o mi mi ma fu wɔ nɛ o ma kua wa pɛɛ kpamihi tue bumi kɛ ya si? 5 O ha wa ye aywilɛho nɛ wa fo ya. 6 O ha wa pee he fɛu yemi nɔ́ kɛ ha nihi nɛ ngɛ wa kasa mi ɔ, nɛ a hii wɔ muɔe.

7 Oo Tahi a Mawu, moo kpale wɔ kɛ ba o ngɔ ekohu, nɛ o ha nɛ o hɛ mi nɛ kpɛ ngɛ wa nɔ, nɛ wa yi nɛ na wami. 8 O ngɔ wɔ kɛ je Mizraim kaa wai tso tsɔwi. O fie wɔ jali ɔmɛ kɛ je o zugba a nɔ nɛ o du wɔ ngɛ nɔ. 9 O gba zugba a nɔ nɛ o tsua mi; wa je sipoku nɛ wa he si ngɛ zugba a nɔ. 10 Wa nini ha yoku ɔmɛ a nɔ, nɛ wa ngɛ kaa Lebanon Sida tso agbo ɔmɛ. 11 Wa ha zugba a tsuo nɔ kɛ je Mediterenea Wo ɔ nya kɛ ya si Yufrate Pa a he. 12 Se amlɔ nɛ ɔ, o ku wa he gbogbo ɔmɛ nɛ wa be he fami nɔ́ ko. 13 Demi jee hue mi ba bɔleɔ wa he, nɛ lohwe awi yeli ɔmɛ kɛ wɔ peeɔ a niye ni.

14 Wa ngɛ mo pɛɛ kpae, oo hiɔwe tahi a Mawu, moo kpale kɛ ba nɛ o ba jɔɔ wɔ. Moo je o hiɔwe ɔ nɛ o hyɛ bɔ nɛ wa ngɛ nɔ́ nae ha, nɛ o ba slaa o wai ngmɔ nɛ ɔ. 15 Moo bu nɔ́ nɛ mo nitsɛ o du ɔ he, bi nɛ ɔ nɛ mo nitsɛ o fɔ ɔ. 16 Ejakaa wa he nyɛli ɔmɛ po wɔ kɛ pue si kaa tso, nɛ a sa wɔ. Ha a hɛ mi nɛ kpata ngɛ o hɛ mi. 17 Moo wo o suɔlɔ ɔ he wami, nɔmlɔ nɛ o hla kɛ ha o he ɔ. 18 Nɛ wa be mo sie hu. Moo wo wɔ he wami nɛ wa ma he o nɔ maa ye.

19 Oo Tahi a Mawu, moo kpale wɔ kɛ ba o ngɔ ekohu, nɛ o ha o hɛ mi nɛ kpɛ ngɛ wa nɔ, nɛ wa yi nɛ na wami.