1 Nyɛ la wawɛɛ kɛ ha Neneene Tsɛ Mawu nɛ haa wɔ he wami ɔ. Nyɛ la kɛ bua jɔmi kɛ je Israel Mawu ɔ yi.

2 Nyɛ la kɛ miɛhi; nyɛ la kɛ sakuhi nɛ ngɔɔ. 3 Nyɛ kpa titimati ngɛ nyɔhiɔ nya, ngɛ be nɛ a to ɔ mi, ngɛ wa gbijlɔ ligbi ɔ nɔ. 4 Ejakaa Tsaatsɛ Mawu nɛ to bua jɔmi be nɛ ɔmɛ kɛ ha wɔ. A ngɛ Israel mlaa amɛ a mi. 5 E to mɛ kaa ta nɛ e kɛ Mizraim, he nɛ wa ya ye nyɔguɛ ngɛ ɔ hwu ɔ e kaimi níhi.

I nu gbi ko nɛ i nui sisi de ke, 6 "Jehanɛ ɔ, i ma wo tlomi ɔ ngɛ o konɔ, nɛ i ma je o nine hu kɛ je pɔ tɔtɔɛ ni tsumi ɔmɛ a he." 7 Nɛ e de ke, "O kpa ngmlaa kɛ tsɛ mi ngɛ o haomi ɔ mi nɛ i he o yi wami. I ha o tsɛmi ɔ heto kɛ je oslabai laami he ɔ ngɛ Sinai Yoku ɔ mi. I ka o hemi kɛ yemi ngɛ Meriba be mi nɛ o tu nyu hiami he munyu ɔ. 8 Oo ye bimɛ, nyɛɛ bu mi tue, nyɛɛ bu ye si womi ɔmɛ tue. Oo Israel, i na nɛ o bu mi tue! 9 O ko ja mawu kpa ko, nɛ o ko to amaga ko ngɛ o we ɔ mi. 10 Ejakaa ami Yehowa o Mawu ɔ ji nɔ nɛ ngɔ mo kɛ je Mizraim zugba a nɔ kɛ ba. Mo bli o nya mi hatoo nɛ i ma wo mi ni obɔ. 11 Se ye bi ɔmɛ bui mi tue. Israel hla we mi. 12 Lɔ ɔ he je ɔ, i ngɛ a he ngmɛɛe, nɛ a hɛɛ a tsui nɛ ti ɔ mi, nɛ a pee nɔ́ nɛ a suɔ.

13 Oo, i na nɛ ye bi ɔmɛ bu mi tue, nɛ Israel nyɛɛ ye blɔ ɔmɛ a nɔ. 14 Jinɛ e be kɛe nɛ i ma ba a he nyɛli ɔmɛ si, nɛ i ma dɔ ye nine ngɔ to nihi nɛ ngɛ mɛ haoe ɔ a nɔ. 15 Nihi nɛ sume mi ɔ, a maa ba si ngɛ ye hɛ mi kɛ gbeye, nɛ a tue gblami ɔ se be poe kɔkɔɔkɔ. 16 Se i ma lɛ nyɛ kɛ ngma kpakpa, nɛ i ma ha nyɛ maa tɔ kɛ hwo nɛ a je kɛ je tɛ sa mi."