1 Abramu kawuya kulawa Misri, kakweniti kugenda uwega wa Negebu. Kaweriti pamuhera na mdala gwakuyi na ulunda wakuyi woseri pamuhera na Lutu. 2 Shaka ashi, Abramu kaweriti kalunda nentu, kaweriti na mifugu na mpiya pamuhera na zahabu. 3 Kendereyiti kugenda mwanja kulawa Negebu mpaka Beteli, pahala pakaweriti kagonjera mwanja, pakati pa Beteli na Ai, 4 pahala pakanyawiti shitalawanda sha kutambikira. Palii Abramu kaguwiriti pakalishema litawu lya Mtuwa Mlungu.

5 Vilaa avi, Lutu yakagenditi pamuhera na Abramu, kaweriti na wakondolu na mifugu na malingu. 6 Kuweriti kwahera isi itosha ya kuyiliziya mifugu kwa kutenda Abramu na Lutu walikali pamuhera. 7 Su kulawiriti ndewu pakati pa walolera wa mifugu wa Abramu na walolera wa mifugu wa Lutu. Shaka ashi Wakanaani na Waperizi waweriti wenikaya mlushi alu.

8 Su Abramu kamgambiriti Lutu, "Nakuwera na ndewu pakati petu ama pakati pa walolera wetu, toziya twenga twawalongu. 9 Hashi, isi yoseri ayi iwera ndiri kulongolu kwa gwenga? Su tulileki. Pagugenda kumshigi, neni hang'endi kumliwu, na pagugenda kumliwu, neni hang'endi kumshigi." 10 Lutu kanyasula sheni shakuwi na kaluwona lularanda lya lushemba Yoridani, kawona kwana mashi gavuwa kila pahala gambira shiwunga sha Mtuwa Mlungu na kugambira isi ya Misri uwega wa Soali. Ayi iweriti pamberi pa Mtuwa Mlungu hakenilunguziyi lushi lwa Sodoma na Gomeri. 11 Su Lutu kalisyagulira mweni lularanda lyoseri lya lushemba Yoridani, kagenditi kwagulawa mshenji, womberi walilekiti. 12 Abramu kalikaliti muisi ya Kanaani na Lutu kalikala pakati pa lushi zyaziweriti pambwega mushemba, kanyawiti malingu gakuyi pakwegera na Sodoma. 13 Wantu wa Sodoma waweriti wakondola na yawatenda vidoda vikulu kulongolu kwa Mtuwa Mlungu.

14 Lutu pakawukiti kala, Mtuwa kamgambiriti Abramu, "Gunyasuli masu gaku kulawa panu paguwera, guloli wega zoseri, kushana na kusika, kwagulawa mshenji na kwaguzyeta mshenji. 15 Isi ayi yoseri yaguiwona hanikupanani gwenga pamuhera na shiyiwuku shaku, su iweri yamwenga mashaka goseri. 16 Hanishitendi shiyiwuku shaku shiweri shivuwa gambira lidika. Gambira lidika lyaliweza ndiri kuwalangalika, su shiyiwuku shaku hapeni shiwalangiki! 17 Guwuki, gugendi mukila pembi ya isi, toziya hanikupanani gwenga." 18 Su Abramu katupuliti malingu yakuwi, kagenditi kulikala pakwegera na mitera mikulu ya Mialoni ya Mamre kulii Hebroni, na aku kamnyawiliti Mtuwa pahala pa kutambikira.