1 "Shaka Abramu pakaweriti na mivinja malongu tisa na tisa, Mtuwa Mlungu kamlawiriti, kamgambira, neni ndo Mlungu yawera na makakala. Gunjimiri neni na mala zoseri gutendi shashiherepeziya." 2 Neni hantendi lipatanu pakati paneni na gwenga na hanishiyongeri nentu shiyiwuku shaku.

3 Palii Abramu kasuntama makukama, Mlungu kamgambira, 4 ali ndo lipatanu lyangu na gwenga, haguweri tati gwa isi zivuwa. 5 Kwanjira vinu, hapeni gushemwi kayi Abramu, kumbiti hagushemwi Abrahamu, toziya nikutenda guweri tati gwa isi zivuwa. 6 Hanikutendi guweri na shiyiwuku shivuwa nentu na kwaku hazilawi isi zivuwa pamuhera na wafalumi. 7 Hananguziyi nakaka lipatanu lyaneni kwa gwenga, shiyiwuku shaku na vileri vyawu vyoseri mashaka goseri, kayi haweri Mlungu gwaku na Mlungu gwa shiyiwuku shaku mashaka goseri. 8 Hanikupanani gwenga pamuhera na shiyiwuku shaku isi ayi mwamulikala ganbira muhenga. Isi yoseri ya Kanaani iweri lunda ya mwenga mashaka goseri, na neni haweri Mlungu gwawu.

9 "Shakapanu Mlungu kamgambiriti Abrahamu, kwa gwenga, gufiruwa kulikola lipatanu lyaneni, gwenga gamweni pamuhera na shiyiwuku shaku shoseri." 10 Ali ndo lipatanu nankulitenda pakati pa neni na gwenga pamuhera na shiyiwuku shaku, lipatanu lyagufiruwa kulikola, kila mpalu pakati pa mwenga kafiruwa kwingiziwa jandu. 11 Hamwingiziwi jandu, na ali haliweri lilangaliru lya lipatanu lya neni na mwenga. 12 Kwanjira vinu vileri vyaviza, kila mwana mpalu yakawera na umuli wa mivinja nani kafiruwa kwingiziwa jandu, pamuhera na woseri yawiyukiti mukaya yaku ama yakahemiritwi kwa mpiya zyenu kulawa kwa wahenga yakawera ndiri gwa shiyiwuku shaku. 13 Kila mwana mpalu mukaya yaku ama yoseri yakahemiritwi kwa mpiya, woseri wafiruwa kwingiziwa jandu. Shimaniziru ashi mushimba zyenu haliweri lilangaliru lya lipatanu lyaneni lya mashaka goseri. 14 Kila mpalu yoseri yakingiziwa ndiri jandu, hakatulwi gweka kulawa kwa wantu toziya hakaweri kajimira ndiri lipatanu lya neni.

15 "Vilaa Mlungu kamgambiriti Abrahamu, kwa mdala gwaku, hagumshemi ndiri kayi Sarai, kumbiti litawu lyakuyi haliweri Sara." 16 Hanimtekeleri na hanikupanani mwana mpalu kupitira yomberi. Hanimtekeleri Sara su hakaweri mawu gwa maisi na wafalumi wa wantu hawalawi kulawa kwa yomberi. 17 "Palii Abrahamu kasuntama makukama, kaseka mumoyu mwakuyi pakalihola, hashi hayitendeki nakaka mwana kwiwuka kwa mgogolu gwa mivinja miya? Hashi Sara yakawera na mivinja malongu tisa, hakawezi kupata mwana? 18 Su Abrahamu kamgambiriti Mlungu, pamonga megujimiri kuwera matekeleru gaku gaweri kwa Ishimaeli."

19 "Mlungu kamwankula, nakaka mdala gwaku Sara hakakwiwuliri mwana mpalu na gwenga hagumshemi Isaka. Hanilituli lipatanu lyaneni na yomberi kuwera lipatanu lya mashaka goseri kwajili yakuwi pamuhera na shiyiwuku shakuwi." 20 Kwa Ishimaeli, nikupikanira, nakaka hanimtekeleri, hanimtendi kaweri na shileri shivuwa na hanishiyongeri nentu. Hakaweri tati gwa wakolamlima lilongu na mbili, naneni hanimtendi kaweri mbuyi gwa wantu wavuwa. 21 Kumbiti lipatanu lyangu hanilitendi na Isaka ulii Sara yakagenda kukwiwulira mushinja shashiza shaka gambira ashi. 22 Su Mlungu pakamaliliti kuyowera na Abrahamu, kawuka.

23 Mulishaka lilaa lilii, Abrahamu kamtola Ishimaeli mwana gwakuyi pamuhera na woseri yawayiwukiti mukaya yakuwi pamuhera na walii yawahemiritwi kwa mpiya zakuwi, kila mpalu gwa muukaya yakuwi, woseri kawayingiziyiti jandu gambira Mlungu ntambu yakamlagaliriti. 24 Abrahamu kaweriti na mivinja malongu tisa na tisa shaka pakingiziwitwi jandu. 25 Na Ishimaeli mwana gwakuyi kaweriti na mivinja lilongu na ntatu pakingiziwitwi jandu, 26 Abrahamu pamuhera na mwana gwakuyi wingiziwitwi jandu mulishaka limuhera. 27 Kila mpalu mukaya ya Abrahamu pamuhera na woseri yawayiwukiti mukaya yakuwi ama yakahemiritwi kulawa kwa muhenga, woseri wingiziwitwi jandu pamuhera na yomberi.