1 Palupaga wantu woseri pasipanu waweriti na luga yimu na utakula umu. 2 Su wantu pawagenditi genditi mwanja uwega kwagulawa mshenji, wasokiti mulilaranda lya Shinari, womberi walikaliti aku. 3 Womberi waligambiriti, "Su aya tufyatuli matofali tugayoshii weri na motu." Womberi waweriti na matofali badala ya mabuwi na lami badala ya shokaa. 4 Su watakuliti, "Tulinyawili lushi pamuhera na shinala, upeleru wa shinala ashi hausoki kumpindi nentu su litawu lyetu halimaniki, natwiza kupalanganika pasipanu poseri."

5 Shakapanu Mtuwa Mlungu kasulukiti kululola lushi alu na shinala shashinyawitwi na wantu. 6 Mtuwa Mlungu kalongiti, "Guloli, wantu awa wawera waumu na woseri wawera na luga yimu na aga gawanjiti kutenda ndo ga kwanja hera, shakapanu kwa shilii shawalihola kushitenda hashitendeki kwa womberi. 7 Tusuluki pasi na tuwavuluvusiyii luga yawu, su nawelewana weni kwa weni." 8 Su Mtuwa kawapalasiya pahala poseri mupasipanu, womberi walekiti kunyawa lushi lulii. 9 Lushi alu lushemuwa Babeli, toziya aku Mtuwa kwakavuluvusiyiti luga ya pasipanu poseri na kulawa aku kawapalasiyiti wantu kila pahala pasipanu.

10 Pamivinja miwili pamashi makulu gavuwa, Shemu pakaweriti na mivinja miya, yomberi kamwiwuliriti Arifakisadi. 11 Shemu pakamleriti kala Arifakisadi, kalikaliti mivinja miya muhanu, na kapatiti wana wamonga. Ashi ndo shiyiwuku sha Shemu.

12 Arifakisadi pakaweriti na mivinja malongu matatu na muhanu, kamleriti Shela. 13 Pakamleriti kala Shela, Arifakisadi kalikaliti mivinja miya musheshi na mitatu, na kapatiti wana wamonga.

14 Shela pakaweriti na mivinja malongu matatu, kamleriti Eberi. 15 Pakamleriti kala Eberi, Shela kalikaliti mivinja miya msheshi na ntatu na kapatiti wana wamonga.

16 Eberi pakaweriti na mivinja miya na malongu musheshi kamleriti Pelegi. 17 Pakamleriti kala Pelegi, Eberi kalikaliti mivinja miya msheshi na malongu matatu na kupatiti wana wamonga.

18 Pelegi pakaweriti na mivinja malongu matatu, kamleriti Rewu. 19 Pakamleriti kala Rewu, Pelegi kalikaliti mivinja miya mbili na tisa na kupatiti wana wamonga. 20 Rewu pakweriti na mivinja malongu matatu na mbili kamleriti Serugi. 21 Pakamleriti kala Serugi, Rewu kalikaliti mivinja miya mbili na saba na kapatiti wana wamonga. 22 Serugi pakaweriti na mivinja malongu matatu, kamleriti Nahori. 23 Pamleriti kala Nahori, Serugi kalikaliti mivinja miya mbili, na kupatiti wana wamonga. 24 Nahori pakaweriti na mivinja malongu mawili na tisa, kamleriti Tera. 25 Pakamleriti kala Tera, Nahori kalikaliti mivinja miya na lilongu na tisa na kapatiti wana wamonga.

26 Tera pakaweriti na mivinja malongu saba, kamleriti Abramu na Nahori na Harani.

27 Shiyuwuku ashi ndo sha Tera, tati gwawu Abramu na Nahori na Harani. Harani kaweriti tati gwa Lutu. 28 Harani kahowiti shaka Tera tati gwakuyi pakalikaliti aku Uri lushi lwa Wakalidayu pahala pakayiwukiti. 29 Abramu na Nahori wayugiti, mdala gwa Abramu kashemitwi Sarai na mdala gwa Nahori kashemitwi Milika, mhinga gwa Harani ulii yakaweriti tati gwakuyi Isika vilaa. 30 Sarai kaweriti ndiri na mwana toziya kaweriti mpendi.

31 Tera kamtoliti Abramu mwana gwakuyi na Lutu mzukulu gwakuyi yakaweriti mwana gwa Harani, vilaa kamtoliti Sarai mdala gwa Abramu, woseri wawukiti pamuhera kulawa Uri lushi lwa Wakalidayu, wagenditi muisi ya Kanaani. Kumbiti pawasokiti Harani, walikaliti. 32 Tera kahowiti aku Harani pakaweriti na mivinja miya mbili na muhanu.