1 Yakobu kendereyiti kulikala muisi ya Kanaani, kwakalikaliti tati gwakuyi. 2 Avi ndo visoweru vya kaya ya Yakobu.

Yusufu pakaweriti muntemba gwa mivinja lilongu na saba, kaweriti kankulolera wakondolu na wambuzi, mweni pamuhera na walongu wakuyi, wana wa Biliha na Zilipa, wadala wa tati gwakuyi. Yusufu kaweriti kankumgambira tati gwakuyi kuusu vitendu vidoda vya walongu wakuyi.

3 Su Israeli kamfiriti nentu Yusufu kuliku wana wakuyi wamonga woseri toziya yomberi kiwukiti muugogolu wakuyi. Kamsoniriti Yusufu lihabiti litali lyana mapambu gaherepa. 4 Kumbiti walongu wakuyi pawawoni kuwera tati gwawu kamfiriti nentu Yusufu kuliku womberi, wamkalaliriti mpaka walekiti kuyowera nayu kwa ponga.

5 Pashiru pamu, Yusufu kalotiti na pakawagambiriti walongu wakuyi, womberi wongeriti kumkalalira. 6 Yomberi kawagambiriti, "Mpikaniri ntambu yandotiti. 7 Twenga twawoseri tuweriti kulirambu twankuyopa ng'anda na vinu ng'anda yaneni igolokiti na ng'anda za mwenga zijojonikiti kuizyengeta na kuing'ong'onalira ng'anda yaneni."

8 Walongu wakuyi wamkosiyiti, "Hashi, gufira kutugambira kuwera hagutukolimlima? Ama haguweri na utuwa kwa twenga?"

Su wongeriti kumkalalira toziya ya kulota na visoweru vyakuwi.

9 Shakapanu yomberi kalotiti kayi, kawagambira walongu wakuyi pakalonga, "Mpikaniri ndotiti kayi, mona mshenji na lyezi na ntondu lilongu na yimu vyankusutamalira neni."

10 Kumbiti pawamgambiriti tati gwakuyi na walongu wakuyi kulota aku, tati gwakuyi kamkalapiriti pakalonga "Kulota gaa kwagulotiti? Hashi, gufiruwa neni na mawu gwaku na walongu twizi kusuntama kwa ligoya pasi pa magulu gaku?" 11 Walongu wakuyi wamwoniliti weya, kumbiti tati gwakuyi kawera kankushihola shitwatira ashi.

12 Lishaka limu walongu wakuyi Yusufu wagenditi kulolera wankanyama wa tati gwakuyi pakwegera na Shekemu. 13 Israeli kamgambiriti Yusufu, "Guvimana walongu waku wankulolera wankanyama Shekemu kulii, su hanikutumi kwa womberi."

Yusufu kamwankula, "Yina nakala."

14 Tati gwakuyi kamgambira, "Gugendi gwakawalori walongu waku na wankanyama handa wakomu, shakapanu gwizi gung'ambili."

Su kamtuma Yusufu kulawa lularanda lwa Hebroni. Yusufu pakaweriti pakwegera na Shekemu. 15 Muntu yumu kamwona pakayerayera kushiwala, su kamkosiyiti, "Hashi, gwankusakula shishi?"

16 Yusufu kamwankula, "Nankuwasakula walongu wangu. Shondi gung'ambili pahala pawalolera wankanyama." 17 Muntu ulii kamgambira, "Womberi wawuka kala, toziya niwapikaniriti pawalonga, tugendi zetu Dotani."

Su Yusufu kawafatiti walongu wakuyi, kawawona aku Dotani. 18 Walongu wakuyi pawamwoniti kakutali pamberi pakusoka pakwegera, womberi watenditi mpangu gwa kumlaga. 19 Womberi waligambiziyana, "Mloli! Mlota ndotu ulii kankwiza. 20 Su tumlagi na kumwasila mulirindi limuwamu shakapanu hatutakuli kuwera kalaguwa na nkanyama gwa kuntundu. Shakapanu hatuwoni ndotu zakuwi haziweri hashi."

21 Kumbiti Rubeni pakapikaniriti visoweru avi, kafiliti kumlopoziya mumawoku mwawu su kawagambira walongu wakuyi, "Shondi natumlaga." 22 Rubeni kawagambiriti, "Natumlaga, mumwasiri mulirindi ali kuntundu, kumbiti namumtenda." Katakuliti hangu su kawezi kumlopuziya mumawoku gawu na shakapanu kamwuziyi kwa tati gwakuyi. 23 Yusufu pakasokiti kwa walongu wakuyi, womberi wamvuliti kwa likakala lihabiti lyakuyi, lihabiti lilii liherepa lyakalivaliti. 24 Shakapanu wamtola na kumwasa mulirindi kumbiti lirindi ali liweriti ndiri na mashi.

25 Pawaweriti wankuliya shiboga, womberi wawawoniti Waishimieli wankwiza kulawa Gileadi kugenda Misri. Ngamiya wawu wapapisiwitwi ubani na zeli na manimani. 26 Shakapanu Yuda kawagambiriti walongu wakuyi, "Hatupati mota gaa patumlaga mlongu gwetu na kufifa mwazi gwakuyi? 27 Mbaka tumshuwuzi yomberi kwa Waishimieli awa, kumbiti natumlaga, toziya yomberi mlongu gwetu na kamwazi gumu na twenga." Na walongu wakuyi wamjimiriti. 28 Washuwuza wa Midiyani pawasokiti palii, womberi wamlaviyiti Yusufu mulirindi, wamshuwuza Yusufu kwa walera wa Ishimaeli kwa beyi ya vipandi malongu mawili vya mpiya, na womberi wamtola Yusufu wagenda nayu Misri.

29 Su Rubeni pakawuyiti kulirindi lilii, kamwoniti ndiri kayi Yusufu, kazipapulanga nguwu zakuwi kwa kuhinginika. 30 Kawagenderiti walongu wakuyi, kawagambira, "Muntemba kwahera palii! Neni hantendi hashi?"

31 Shakapanu womberi wamlikituliti mbuzi na watola lihabiti lya Yusufu na kuliloviya mumwazi gwa mbuzi ayu. 32 Su wamjegeriti tati gwawu lihabiti lilii na wamgambiriti, "Tulisola lihabiti ali, su guliloli handa lya mwana gwaku, ama ndala."

33 Tati gwawu kalimana lihabiti lilii, kalonga, "Ali ndo lihabiti lya mwana gwangu, nkanyama mkaripa gwa kuntundu kamlaga na kumliya yomberi, nakaka Yusufu wamupapula vipandi vipandi."

34 Shakapanu Yakobu kapapuliti nguwu zakuwi kavala nguwu za lilobota, kamlilira mwana gwakuyi kwa mashaka gavuwa. 35 Wana wakuyi woseri wapalu na wadala, wamwiziliti su wamunyamaziyi, kumbiti kalemiti kuwapikanira, kalonga "Mundeki nendeleyi kudaya toziya ya mwana gwangu, mpaka pahowa na kufindirwa." Hangu ndo tati gwangu ntambu yakamliliriti. 36 Shaka shilii, Wamidiani wamshuwuziiti Yusufu kwa Potifa, yumu gwa wakulu wa Farao, muntu ayu kaweriti mkulu wa shipinga sha ulolera.